10. сон̣н̣аконтарикаттхераапада̄нам̣

157. ‘‘манобха̄ванийам̣ буддхам̣, аттадантам̣ сама̄хитам̣;

ирийама̄нам̣ брахмапатхе, читтавӯпасаме ратам̣.

158. ‘‘ниттин̣н̣аогхам̣ самбуддхам̣, джха̄йим̣ джха̄наратам̣ муним̣;

упатиттхам̣ сама̄паннам̣, индиварадалаппабхам̣.

159. ‘‘ала̄бунодакам̣ гайха, буддхасет̣т̣хам̣ упа̄гамим̣;

буддхасса па̄де дховитва̄, ала̄букамада̄сахам̣.

160. ‘‘а̄н̣а̄песи ча самбуддхо, падумуттарана̄мако;

‘имина̄ дакама̄хатва̄, па̄дамӯле т̣хапехи ме’.

161. ‘‘са̄дхӯтихам̣ пат̣иссутва̄, саттхуга̄равата̄йа ча;

дакам̣ ала̄буна̄хатва̄, буддхасет̣т̣хам̣ упа̄гамим̣.

162. ‘‘анумоди маха̄вӣро, читтам̣ нибба̄пайам̣ мама;

‘имина̄ла̄буда̄нена, сан̇каппо те самиджджхату’.

163. ‘‘паннарасесу каппесу, девалоке рамим̣ ахам̣;

тим̣сатиккхаттум̣ ра̄джа̄ ча, чаккаваттӣ ахосахам̣.

164. ‘‘дива̄ ва̄ йади ва̄ раттим̣, чан̇камантасса тит̣т̣хато;

сован̣н̣ам̣ контарам̣ гайха, тит̣т̣хате пурато мама.

165. ‘‘буддхасса датва̄нала̄бум̣, лабха̄ми сон̣н̣аконтарам̣;

аппакампи катам̣ ка̄рам̣, випулам̣ хоти та̄дису.

166. ‘‘сатасахассито каппе, йам̣ла̄бумададим̣ тада̄;

дуггатим̣ на̄бхиджа̄на̄ми, ала̄бусса идам̣ пхалам̣.

167. ‘‘килеса̄ джха̄пита̄ майхам̣…пе… вихара̄ми ана̄саво.

168. ‘‘сва̄гатам̣ вата ме а̄си…пе… катам̣ буддхасса са̄санам̣.

169. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ сон̣н̣аконтарико тхеро има̄

га̄тха̄йо абха̄ситтха̄ти.

сон̣н̣аконтарикаттхерасса̄пада̄нам̣ дасамам̣.

саким̣саммаджджакавагго течатта̄лӣсамо.