4. саннит̣т̣ха̄пакаттхераапада̄нам̣

70. ‘‘аран̃н̃е кут̣икам̣ катва̄, васа̄ми паббатантаре;

ла̄бха̄ла̄бхена сантут̣т̣хо, йасена айасена ча.

71. ‘‘падумуттаро локавидӯ, а̄хутӣнам̣ пат̣иггахо;

васӣсатасахассехи [бхиккхусатасахассехи (сйа̄.)], а̄гаччхи мама сантикам̣.

72. ‘‘упа̄гатам̣ маха̄на̄гам̣ [маха̄вӣрам̣ (сӣ.)], джаладжуттамана̄макам̣;

тин̣асантхарам̣ [тин̣аттхарам̣ (ка.)] пан̃н̃а̄петва̄, ада̄сим̣ саттхуно ахам̣.

73. ‘‘пасанначитто сумано, а̄ман̣д̣ам̣ па̄нӣйан̃чахам̣;

ада̄сим̣ уджубхӯтасса, виппасаннена четаса̄.

74. ‘‘сатасахассито каппе [сатасахассе ито каппе (сӣ.)], йам̣ да̄намададим̣ тада̄;

дуггатим̣ на̄бхиджа̄на̄ми, а̄ман̣д̣асса идам̣ пхалам̣.

75. ‘‘еката̄лӣсакаппамхи, еко а̄сим̣ ариндамо;

саттаратанасампанно, чаккаваттӣ махаббало.

76. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ саннит̣т̣ха̄пако [саннидха̄пако (сӣ.)] тхеро има̄ га̄тха̄йо абха̄ситтха̄ти.

саннит̣т̣ха̄пакаттхерасса̄пада̄нам̣ чатуттхам̣.