3. ка̄л̣игодха̄путтабхаддийаттхераапада̄нам̣

54. ‘‘падумуттарасамбуддхам̣, меттачиттам̣ маха̄муним̣;

упети джаната̄ сабба̄, саббалокаггана̄йакам̣.

55. ‘‘саттукан̃ча баддхакан̃ча [ваттхам̣ сена̄санан̃чева (сӣ.), саттукан̃ча падакан̃ча (сӣ. ат̣т̣ха.), саттукан̃ча пава̄кан̃ча (сйа̄.)], а̄мисам̣ па̄набходжанам̣;

даданти саттхуно саббе, пун̃н̃аккхетте ануттаре.

56. ‘‘ахампи да̄нам̣ дасса̄ми, девадевасса та̄дино;

буддхасет̣т̣хам̣ нимантетва̄, сан̇гхампи ча ануттарам̣.

57. ‘‘уййоджита̄ майа̄ чете, нимантесум̣ татха̄гатам̣;

кевалам̣ бхиккхусан̇гхан̃ча, пун̃н̃аккхеттам̣ ануттарам̣.

58. ‘‘сатасахассапаллан̇кам̣, сован̣н̣ам̣ гонакаттхатам̣;

тӯлика̄пат̣алика̄йа, кхомакаппа̄сикехи ча;

маха̄рахам̣ пан̃н̃а̄пайим̣, а̄санам̣ буддхайуттакам̣.

59. ‘‘падумуттаро локавидӯ, девадево нара̄сабхо;

бхиккхусан̇гхапарибйӯл̣хо, мама два̄рамупа̄гами.

60. ‘‘паччуггантва̄на самбуддхам̣, локана̄тхам̣ йасассинам̣;

пасанначитто сумано, абхина̄майим̣ сан̇гхарам̣ [сакам̣ гхарам̣ (сӣ.)].

61. ‘‘бхиккхӯнам̣ сатасахассам̣, буддхан̃ча локана̄йакам̣;

пасанначитто сумано, параманнена таппайим̣.

62. ‘‘падумуттаро локавидӯ, а̄хутӣнам̣ пат̣иггахо;

бхиккхусан̇гхе нисӣдитва̄, има̄ га̄тха̄ абха̄сатха.

63. ‘‘‘йенидам̣ а̄санам̣ диннам̣, сован̣н̣ам̣ гонакаттхатам̣;

тамахам̣ киттайисса̄ми, сун̣а̄тха мама бха̄сато.

64. ‘‘‘чатусаттатиккхаттум̣ со, девараджджам̣ кариссати;

анубхоссати сампаттим̣, аччхара̄хи пураккхато.

65. ‘‘‘падесараджджам̣ сахассам̣, васудхам̣ а̄васиссати;

екапан̃н̃а̄саккхаттун̃ча, чаккаваттӣ бхависсати.

66. ‘‘‘сабба̄су бхавайонӣсу, учча̄кулӣ [учча̄куле (ка.)] бхависсати;

со ча паччха̄ паббаджитва̄, суккамӯлена чодито;

бхаддийо на̄ма на̄мена, хессати саттху са̄вако.

67. ‘‘‘вивекамануйуттомхи, пантасенанива̄сахам̣;

пхалан̃ча̄дхигатам̣ саббам̣, чаттаклесомхи аджджахам̣.

68. ‘‘‘мама саббам̣ [каммам̣ (?)] абхин̃н̃а̄йа, саббан̃н̃ӯ локана̄йако;

бхиккхусан̇гхе нисӣдитва̄, етадагге т̣хапеси мам̣’.

69. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ бхаддийо ка̄л̣игодха̄йа путто тхеро има̄ га̄тха̄йо абха̄ситтха̄ти.

бхаддийасса ка̄л̣игодха̄йа путтаттхерасса̄пада̄нам̣ татийам̣.