8. па̄дапӣт̣хийаттхераапада̄нам̣

50. ‘‘сумедхо на̄ма самбуддхо, агго ка̄рун̣ико муни;

та̄райитва̄ бахӯ сатте, ниббуто со маха̄йасо.

51. ‘‘сӣха̄санасса са̄манта̄, сумедхасса махесино;

пасанначитто сумано, па̄дапӣт̣хамака̄райим̣.

52. ‘‘катва̄на кусалам̣ каммам̣, сукхапа̄кам̣ сукхудрайам̣;

пун̃н̃акаммена сам̣йутто, та̄ватим̣самагаччхахам̣.

53. ‘‘таттха ме васама̄насса, пун̃н̃акаммасаман̇гино;

пада̄ни уддхарантасса, сон̣н̣апӣт̣ха̄ бхаванти ме.

54. ‘‘ла̄бха̄ тесам̣ суладдхам̣ во, йе лабханти упассутим̣;

ниббуте ка̄рам̣ катва̄на, лабханти випулам̣ сукхам̣.

55. ‘‘майа̄пи сукатам̣ каммам̣, ва̄н̣иджджам̣ суппайоджитам̣;

па̄дапӣт̣хам̣ каритва̄на, сон̣н̣апӣт̣хам̣ лабха̄махам̣.

56. ‘‘йам̣ йам̣ дисам̣ паккама̄ми, кеначи киччайенахам̣ [паччайенахам̣ (сӣ. пӣ.)];

сон̣н̣апӣт̣хе аккама̄ми [сон̣н̣апӣт̣хена кама̄ми (ка.)], пун̃н̃акаммассидам̣ пхалам̣.

57. ‘‘тим̣сакаппасахассамхи, йам̣ каммамакарим̣ тада̄;

дуггатим̣ на̄бхиджа̄на̄ми, па̄дапӣт̣хассидам̣ пхалам̣.

58. ‘‘килеса̄ джха̄пита̄ майхам̣…пе… вихара̄ми ана̄саво.

59. ‘‘сва̄гатам̣ вата ме а̄си…пе… катам̣ буддхасса са̄санам̣.

60. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ па̄дапӣт̣хийо тхеро има̄ га̄тха̄йо

абха̄ситтха̄ти.

па̄дапӣт̣хийаттхерасса̄пада̄нам̣ ат̣т̣хамам̣.