10. бодхигхарада̄йакаттхераапада̄нам̣

69. ‘‘сиддхаттхасса бхагавато, двипадиндасса та̄дино;

пасанначитто сумано, бодхигхарамака̄райим̣.

70. ‘‘туситам̣ упапанномхи, васа̄ми ратане гхаре;

на ме сӣтам̣ ва̄ ун̣хам̣ ва̄, ва̄то гатте на сампхусе.

71. ‘‘пан̃часат̣т̣химхито каппе, чаккаваттӣ ахосахам̣;

ка̄сикам̣ на̄ма нагарам̣, виссакаммена [висукаммена (сйа̄. ка.)] ма̄питам̣.

72. ‘‘дасайоджанаа̄йа̄мам̣, ат̣т̣хайоджанавиттхатам̣;

на тамхи нагаре аттхи, кат̣т̣хам̣ валлӣ ча маттика̄.

73. ‘‘тирийам̣ йоджанам̣ а̄си, аддхайоджанавиттхатам̣;

ман̇гало на̄ма па̄са̄до, виссакаммена ма̄пито.

74. ‘‘чулла̄сӣтисахасса̄ни, тхамбха̄ сон̣н̣амайа̄ ахум̣;

ман̣имайа̄ ча ниййӯха̄, чхаданам̣ рӯпийам̣ аху.

75. ‘‘саббасон̣н̣амайам̣ гхарам̣, виссакаммена ма̄питам̣;

аджджха̄вуттхам̣ майа̄ етам̣, гхарада̄нассидам̣ пхалам̣.

76. ‘‘те саббе анубхотва̄на, девама̄нусаке бхаве;

аджджхапаттомхи нибба̄нам̣, сантипадамануттарам̣.

77. ‘‘тим̣сакаппасахассамхи, бодхигхарамака̄райим̣;

дуггатим̣ на̄бхиджа̄на̄ми, гхарада̄нассидам̣ пхалам̣.

78. ‘‘килеса̄ джха̄пита̄ майхам̣…пе… вихара̄ми ана̄саво.

79. ‘‘сва̄гатам̣ вата ме а̄си…пе… катам̣ буддхасса са̄санам̣.

80. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ бодхигхарада̄йако тхеро има̄ га̄тха̄йо

абха̄ситтха̄ти.

бодхигхарада̄йакаттхерасса̄пада̄нам̣ дасамам̣.

вибхӣтакавагго пан̃чачатта̄лӣсамо.