4. ким̣сукапуппхийаттхераапада̄нам̣

25. ‘‘ким̣сукам̣ пуппхитам̣ дисва̄, паггахетва̄на ан̃джалим̣;

буддхасет̣т̣хам̣ саритва̄на, а̄ка̄се абхипӯджайим̣.

26. ‘‘тена каммена сукатена, четана̄пан̣идхӣхи ча;

джахитва̄ ма̄нусам̣ дехам̣, та̄ватим̣самагаччхахам̣.

27. ‘‘екатим̣се ито каппе, йам̣ каммамакарим̣ тада̄;

дуггатим̣ на̄бхиджа̄на̄ми, буддхапӯджа̄йидам̣ пхалам̣.

28. ‘‘килеса̄ джха̄пита̄ майхам̣…пе… вихара̄ми ана̄саво.

29. ‘‘сва̄гатам̣ вата ме а̄си…пе… катам̣ буддхасса са̄санам̣.

30. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ ким̣сукапуппхийо тхеро има̄ га̄тха̄йо

абха̄ситтха̄ти.

ким̣сукапуппхийаттхерасса̄пада̄нам̣ чатуттхам̣.