10. аджитаттхераапада̄нам̣

484. ‘‘падумуттаро на̄ма джино, саббадхамма̄на па̄рагӯ;

аджджхога̄хетва̄ химавантам̣, нисӣди локана̄йако.

485. ‘‘на̄хам̣ аддаккхим̣ [пасса̄ми (?)] самбуддхам̣, напи саддам̣ сун̣омахам̣;

мама бхаккхам̣ гавесанто, а̄хин̣д̣а̄ми ване ахам̣ [тада̄ (сӣ.)].

486. ‘‘таттхаддасса̄сим̣ самбуддхам̣, дваттим̣саваралаккхан̣ам̣;

дисва̄на виттима̄паджджим̣ [читтама̄паджджи (сӣ.), читтама̄паджджим̣ (сйа̄.)], сатто ко на̄майам̣ бхаве.

487. ‘‘лаккхан̣а̄ни вилокетва̄, мама виджджам̣ ануссарим̣;

сутан̃хи метам̣ вуд̣д̣ха̄нам̣, пан̣д̣ита̄нам̣ субха̄ситам̣.

488. ‘‘тесам̣ йатха̄ там̣ вачанам̣, айам̣ буддхо бхависсати;

йам̣нӯна̄хам̣ саккареййам̣, гатим̣ ме содхайиссати.

489. ‘‘кхиппам̣ ассамама̄гантва̄, мадхутелам̣ гахим̣ ахам̣;

коламбакам̣ гахетва̄на, упагаччхим̣ вина̄йакам̣ [нара̄сабхам̣ (сӣ.)].

490. ‘‘тидан̣д̣аке гахетва̄на, аббхока̄се т̣хапесахам̣;

падӣпам̣ паджджалитва̄на, ат̣т̣хаккхаттум̣ авандахам̣.

491. ‘‘саттараттиндивам̣ буддхо, нисӣди пурисуттамо;

тато ратйа̄ виваса̄не, вут̣т̣ха̄си локана̄йако.

492. ‘‘пасанначитто сумано, саббараттиндивам̣ ахам̣;

дӣпам̣ буддхасса па̄да̄сим̣, пасанно сехи па̄н̣ибхи.

493. ‘‘саббе вана̄ гандхамайа̄, паббате гандхама̄дане;

буддхасса а̄нубха̄вена, а̄гаччхум̣ буддхасантикам̣ [упагаччхум̣ тада̄ джинам̣ (сӣ.)].

494. ‘‘йе кечи пуппхагандха̄се, пуппхита̄ дхаран̣ӣруха̄;

буддхасса а̄нубха̄вена, саббе саннипатум̣ тада̄.

495. ‘‘йа̄вата̄ химавантамхи, на̄га̄ ча гарул̣а̄ убхо;

дхамман̃ча сотука̄ма̄ те, а̄гаччхум̣ буддхасантикам̣.

496. ‘‘девало на̄ма саман̣о, буддхасса аггаса̄вако;

васӣсатасахассехи, буддхасантикупа̄гами.

497. ‘‘падумуттаро локавидӯ, а̄хутӣнам̣ пат̣иггахо;

бхиккхусан̇гхе нисӣдитва̄, има̄ га̄тха̄ абха̄сатха.

498. ‘‘‘йо ме дӣпам̣ падӣпеси, пасанно сехи па̄н̣ибхи;

тамахам̣ киттайисса̄ми, сун̣а̄тха мама бха̄сато.

499. ‘‘‘сат̣т̣хи каппасахасса̄ни, девалоке рамиссати;

сахассаккхаттум̣ ра̄джа̄ ча, чаккаваттӣ бхависсати.

сол̣асамам̣ бха̄н̣ава̄рам̣.

500. ‘‘‘чхаттисаккхаттум̣ девиндо, девараджджам̣ кариссати;

патхавийам̣ саттасатам̣, випулам̣ раджджам̣ кариссати.

501. ‘‘‘падесараджджам̣ випулам̣, ган̣ана̄то асан̇кхийам̣;

имина̄ дӣпада̄нена, диббачаккху бхависсати.

502. ‘‘‘самантато ат̣т̣хакосам̣ [ад̣д̣хакосам̣ (сӣ. сйа̄.)], пассиссати айам̣ сада̄;

девалока̄ чавантасса, ниббаттантасса джантуно.

503. ‘‘‘дива̄ ва̄ йади ва̄ раттим̣, падӣпам̣ дха̄райиссати;

джа̄йама̄насса саттасса, пун̃н̃акаммасаман̇гино.

504. ‘‘‘йа̄вата̄ нагарам̣ а̄си, та̄вата̄ джотайиссати;

упападжджати йам̣ йоним̣, деваттам̣ атха ма̄нусам̣.

505. ‘‘‘ассева дӣпада̄насса, [ат̣т̣хадӣпапхалена хи; упат̣т̣хиссантимам̣ джантум̣ (сйа̄.), ат̣т̣ха дӣпа̄ пхалена хи; на джахиссанти’мам̣ джантум̣ (?)] ат̣т̣хадӣпапхалена хи;

на джайиссантимам̣ джантӯ [ат̣т̣хадӣпапхалена хи; упат̣т̣хиссантимам̣ джантум̣ (сйа̄.), ат̣т̣ха дӣпа̄ пхалена хи; на джахиссанти’мам̣ джантум̣ (?)], дӣпада̄нассидам̣ пхалам̣.

506. ‘‘‘каппасатасахассамхи, окка̄какуласамбхаво;

готамо на̄ма готтена, саттха̄ локе бхависсати.

507. ‘‘‘тасса дхаммесу да̄йа̄до, орасо дхамманиммито;

сабба̄саве парин̃н̃а̄йа, нибба̄йиссатина̄саво.

508. ‘‘‘тосайитва̄на самбуддхам̣, готамам̣ сакйапун̇гавам̣;

аджито на̄ма на̄мена, хессати саттху са̄вако’.

509. ‘‘сат̣т̣хи каппасахасса̄ни, девалоке рамим̣ ахам̣;

татра̄пи ме дӣпасатам̣, джотате ниччака̄ликам̣ [саббака̄ликам̣ (сӣ.)].

510. ‘‘девалоке мануссе ва̄, ниддха̄ванти пабха̄ мама;

буддхасет̣т̣хам̣ саритва̄на, бхиййо ха̄сам̣ джанесахам̣.

511. ‘‘тусита̄хам̣ чавитва̄на, оккамим̣ ма̄тукуччхийам̣;

джа̄йама̄насса сантасса, а̄локо випуло аху.

512. ‘‘ага̄ра̄ абхиниккхамма, паббаджим̣ анага̄рийам̣;

ба̄варим̣ упасан̇камма, сиссаттам̣ аджджхупа̄гамим̣.

513. ‘‘химаванте васантохам̣, ассосим̣ локана̄йакам̣;

уттаматтхам̣ гавесанто, упагаччхим̣ вина̄йакам̣.

514. ‘‘данто буддхо дамета̄вӣ, огхатин̣н̣о нирӯпадхи;

нибба̄нам̣ катхайӣ буддхо, саббадуккхаппамочанам̣.

515. ‘‘там̣ ме а̄гаманам̣ сиддхам̣, тоситохам̣ маха̄муним̣;

тиссо виджджа̄ ануппатта̄, катам̣ буддхасса са̄санам̣.

516. ‘‘сатасахассито каппе, йам̣ дӣпамададим̣ тада̄;

дуггатим̣ на̄бхиджа̄на̄ми, дӣпада̄нассидам̣ пхалам̣.

517. ‘‘килеса̄ джха̄пита̄ майхам̣…пе… вихара̄ми ана̄саво.

518. ‘‘сва̄гатам̣ вата ме а̄си…пе… катам̣ буддхасса са̄санам̣.

519. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ аджито тхеро има̄ га̄тха̄йо абха̄ситтха̄ти.

аджитаттхерасса̄пада̄нам̣ дасамам̣.

пилиндаваччхавагго чатта̄лӣсамо.

тассудда̄нам̣ –

пилиндаваччхо село ча, саббакиттӣ мадхум̣дадо;

кӯт̣а̄га̄рӣ ба̄куло ча, гири сал̣аласавхайо.

саббадо аджито чева, га̄тха̄йо ган̣ита̄ иха;

сата̄ни пан̃ча га̄тха̄нам̣, вӣсати ча тадуттарӣти.

атха ваггудда̄нам̣ –

падума̄раккхадо чева, ума̄ гандходакена ча;

екападма саддасан̃н̃ӣ, манда̄рам̣ бодхивандако.

ават̣ан̃ча пилинди [евамева диссати] ча, га̄тха̄йо ган̣ита̄ иха;

чатусаттати га̄тха̄йо, ека̄даса сата̄ни ча.

падумаваггадасакам̣.