2. ман̣ипӯджакаттхераапада̄нам̣

8. ‘‘падумуттаро на̄ма джино, саббадхамма̄на па̄рагӯ;

вивекака̄мо самбуддхо, гаччхате анилан̃джасе.

9. ‘‘авидӯре химавантасса, маха̄джа̄тассаро аху;

таттха ме бхаванам̣ а̄си, пун̃н̃акаммена сам̣йутам̣.

10. ‘‘бхавана̄ абхиниккхамма, аддасам̣ локана̄йакам̣;

индӣварам̣ва джалитам̣, а̄диттам̣ва хута̄санам̣.

11. ‘‘вичинам̣ наддасам̣ пуппхам̣, пӯджайиссанти на̄йакам̣;

сакам̣ читтам̣ паса̄детва̄, авандим̣ саттхуно ахам̣.

12. ‘‘мама сӣсе ман̣им̣ гайха, пӯджайим̣ локана̄йакам̣;

има̄йа ман̣ипӯджа̄йа, випа̄ко хоту бхаддако.

13. ‘‘падумуттаро локавидӯ, а̄хутӣнам̣ пат̣иггахо;

анталиккхе т̣хито саттха̄, имам̣ га̄тхам̣ абха̄сатха.

14. ‘со те иджджхату сан̇каппо, лабхассу випулам̣ сукхам̣;

има̄йа ман̣ипӯджа̄йа, анубхохи маха̄йасам̣’.

15. ‘‘идам̣ ватва̄на бхагава̄, джаладжуттамана̄мако;

агама̄си буддхасет̣т̣хо, йаттха читтам̣ пан̣ӣхитам̣.

16. ‘‘сат̣т̣хикаппа̄ни девиндо, девараджджамака̄райим̣;

анекасатаккхаттун̃ча, чаккаваттӣ ахосахам̣.

17. ‘‘пуббакаммам̣ сарантасса, девабхӯтасса ме сато;

ман̣и ниббаттате майхам̣, а̄локакаран̣о мамам̣.

18. ‘‘чхал̣асӣтисахасса̄ни, на̄рийо ме париггаха̄;

вичиттаваттха̄бхаран̣а̄, а̄муккаман̣икун̣д̣ала̄ [а̄муттаман̣икун̣д̣ала̄ (сӣ. сйа̄. пӣ.)].

19. ‘‘ал̣а̄рапамха̄ хасула̄, сусан̃н̃а̄ танумаджджхима̄;

парива̄ренти мам̣ ниччам̣, ман̣ипӯджа̄йидам̣ пхалам̣.

20. ‘‘сон̣н̣амайа̄ ман̣имайа̄, лохитан̇гамайа̄ татха̄;

бхан̣д̣а̄ ме суката̄ хонти, йадиччхаси [йадиччха̄йа (сӣ. пӣ.)] пил̣андхана̄.

21. ‘‘кӯт̣а̄га̄ра̄ гаха̄рамма̄, сайанан̃ча маха̄рахам̣;

мама сан̇каппаман̃н̃а̄йа, ниббаттанти йадиччхакам̣.

22. ‘‘ла̄бха̄ тесам̣ суладдхан̃ча, йе лабханти упассутим̣;

пун̃н̃аккхеттам̣ манусса̄нам̣, осадхам̣ саббапа̄н̣инам̣.

23. ‘‘майхампи сукатам̣ каммам̣, йохам̣ адаккхи на̄йакам̣;

винипа̄та̄ памуттомхи, паттомхи ачалам̣ падам̣.

24. ‘‘йам̣ йам̣ йонупападжджа̄ми, деваттам̣ атха ма̄нусам̣;

дивасан̃чева раттин̃ча [саманта̄ саттаратана̄ (сӣ. пӣ. ка.)], а̄локо хоти ме сада̄.

25. ‘‘та̄йева ман̣ипӯджа̄йа, анубхотва̄на сампада̄;

н̃а̄н̣а̄локо майа̄ дит̣т̣хо, паттомхи ачалам̣ падам̣.

26. ‘‘сатасахассито каппе, йам̣ ман̣им̣ абхипӯджайим̣;

дуггатим̣ на̄бхиджа̄на̄ми, ман̣ипӯджа̄йидам̣ пхалам̣.

27. ‘‘килеса̄ джха̄пита̄ майхам̣…пе… вихара̄ми ана̄саво.

28. ‘‘сва̄гатам̣ вата ме а̄си…пе… катам̣ буддхасса са̄санам̣.

29. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ ман̣ипӯджако тхеро има̄ га̄тха̄йо

абха̄ситтха̄ти.

ман̣ипӯджакаттхерасса̄пада̄нам̣ дутийам̣.