3. укка̄сатикаттхераапада̄нам̣

30. ‘‘косико на̄ма бхагава̄, читтакӯт̣е васӣ тада̄;

джха̄йӣ джха̄нарато буддхо, вивека̄бхирато муни.

31. ‘‘аджджхога̄хетва̄ [аджджхогахетва̄ (сӣ. сйа̄. пӣ.)] химавантам̣, на̄рӣган̣апураккхато;

аддасам̣ косикам̣ буддхам̣, пун̣н̣ама̄йева чандимам̣.

32. ‘‘укка̄сате гахетва̄на, парива̄ресахам̣ тада̄;

саттараттиндивам̣ т̣хатва̄ [буддхо (сйа̄. ка.)], ат̣т̣хамена агаччхахам̣.

33. ‘‘вут̣т̣хитам̣ косикам̣ буддхам̣, сайамбхум̣ апара̄джитам̣;

пасанначитто вандитва̄, екам̣ бхиккхам̣ ада̄сахам̣.

34. ‘‘тена каммена двипадинда, локаджет̣т̣ха нара̄сабха;

уппаджджим̣ тусите ка̄йе, екабхиккха̄йидам̣ пхалам̣.

35. ‘‘дивасан̃чева раттин̃ча, а̄локо хоти ме сада̄;

саманта̄ йоджанасатам̣, обха̄сена пхара̄махам̣.

36. ‘‘пан̃чапан̃н̃а̄сакаппамхи, чаккаваттӣ ахосахам̣;

ча̄туранто виджита̄вӣ, джамбуман̣д̣асса [джамбусан̣д̣асса (пӣ.)] иссаро.

37. ‘‘тада̄ ме нагарам̣ а̄си, иддхам̣ пхӣтам̣ суниммитам̣;

тим̣сайоджанама̄йа̄мам̣, виттха̄рена ча вӣсати.

38. ‘‘собхан̣ам̣ на̄ма нагарам̣, виссакаммена ма̄питам̣;

дасасадда̄вивиттам̣ там̣, саммата̄л̣асама̄хитам̣.

39. ‘‘на тамхи нагаре аттхи, валликат̣т̣хан̃ча маттика̄;

саббасон̣н̣амайам̣йева, джотате ниччака̄ликам̣.

40. ‘‘чатупа̄ка̄рапариккхиттам̣, тайо а̄сум̣ ман̣имайа̄;

вемаджджхе та̄лапантӣ ча, виссакаммена ма̄пита̄.

41. ‘‘дасасахассапоккхаран̃н̃о, падумуппалачха̄дита̄;

пун̣д̣арӣкехи [пун̣д̣арӣка̄ди (сйа̄.)] сан̃чханна̄, на̄на̄гандхасамӣрита̄.

42. ‘‘чатуннавутито каппе, йам̣ уккам̣ дха̄райим̣ ахам̣;

дуггатим̣ на̄бхиджа̄на̄ми, уккадха̄рассидам̣ пхалам̣.

43. ‘‘килеса̄ джха̄пита̄ майхам̣…пе… вихара̄ми ана̄саво.

44. ‘‘сва̄гатам̣ вата ме а̄си…пе… катам̣ буддхасса са̄санам̣.

45. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ укка̄сатико тхеро има̄ га̄тха̄йо

абха̄ситтха̄ти.

укка̄сатикаттхерасса̄пада̄нам̣ татийам̣.