3. коран̣д̣апуппхийаттхераапада̄нам̣

15. ‘‘ванакаммико пуре а̄сим̣, питума̄туматенахам̣ [питупета̄махенахам̣ (сӣ. сйа̄. пӣ.)];

пасума̄рена джӣва̄ми, кусалам̣ ме на виджджати.

16. ‘‘мама а̄сайаса̄манта̄, тиссо локаггана̄йако;

пада̄ни тӣн̣и дассеси, анукампа̄йа чаккхума̄.

17. ‘‘акканте ча паде дисва̄, тиссана̄масса саттхуно;

хат̣т̣хо хат̣т̣хена читтена, паде читтам̣ паса̄дайим̣.

18. ‘‘коран̣д̣ам̣ пуппхитам̣ дисва̄, па̄дапам̣ дхаран̣ӣрухам̣;

сакосакам̣ гахетва̄на, падасет̣т̣хамапӯджайим̣ [падасет̣т̣хе апӯджайим̣ (сӣ. пӣ.)].

19. ‘‘тена каммена сукатена, четана̄пан̣идхӣхи ча;

джахитва̄ ма̄нусам̣ дехам̣, та̄ватим̣самагаччхахам̣.

20. ‘‘йам̣ йам̣ йонупападжджа̄ми, деваттам̣ атха ма̄нусам̣;

коран̣д̣акачхави хоми, суппабха̄со [сапабха̄со (сӣ. сйа̄. пӣ. ка.)] бхава̄махам̣.

21. ‘‘двенавуте ито каппе, йам̣ каммамакарим̣ тада̄;

дуггатим̣ на̄бхиджа̄на̄ми, падапӯджа̄йидам̣ пхалам̣.

22. ‘‘килеса̄ джха̄пита̄ майхам̣…пе… вихара̄ми ана̄саво.

23. ‘‘сва̄гатам̣ вата ме а̄си…пе… катам̣ буддхасса са̄санам̣.

24. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ коран̣д̣апуппхийо тхеро има̄ га̄тха̄йо

абха̄ситтха̄ти.

коран̣д̣апуппхийаттхерасса̄пада̄нам̣ татийам̣.