10. уккхиттападумийаттхераапада̄нам̣

129. ‘‘нагаре хам̣саватийа̄, ахосим̣ ма̄лико тада̄;

ога̄хетва̄ падумасарам̣, сатапаттам̣ очина̄махам̣.

130. ‘‘падумуттаро на̄ма джино, саббадхамма̄на па̄рагӯ;

саха сатасахассехи [сатасахассасиссехи (ка.)], сантачиттехи та̄дибхи.

131. ‘‘кхӣн̣а̄савехи суддхехи, чхал̣абхин̃н̃ехи джха̄йибхи [со тада̄ (сӣ.), со саха (ка.)];

мама вуддхим̣ саманвесам̣, а̄гаччхи мама сантикам̣ [мама сантике (сӣ.), пурисуттамо (сйа̄. ка.)].

132. ‘‘дисва̄нахам̣ девадевам̣, сайамбхум̣ локана̄йакам̣;

ван̣т̣е чхетва̄ сатапаттам̣, уккхипимамбаре тада̄.

133. ‘‘йади буддхо тувам̣ вӣра, локаджет̣т̣хо нара̄сабхо;

сайам̣ гантва̄ сатапатта̄, маттхаке дха̄райанту те.

134. ‘‘адхит̣т̣хахи маха̄вӣро, локаджет̣т̣хо нара̄сабхо;

буддхасса а̄нубха̄вена, маттхаке дха̄райим̣су те.

135. ‘‘тена каммена сукатена, четана̄пан̣идхӣхи ча;

джахитва̄ ма̄нусам̣ дехам̣, та̄ватим̣самагаччхахам̣.

136. ‘‘таттха ме сукатам̣ бйамхам̣, сатапаттанти вуччати;

сат̣т̣хийоджанамуббиддхам̣, тим̣сайоджанавиттхатам̣.

137. ‘‘сахассаккхаттум̣ девиндо, девараджджамака̄райим̣;

пан̃часаттатиккхаттун̃ча, чаккаваттӣ ахосахам̣.

138. ‘‘падесараджджам̣ випулам̣, ган̣ана̄то асан̇кхийам̣;

анубхоми сакам̣ каммам̣, пуббе сукатаматтано.

139. ‘‘теневекападумена, анубхотва̄на сампада̄;

готамасса бхагавато, дхаммам̣ саччхикарим̣ ахам̣.

140. ‘‘килеса̄ джха̄пита̄ майхам̣, бхава̄ саббе самӯхата̄;

на̄гова бандханам̣ чхетва̄, вихара̄ми ана̄саво.

141. ‘‘сатасахассито каппе, йам̣ пуппхамабхипӯджайим̣;

дуггатим̣ на̄бхиджа̄на̄ми, екападумассидам̣ пхалам̣.

142. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ уккхиттападумийо тхеро има̄ га̄тха̄йо абха̄ситтха̄ти.

уккхиттападумийаттхерасса̄пада̄нам̣ дасамам̣.

гандходакавагго чатутим̣сатимо.