44. екавиха̄ривагго

1. екавиха̄рикаттхераапада̄нам̣

1. ‘‘имамхи бхаддаке каппе, брахмабандху маха̄йасо;

кассапо на̄ма готтена, уппаджджи вадатам̣ варо.

2. ‘‘ниппапан̃чо нира̄ламбо, а̄ка̄сасамама̄насо;

сун̃н̃ата̄бахуло та̄дӣ, анимиттарато васӣ.

3. ‘‘асан̇гачитто никлесо [ниллепо (сйа̄. ка.)], асам̣сат̣т̣хо куле ган̣е;

маха̄ка̄рун̣ико вӣро, винайопа̄йаковидо.

4. ‘‘уййутто паракиччесу, винайанто садеваке;

нибба̄нагаманам̣ маггам̣, гатим̣ пан̇кависосанам̣.

5. ‘‘аматам̣ парамасса̄дам̣, джара̄маччунива̄ран̣ам̣;

маха̄парисамаджджхе со, нисинно локата̄рако.

6. ‘‘каравӣкаруто [каравӣкарудо (сйа̄. пӣ. ка.)] на̄тхо, брахмагхосо татха̄гато;

уддхаранто маха̄дугга̄, виппанат̣т̣хе ана̄йаке.

7. ‘‘десенто вираджам̣ дхаммам̣, дит̣т̣хо ме локана̄йако;

тасса дхаммам̣ сун̣итва̄на, паббаджим̣ анага̄рийам̣.

8. ‘‘паббаджитва̄ тада̄па̄хам̣, чинтенто джинаса̄санам̣;

екакова ване рамме, васим̣ сам̣саггапӣл̣ито.

9. ‘‘сакка̄йавӯпака̄со ме, хетубхӯто мама̄бхавӣ [мама̄гамӣ (сйа̄. пӣ.)];

манасо вӯпака̄сасса, сам̣саггабхайадассино.

10. ‘‘килеса̄ джха̄пита̄ майхам̣, бхава̄ саббе самӯхата̄;

на̄гова бандханам̣ чхетва̄, вихара̄ми ана̄саво.

11. ‘‘сва̄гатам̣ вата ме а̄си, мама буддхасса сантике;

тиссо виджджа̄ ануппатта̄, катам̣ буддхасса са̄санам̣.

12. ‘‘пат̣исамбхида̄ чатассо, вимоккха̄пи ча ат̣т̣химе;

чхал̣абхин̃н̃а̄ саччхиката̄, катам̣ буддхасса са̄санам̣’’.

иттхам̣ судам̣ а̄йасма̄ екавиха̄рико тхеро има̄ га̄тха̄йо

абха̄ситтха̄ти.

екавиха̄рикаттхерасса̄пада̄нам̣ пат̣хамам̣.

2. екасан̇кхийаттхераапада̄нам̣

13. ‘‘випассино бхагавато, маха̄бодхимахо аху;

маха̄джана̄ сама̄гамма, пӯдженти бодхимуттамам̣.

14. ‘‘на хи там̣ оракам̣ ман̃н̃е, буддхасет̣т̣хо бхависсати;

йасса̄йам̣ ӣдиса̄ бодхи, пӯджанӣйа̄ [ӣдисо бодхи, пӯджанӣйо (сйа̄.)] ча саттхуно.

15. ‘‘тато сан̇кхам̣ гахетва̄на, бодхируккхамупат̣т̣хахим̣;

дхаманто саббадивасам̣, авандим̣ бодхимуттамам̣.

16. ‘‘а̄саннаке катам̣ каммам̣, девалокам̣ апа̄пайӣ;

кал̣еварам̣ ме патитам̣, девалоке рама̄махам̣.

17. ‘‘сат̣т̣хитурийасахасса̄ни, тут̣т̣хахат̣т̣ха̄ памодита̄;

сада̄ майхам̣ упат̣т̣ханти, буддхапӯджа̄йидам̣ пхалам̣.

18. ‘‘екасаттатиме каппе, ра̄джа̄ а̄сим̣ судассано;

ча̄туранто виджита̄вӣ, джамбуман̣д̣асса иссаро.

19. ‘‘тато ан̇гасата̄ турийа̄ [тӯра̄ (сӣ. ка.)], парива̄ренти мам̣ сада̄;

анубхоми сакам̣ каммам̣, упат̣т̣ха̄нассидам̣ пхалам̣.

20. ‘‘йам̣ йам̣ йонупападжджа̄ми, деваттам̣ атха ма̄нусам̣;

ма̄тукуччхигатасса̄пи, ваджджаре бхерийо сада̄.

21. ‘‘упат̣т̣хитва̄на самбуддхам̣, анубхутва̄на сампада̄;

сивам̣ сукхемам̣ аматам̣, паттомхи ачалам̣ падам̣.

22. ‘‘еканавутито каппе, йам̣ каммамакарим̣ тада̄;

дуггатим̣ на̄бхиджа̄на̄ми, буддхапӯджа̄йидам̣ пхалам̣.

23. ‘‘килеса̄ джха̄пита̄ майхам̣…пе… вихара̄ми ана̄саво.

24. ‘‘сва̄гатам̣ вата ме а̄си…пе… катам̣ буддхасса са̄санам̣.

25. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ екасан̇кхийо тхеро има̄ га̄тха̄йо

абха̄ситтха̄ти.

екасан̇кхийаттхерасса̄пада̄нам̣ дутийам̣.

3. па̄т̣ихӣрасан̃н̃акаттхераапада̄нам̣

26. ‘‘падумуттаро на̄ма джино, а̄хутӣнам̣ пат̣иггахо;

васӣсатасахассехи, нагарам̣ па̄висӣ тада̄.

27. ‘‘нагарам̣ пависантасса, упасантасса та̄дино;

ратана̄ни паджджотим̣су [пана̄дим̣су (пӣ.)], ниггхосо а̄си та̄ваде.

28. ‘‘буддхасса а̄нубха̄вена, бхерӣ ваджджумагхат̣т̣ита̄;

сайам̣ вӣн̣а̄ паваджджанти, буддхасса пависато пурам̣.

29. ‘‘буддхасет̣т̣хам̣ намасса̄ми [на пасса̄ми (сӣ.)], падумуттарамаха̄муним̣;

па̄т̣ихӣран̃ча пасситва̄, таттха читтам̣ паса̄дайим̣.

30. ‘‘ахо буддхо ахо дхаммо, ахо но саттхусампада̄;

ачетана̄пи турийа̄, сайамева паваджджаре.

31. ‘‘сатасахассито каппе, йам̣ сан̃н̃амалабхим̣ тада̄;

дуггатим̣ на̄бхиджа̄на̄ми, буддхасан̃н̃а̄йидам̣ пхалам̣.

32. ‘‘килеса̄ джха̄пита̄ майхам̣…пе… вихара̄ми ана̄саво.

33. ‘‘сва̄гатам̣ вата ме а̄си…пе… катам̣ буддхасса са̄санам̣.

34. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ па̄т̣ихӣрасан̃н̃ако тхеро има̄ га̄тха̄йо

абха̄ситтха̄ти.

па̄т̣ихӣрасан̃н̃акаттхерасса̄пада̄нам̣ татийам̣.

4. н̃а̄н̣аттхавикаттхераапада̄нам̣

35. ‘‘кан̣ика̄рам̣ва джалитам̣, дӣпаруккхам̣ва джотитам̣;

кан̃чанам̣ва вирочантам̣, аддасам̣ двипадуттамам̣.

36. ‘‘каман̣д̣алум̣ т̣хапетва̄на, ва̄качӣран̃ча кун̣д̣икам̣;

екам̣сам̣ аджинам̣ катва̄, буддхасет̣т̣хам̣ тхавим̣ ахам̣.

37. ‘‘‘тамандхака̄рам̣ видхамам̣, мохаджа̄ласама̄кулам̣;

н̃а̄н̣а̄локам̣ дассетва̄на, ниттин̣н̣оси маха̄муни.

38. ‘‘‘самуддхарасимам̣ локам̣, сабба̄вантамануттарам̣;

н̃а̄н̣е те упама̄ наттхи, йа̄вата̄джагатогати [йа̄вата̄ ча гатогати (пӣ. ка.)].

39. ‘‘‘тена н̃а̄н̣ена саббан̃н̃ӯ, ити буддхо павуччати;

ванда̄ми там̣ маха̄вӣрам̣, саббан̃н̃утамана̄варам̣’.

40. ‘‘сатасахассито каппе, буддхасет̣т̣хам̣ тхавим̣ ахам̣;

дуггатим̣ на̄бхиджа̄на̄ми, н̃а̄н̣аттхава̄йидам̣ пхалам̣;

41. ‘‘килеса̄ джха̄пита̄ майхам̣…пе… вихара̄ми ана̄саво;

42. ‘‘сва̄гатам̣ вата ме а̄си…пе… катам̣ буддхасса са̄санам̣.

43. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ н̃а̄н̣аттхавико тхеро има̄ га̄тха̄йо

абха̄ситтха̄ти.

н̃а̄н̣аттхавикаттхерасса̄пада̄нам̣ чатуттхам̣.

5. уччхукхан̣д̣икаттхераапада̄нам̣

44. ‘‘нагаре бандхуматийа̄, два̄рапа̄ло ахосахам̣;

аддасам̣ вираджам̣ буддхам̣, саббадхамма̄на па̄рагум̣.

45. ‘‘уччхукхан̣д̣икама̄да̄йа, буддхасет̣т̣хассада̄сахам̣;

пасанначитто сумано, випассисса махесино.

46. ‘‘еканавутито каппе, йам̣ уччхумададим̣ тада̄;

дуггатим̣ на̄бхиджа̄на̄ми, уччхукхан̣д̣ассидам̣ пхалам̣.

47. ‘‘килеса̄ джха̄пита̄ майхам̣…пе… вихара̄ми ана̄саво.

48. ‘‘сва̄гатам̣ вата ме а̄си…пе… катам̣ буддхасса са̄санам̣.

49. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ уччхукхан̣д̣ико тхеро има̄ га̄тха̄йо

абха̄ситтха̄ти.

уччхукхан̣д̣икаттхерасса̄пада̄нам̣ пан̃чамам̣.

6. кал̣амбада̄йакаттхераапада̄нам̣

50. ‘‘ромасо на̄ма самбуддхо, васате паббатантаре;

кал̣амбам̣ тасса па̄да̄сим̣, пасанно сехи па̄н̣ибхи.

51. ‘‘чатуннавутито каппе, йам̣ да̄намададим̣ тада̄;

дуггатим̣ на̄бхиджа̄на̄ми, кал̣амбасса идам̣ пхалам̣.

52. ‘‘килеса̄ джха̄пита̄ майхам̣…пе… вихара̄ми ана̄саво.

53. ‘‘сва̄гатам̣ вата ме а̄си…пе… катам̣ буддхасса са̄санам̣.

54. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ кал̣амбада̄йако тхеро има̄ га̄тха̄йо

абха̄ситтха̄ти.

кал̣амбада̄йакаттхерасса̄пада̄нам̣ чхат̣т̣хам̣.

7. амба̄т̣акада̄йакаттхераапада̄нам̣

55. ‘‘випине буддхам̣ дисва̄на, сайамбхум̣ апара̄джитам̣;

амба̄т̣акам̣ гахетва̄на, сайамбхусса ада̄сахам̣.

56. ‘‘екатим̣се ито каппе, йам̣ пхаламададим̣ тада̄;

дуггатим̣ на̄бхиджа̄на̄ми, пхалада̄нассидам̣ пхалам̣.

57. ‘‘килеса̄ джха̄пита̄ майхам̣…пе… вихара̄ми ана̄саво.

58. ‘‘сва̄гатам̣ вата ме а̄си…пе… катам̣ буддхасса са̄санам̣.

59. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ амба̄т̣акада̄йако тхеро има̄ га̄тха̄йо

абха̄ситтха̄ти.

амба̄т̣акада̄йакаттхерасса̄пада̄нам̣ саттамам̣.

8. харӣтакада̄йакаттхераапада̄нам̣

60. ‘‘харӣтакам̣ а̄малакам̣, амбаджамбувибхӣтакам̣;

колам̣ бхалла̄такам̣ биллам̣, сайамева хара̄махам̣.

61. ‘‘дисва̄на паббха̄рагатам̣, джха̄йим̣ джха̄наратам̣ муним̣;

а̄ба̄дхена а̄пӣл̣ентам̣, адутӣйам̣ маха̄муним̣.

62. ‘‘харӣтакам̣ гахетва̄на, сайамбхусса ада̄сахам̣;

кха̄даматтамхи бхесадждже, бйа̄дхи пассамбхи [пассаддхи (ка.)] та̄ваде.

63. ‘‘пахӣнадаратхо буддхо, анумодамака̄си ме;

‘бхесаджджада̄ненимина̄, бйа̄дхивӯпасамена ча.

64. ‘‘‘девабхӯто мануссо ва̄, джа̄то ва̄ ан̃н̃аджа̄тийа̄;

саббаттха сукхито хоту, ма̄ ча те бйа̄дхима̄гама̄’.

65. ‘‘идам̣ ватва̄на самбуддхо, сайамбхӯ апара̄джито;

набхам̣ аббхуггамӣ дхӣро, хам̣сара̄джа̄ва амбаре.

66. ‘‘йато харӣтакам̣ диннам̣, сайамбхусса махесино;

имам̣ джа̄тим̣ упа̄да̄йа, бйа̄дхи ме нупападжджатха.

67. ‘‘айам̣ паччхимако майхам̣, чаримо ваттате бхаво;

тиссо виджджа̄ саччхиката̄, катам̣ буддхасса са̄санам̣.

68. ‘‘чатуннавутито каппе, бхесаджджамададим̣ тада̄;

дуггатим̣ на̄бхиджа̄на̄ми, бхесаджджасса идам̣ пхалам̣.

69. ‘‘килеса̄ джха̄пита̄ майхам̣…пе… вихара̄ми ана̄саво.

70. ‘‘сва̄гатам̣ вата ме а̄си…пе… катам̣ буддхасса са̄санам̣.