10. пуббакаммапилотикабуддхаапада̄нам̣

64. ‘‘анотаттасара̄санне, раман̣ӣйе сила̄тале;

на̄на̄ратанападжджоте, на̄на̄гандхаванантаре.

65. ‘‘махата̄ бхиккхусан̇гхена, парето [упето (уда̄нат̣т̣хакатха̄йам̣ 4 вагге, 8 сутте)] локана̄йако;

а̄сӣно бйа̄карӣ таттха, пуббакамма̄ни аттано.

66. [сун̣а̄тха бхиккхаве майхам̣, йам̣ каммам̣ пакатам̣ майа̄; екам̣ аран̃н̃икам̣ бхиккхум̣, дисва̄ диннам̣ пилотикам̣; паттхитам̣ пат̣хамам̣ буддхам̣, буддхатта̄йа майа̄ тада̄; пилотийасса каммасса, буддхаттепи випаччати; гопа̄лако пуре а̄сим̣, га̄вим̣ па̄джети гочарам̣; пивантим̣ удакам̣ а̄вилам̣, га̄вим̣ дисва̄ нива̄райим̣; тена каммавипа̄кена, идха паччхимаке бхаве; випа̄сито йадиччхакам̣, на хи па̄тум̣ лабха̄махам̣ (сйа̄.)] ‘‘сун̣а̄тха бхиккхаво майхам̣, йам̣ каммам̣ пакатам̣ майа̄;

пилотикасса каммасса, буддхаттепи випаччати [сун̣а̄тха бхиккхаве майхам̣, йам̣ каммам̣ пакатам̣ майа̄; екам̣ аран̃н̃икам̣ бхиккхум̣, дисва̄ диннам̣ пилотикам̣; паттхитам̣ пат̣хамам̣ буддхам̣, буддхатта̄йа майа̄ тада̄; пилотийасса каммасса, буддхаттепи випаччати; гопа̄лако пуре а̄сим̣, га̄вим̣ па̄джети гочарам̣; пивантим̣ удакам̣ а̄вилам̣, га̄вим̣ дисва̄ нива̄райим̣; тена каммавипа̄кена, идха паччхимаке бхаве; випа̄сито йадиччхакам̣, на хи па̄тум̣ лабха̄махам̣ (сйа̄.)].

[1]

67. ‘‘муна̄л̣и на̄махам̣ дхутто, пуббе ан̃н̃а̄су джа̄тису [ан̃н̃а̄йа джа̄тийа̄ (уда̄на ат̣т̣ха.)];

паччекабуддхам̣ сурабхим̣ [сарабхум̣ (сӣ.)], аббха̄чиккхим̣ адӯсакам̣.

68. ‘‘тена каммавипа̄кена, нирайе сам̣сарим̣ чирам̣;

бахӯвассасахасса̄ни, дуккхам̣ ведеси веданам̣.

69. ‘‘тена камма̄васесена, идха паччхимаке бхаве;

аббхаккха̄нам̣ майа̄ ладдхам̣, сундарика̄йа ка̄ран̣а̄.

[2]

70. ‘‘сабба̄бхибхусса буддхасса, нандо на̄ма̄си са̄вако;

там̣ аббхаккха̄йа нирайе, чирам̣ сам̣саритам̣ майа̄.

71. ‘‘дасавассасахасса̄ни, нирайе сам̣сарим̣ чирам̣;

мануссабха̄вам̣ ладдха̄хам̣, аббхаккха̄нам̣ бахум̣ лабхим̣.

72. ‘‘тена камма̄васесена, чин̃чама̄навика̄ мамам̣;

аббха̄чиккхи абхӯтена, джанака̄йасса аггато.

[3]

73. ‘‘бра̄хман̣о сутава̄ а̄сим̣, ахам̣ саккатапӯджито;

маха̄ване пан̃часате, манте ва̄чеми ма̄н̣аве.

74. ‘‘таттха̄гато [тама̄гато (ка.)] иси бхӣмо, пан̃ча̄бхин̃н̃о махиддхико;

там̣ ча̄хам̣ а̄гатам̣ дисва̄, аббха̄чиккхим̣ адӯсакам̣.

75. ‘‘татохам̣ авачам̣ сиссе, ка̄мабхогӣ айам̣ иси;

майхампи бха̄сама̄насса, анумодим̣су ма̄н̣ава̄.

76. ‘‘тато ма̄н̣авака̄ саббе, бхиккхама̄нам̣ куле куле;

маха̄джанасса а̄хам̣су, ка̄мабхогӣ айам̣ иси.

77. ‘‘тена каммавипа̄кена, пан̃ча бхиккхусата̄ име;

аббхаккха̄нам̣ лабхум̣ саббе, сундарика̄йа ка̄ран̣а̄.

[4]

78. ‘‘вема̄тубха̄тарам̣ пуббе, дханахету ханим̣ ахам̣;

паккхипим̣ гиридуггасмим̣, сила̄йа ча апим̣сайим̣.

79. ‘‘тена каммавипа̄кена, девадатто силам̣ кхипи;

ан̇гут̣т̣хам̣ пим̣сайӣ па̄де, мама па̄са̄н̣асаккхара̄.

[5]

80. ‘‘пурехам̣ да̄рако хутва̄, кӣл̣ама̄но маха̄патхе;

паччекабуддхам̣ дисва̄на, магге сакаликам̣ [саккхаликам̣ (ка.)] кхипим̣ [дахим̣ (сйа̄.)].

81. ‘‘тена каммавипа̄кена, идха паччхимаке бхаве;

вадхаттхам̣ мам̣ девадатто, абхима̄ре пайоджайи.

[6]

82. ‘‘хаттха̄рохо пуре а̄сим̣, паччекамунимуттамам̣;

пин̣д̣а̄йа вичарантам̣ там̣, а̄са̄десим̣ гадженахам̣.

83. ‘‘тена каммавипа̄кена, бханто [данто (ка.)] на̄л̣а̄гирӣ гаджо;

гириббадже пураваре, да̄рун̣о самупа̄гами [мам̣ упа̄гами (сӣ.)].

[7]

84. ‘‘ра̄джа̄хам̣ паттхиво [паттико (сйа̄. ка.), кхаттийо (уда̄на ат̣т̣ха.)] а̄сим̣, саттийа̄ пурисам̣ ханим̣;

тена каммавипа̄кена, нирайе паччисам̣ бхусам̣.

85. ‘‘каммуно тасса сесена, ида̄ни сакалам̣ мама;

па̄де чхавим̣ пакаппеси [пакопеси (сӣ.)], на хи каммам̣ винассати.

[8]

86. ‘‘ахам̣ кеват̣т̣ага̄масмим̣, ахум̣ кеват̣т̣ада̄рако;

маччхаке гха̄тите дисва̄, джанайим̣ соманассакам̣ [соманассахам̣ (уда̄на ат̣т̣ха.)].

87. ‘‘тена каммавипа̄кена, сӣсадуккхам̣ ахӯ мама;

саббе сакка̄ ча хан̃н̃им̣су, йада̄ хани вит̣ат̣ӯбхо [вит̣ат̣убхо (сйа̄. ка.)].

[9]

88. ‘‘пхуссасса̄хам̣ па̄вачане, са̄ваке парибха̄сайим̣;

йавам̣ кха̄датха бхун̃джатха, ма̄ ча бхун̃джатха са̄лайо.

89. ‘‘тена каммавипа̄кена, тема̄сам̣ кха̄дитам̣ йавам̣;

нимантито бра̄хман̣ена, веран̃джа̄йам̣ васим̣ тада̄.

[10]

90. ‘‘ниббуддхе ваттама̄намхи, маллапуттам̣ нихет̣хайим̣ [ниседхайим̣ (сйа̄. ка.)];

тена каммавипа̄кена, пит̣т̣хидуккхам̣ ахӯ мама.

[11]

91. ‘‘тикиччхако ахам̣ а̄сим̣, сет̣т̣хипуттам̣ виречайим̣;

тена каммавипа̄кена, хоти паккхандика̄ мама.

[12]

92. ‘‘авача̄хам̣ джотипа̄ло, сугатам̣ кассапам̣ тада̄;

куто ну бодхи мун̣д̣асса, бодхи парамадуллабха̄.

93. ‘‘тена каммавипа̄кена, ачарим̣ дуккарам̣ бахум̣;

чхаббасса̄нурувел̣а̄йам̣, тато бодхимапа̄пун̣им̣.

94. ‘‘на̄хам̣ етена маггена, па̄пун̣им̣ бодхимуттамам̣;

куммаггена гавесиссам̣, пуббакаммена ва̄рито.

95. ‘‘пун̃н̃апа̄папариккхӣн̣о, саббасанта̄паваджджито;

асоко анупа̄йа̄со, нибба̄йиссамана̄саво.

96. ‘‘евам̣ джино вийа̄ка̄си, бхиккхусан̇гхасса аггато;

сабба̄бхин̃н̃а̄балаппатто, анотатте маха̄саре’’ти.

иттхам̣ судам̣ бхагава̄ аттано пуббачаритам̣ каммапилотикам̣ на̄ма буддха̄пада̄надхаммапарийа̄йам̣ абха̄ситтха̄ти.

пуббакаммапилотикам̣ на̄ма буддха̄пада̄нам̣ дасамам̣.

ават̣апхалавагго екӯначатта̄лӣсамо.