9. дхаммасаванийаттхераапада̄нам̣

111. ‘‘падумуттаро на̄ма джино, саббадхамма̄на па̄рагӯ;

чатусаччам̣ пака̄сенто, санта̄реси бахум̣ джанам̣.

112. ‘‘ахам̣ тена самайена, джат̣ило уггата̄пано;

дхунанто ва̄качӣра̄ни, гаччха̄ми амбаре тада̄.

113. ‘‘буддхасет̣т̣хасса упари, гантум̣ на висаха̄махам̣;

паккхӣва селама̄саджджа [селама̄паджджа (сйа̄.)], гаманам̣ на лабха̄махам̣.

114. ‘‘на ме идам̣ бхӯтапуббам̣, ирийасса викопанам̣;

даке йатха̄ уммуджджитва̄, евам̣ гаччха̄ми амбаре.

115. ‘‘ул̣а̄рабхӯто мануджо, хет̣т̣ха̄сӣно [хет̣т̣ха̄пи но (ка.)] бхависсати;

ханда менам̣ гавесиссам̣, апи аттхам̣ лабхеййахам̣.

116. ‘‘ороханто анталиккха̄, саддамассоси саттхуно;

аниччатам̣ катхентасса, тамахам̣ уггахим̣ тада̄.

117. ‘‘аниччасан̃н̃амуггайха, агама̄сим̣ мамассамам̣;

йа̄вата̄йум̣ васитва̄на, таттха ка̄лан̇като ахам̣.

118. ‘‘чариме ваттама̄намхи, там̣ дхаммасаванам̣ [дхаммасаван̣ам̣ (сӣ.)] сарим̣;

тена каммена сукатена, та̄ватим̣самагаччхахам̣.

119. ‘‘тим̣сакаппасахасса̄ни, девалоке рамим̣ ахам̣;

екапан̃н̃а̄саккхаттун̃ча, девараджджамака̄райим̣.

120. ‘‘екасаттатиккхаттун̃ча, чаккаваттӣ ахосахам̣;

падесараджджам̣ випулам̣, ган̣ана̄то асан̇кхийам̣.

121. ‘‘питугехе нисӣдитва̄, саман̣о бха̄витиндрийо;

га̄тха̄йа паридӣпенто, аниччатамуда̄хари [аниччаваттхуда̄хари (сйа̄. ка.)].

122. ‘‘ануссара̄ми там̣ сан̃н̃ам̣, сам̣саранто бхава̄бхаве;

на кот̣им̣ пат̣ивиджджха̄ми [на кочи пат̣иваджджа̄ми (ка.)], нибба̄нам̣ аччутам̣ падам̣ [айам̣ га̄тха̄ упари 43 вагге саттама̄пада̄не пуримага̄тха̄йа пуретарам̣ диссати].

123. ‘‘аничча̄ вата сан̇кха̄ра̄, уппа̄давайадхаммино;

уппаджджитва̄ нируджджханти, тесам̣ вӯпасамо сукхо.

124. ‘‘саха га̄тхам̣ сун̣итва̄на, пуббакаммам̣ ануссарим̣;

ека̄сане нисӣдитва̄, арахаттамапа̄пун̣им̣.

125. ‘‘джа̄тийа̄ саттавассохам̣, арахаттамапа̄пун̣им̣;

упасампа̄дайи буддхо, гун̣аман̃н̃а̄йа чаккхума̄.

126. ‘‘да̄ракова ахам̣ санто, каран̣ӣйам̣ сама̄пайим̣;

ким̣ ме каран̣ӣйам̣ аджджа, сакйапуттасса са̄сане.

127. ‘‘сатасахассито каппе, йам̣ каммамакарим̣ тада̄;

дуггатим̣ на̄бхиджа̄на̄ми, саддхаммасаване пхалам̣.

128. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ дхаммасаванийо тхеро има̄ га̄тха̄йо абха̄ситтха̄ти.

дхаммасаванийаттхерасса̄пада̄нам̣ навамам̣.