35. екападумийавагго

1. екападумийаттхераапада̄нам̣

1. ‘‘падумуттаро на̄ма джино, саббадхамма̄на па̄рагӯ;

бхава̄бхаве вибха̄венто, та̄реси джанатам̣ бахум̣.

2. ‘‘хам̣сара̄джа̄ тада̄ хоми, диджа̄нам̣ паваро ахам̣;

джа̄тассарам̣ самогайха, кӣл̣а̄ми хам̣сакӣл̣итам̣.

3. ‘‘падумуттаро локавидӯ, а̄хутӣнам̣ пат̣иггахо;

джа̄тассарасса упари, а̄гаччхи та̄ваде джино.

4. ‘‘дисва̄нахам̣ девадевам̣, сайамбхум̣ локана̄йакам̣;

ван̣т̣е чхетва̄на падумам̣, сатапаттам̣ манорамам̣.

5. ‘‘мукхатун̣д̣ена паггайха, пасанно локана̄йаке [виппасаннена четаса̄ (сйа̄.)];

уккхипитва̄на гаган̣е [уккхипитва̄ нала̄т̣ена (ка.)], буддхасет̣т̣хам̣ апӯджайим̣.

6. ‘‘падумуттаро локавидӯ, а̄хутӣнам̣ пат̣иггахо;

анталиккхе т̣хито саттха̄, ака̄ ме анумоданам̣.

7. ‘‘‘имина̄ екападумена, четана̄пан̣идхӣхи ча;

каппа̄нам̣ сатасахассам̣, винипа̄там̣ на гаччхаси’.

8. ‘‘идам̣ ватва̄на самбуддхо, джаладжуттамана̄мако;

мама каммам̣ пакиттетва̄, агама̄ йена паттхитам̣.

9. ‘‘сатасахассито каппе, йам̣ каммамакарим̣ тада̄;

дуггатим̣ на̄бхиджа̄на̄ми, буддхапӯджа̄йидам̣ пхалам̣.

10. ‘‘пат̣исамбхида̄ чатассо, вимоккха̄пи ча ат̣т̣химе;

чхал̣абхин̃н̃а̄ саччхиката̄, катам̣ буддхасса са̄санам̣’’.

иттхам̣ судам̣ а̄йасма̄ екападумийо тхеро има̄ га̄тха̄йо абха̄ситтха̄ти.

екападумийаттхерасса̄пада̄нам̣ пат̣хамам̣.

2. тӣн̣уппалама̄лийаттхераапада̄нам̣

11. ‘‘чандабха̄га̄надӣтӣре, ахосим̣ ва̄наро тада̄;

аддасам̣ вираджам̣ буддхам̣, нисиннам̣ паббатантаре.

12. ‘‘обха̄сентам̣ диса̄ сабба̄, са̄лара̄джам̣ва пхуллитам̣;

лаккхан̣абйан̃джанӯпетам̣, дисва̄ аттамано ахум̣.

13. ‘‘удаггачитто сумано, пӣтийа̄ хат̣т̣хама̄насо;

тӣн̣и уппалапуппха̄ни, маттхаке абхиропайим̣.

14. ‘‘пуппха̄ни абхиропетва̄, випассисса махесино;

сага̄раво бхавитва̄на [гамитва̄на (сӣ.), намитва̄на (ка.)], пакка̄мим̣ уттара̄мукхо.

15. ‘‘гаччханто пат̣икут̣ико, виппасаннена четаса̄;

селантаре патитва̄на [папатитва̄ (сйа̄. ка.)], па̄пун̣им̣ джӣвитаккхайам̣.

16. ‘‘тена каммена сукатена, четана̄пан̣идхӣхи ча;

джахитва̄ ма̄нусам̣ дехам̣ [пуримам̣ джа̄тим̣ (?) упари 38 вагге татийа̄пада̄не евамева диссати], та̄ватим̣самагаччхахам̣.

17. ‘‘сата̄нам̣ тӣн̣иккхаттун̃ча, девараджджам̣ ака̄райим̣;

сата̄нам̣ пан̃чаккхаттун̃ча, чаккаваттӣ ахосахам̣.

18. ‘‘еканавутито каппе, йам̣ пуппхамабхипӯджайим̣;

дуггатим̣ на̄бхиджа̄на̄ми, буддхапӯджа̄йидам̣ пхалам̣.

19. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ тӣн̣уппалама̄лийо [тиуппалама̄лийо (сӣ.)] тхеро има̄ га̄тха̄йо абха̄ситтха̄ти.

тӣн̣уппалама̄лийаттхерасса̄пада̄нам̣ дутийам̣.

3. дхаджада̄йакаттхераапада̄нам̣

20. ‘‘тиссо на̄ма аху саттха̄, локаджет̣т̣хо нара̄сабхо;

тайопадхиккхайе [тассопадхиккхайе (сӣ.)] дисва̄, дхаджам̣ а̄ропитам̣ майа̄.

21. ‘‘тена каммена сукатена, четана̄пан̣идхӣхи ча;

джахитва̄ ма̄нусам̣ дехам̣, та̄ватим̣самагаччхахам̣.

22. ‘‘сата̄нам̣ тӣн̣иккхаттун̃ча, девараджджам̣ ака̄райим̣;

сата̄нам̣ пан̃чаккхаттун̃ча, чаккаваттӣ ахосахам̣.

23. ‘‘падесараджджам̣ випулам̣, ган̣ана̄то асан̇кхийам̣;

анубхоми сакам̣ каммам̣, пуббе сукатаматтано.

24. ‘‘двенавуте ито каппе, йам̣ каммамакарим̣ тада̄;

дуггатим̣ на̄бхиджа̄на̄ми, дхаджада̄нассидам̣ пхалам̣.

25. ‘‘иччхама̄но чахам̣ аджджа, сака̄нанам̣ сапаббатам̣;

кхомадуссена чха̄деййам̣, тада̄ майхам̣ кате пхалам̣.

26. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ дхаджада̄йако тхеро има̄ га̄тха̄йо абха̄ситтха̄ти.

дхаджада̄йакаттхерасса̄пада̄нам̣ татийам̣.

4. тикин̇кан̣ипӯджакаттхераапада̄нам̣

27. ‘‘химавантасса̄видӯре, бхӯтаган̣о на̄ма паббато;

таттхаддасам̣ пам̣сукӯлам̣, думаггамхи вилаггитам̣.

28. ‘‘тӣн̣и кин̇кан̣ипуппха̄ни, очинитва̄нахам̣ тада̄;

хат̣т̣хо хат̣т̣хена читтена, пам̣сукӯлам̣ апӯджайим̣.

29. ‘‘екаттим̣се ито каппе, йам̣ каммамакарим̣ тада̄;

дуггатим̣ на̄бхиджа̄на̄ми, тин̣н̣ам̣ пуппха̄нидам̣ пхалам̣.

30. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ тикин̇кан̣ипӯджако тхеро има̄ га̄тха̄йо абха̄ситтха̄ти.

тикин̇кан̣ипӯджакаттхерасса̄пада̄нам̣ чатуттхам̣.

5. нал̣а̄га̄рикаттхераапада̄нам̣

31. ‘‘химавантасса̄видӯре, ха̄рито на̄ма паббато;

сайамбхӯ на̄радо на̄ма, руккхамӯле васӣ тада̄.

32. ‘‘нал̣а̄га̄рам̣ каритва̄на, тин̣ена чха̄дайим̣ ахам̣;

чан̇камам̣ содхайитва̄на, сайамбхусса ада̄сахам̣.

33. ‘‘чатуддасасу каппесу, девалоке рамим̣ ахам̣;

чатусаттатиккхаттун̃ча, девараджджам̣ ака̄райим̣.

34. ‘‘чатусаттати [саттасаттати (сӣ.)] ккхаттун̃ча, чаккаваттӣ ахосахам̣;

падесараджджам̣ випулам̣, ган̣ана̄то асан̇кхийам̣.

35. ‘‘уббиддхам̣ бхаванам̣ майхам̣, индалат̣т̣хӣва уггатам̣;

сахассатхамбхам̣ атулам̣, вима̄нам̣ сапабхассарам̣.

36. ‘‘две сампаттӣ анубхотва̄, суккамӯлена чодито;

готамасса бхагавато, са̄сане паббаджим̣ ахам̣.

37. ‘‘падха̄напахитаттомхи, упасанто нирӯпадхи;

на̄гова бандханам̣ чхетва̄, вихара̄ми ана̄саво.

38. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ нал̣а̄га̄рико тхеро има̄ га̄тха̄йо абха̄ситтха̄ти.

нал̣а̄га̄рикаттхерасса̄пада̄нам̣ пан̃чамам̣.

6. чампакапуппхийаттхераапада̄нам̣

39. ‘‘химавантасса̄видӯре, джа̄пало [ча̄пало (сӣ.), чха̄пало (сйа̄.)] на̄ма паббато;

буддхо судассано на̄ма, виха̄си паббатантаре.

40. ‘‘пуппхам̣ хемавантам̣ [хемаватам̣ (сӣ.), хемаван̣н̣ам̣ (сйа̄.)] гайха, гаччхам̣ веха̄йасенахам̣;

аддасам̣ вираджам̣ буддхам̣, огхатин̣н̣амана̄савам̣.

41. ‘‘сатта чампакапуппха̄ни, сӣсе катва̄нахам̣ тада̄;

буддхасса абхиропесим̣, сайамбхусса махесино.

42. ‘‘екаттим̣се ито каппе, йам̣ пуппхамабхиропайим̣;

дуггатим̣ на̄бхиджа̄на̄ми, буддхапӯджа̄йидам̣ пхалам̣.

43. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ чампакапуппхийо тхеро има̄ га̄тха̄йо абха̄ситтха̄ти.

чампакапуппхийаттхерасса̄пада̄нам̣ чхат̣т̣хам̣.

7. падумапӯджакаттхераапада̄нам̣

44. ‘‘химавантасса̄видӯре, ромасо на̄ма паббато;

буддхопи самбхаво на̄ма, аббхока̄се васӣ тада̄.

45. ‘‘бхавана̄ никкхамитва̄на, падумам̣ дха̄райим̣ ахам̣;

ека̄хам̣ дха̄райитва̄на, пуна бхаванупа̄гамим̣.

46. ‘‘еканавутито каппе, йам̣ пуппхамабхиропайим̣;

дуггатим̣ на̄бхиджа̄на̄ми, буддхапӯджа̄йидам̣ пхалам̣.

47. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ падумапӯджако тхеро има̄ га̄тха̄йо абха̄ситтха̄ти.

падумапӯджакаттхерасса̄пада̄нам̣ саттамам̣.

терасамам̣ бха̄н̣ава̄рам̣.

8. тин̣амут̣т̣хида̄йакаттхераапада̄нам̣

48. ‘‘химавантасса̄видӯре, ламбако на̄ма паббато;

упатиссо на̄ма самбуддхо, аббхока̄самхи чан̇ками.

49. ‘‘мигалуддо тада̄ а̄сим̣, аран̃н̃е ка̄нане ахам̣;

дисва̄на там̣ девадевам̣, сайамбхум̣ апара̄джитам̣.

50. ‘‘виппасаннена читтена, тада̄ тасса махесино;

нисӣданаттхам̣ буддхасса, тин̣амут̣т̣химада̄сахам̣.

51. ‘‘датва̄на девадевасса, бхиййо читтам̣ паса̄дайим̣;

самбуддхам̣ абхива̄детва̄, пакка̄мим̣ уттара̄мукхо.

52. ‘‘ачирам̣ гатаматтам̣ мам̣, мигара̄джа̄ апотхайи [ахет̣хайи (сӣ. сйа̄.)];

сӣхена потхито [па̄тито (сӣ. сйа̄.)] санто, таттха ка̄лан̇като ахам̣.

53. ‘‘а̄санне ме катам̣ каммам̣, буддхасет̣т̣хе ана̄саве;

сумутто саравегова, девалокам̣ аган̃чхахам̣.

54. ‘‘йӯпо таттха субхо а̄си, пун̃н̃акамма̄бхиниммито;

сахассакан̣д̣о сатабхен̣д̣у, дхаджа̄лу харита̄майо.

55. ‘‘пабха̄ ниддха̄вате тасса, сатарам̣сӣва уггато;

а̄кин̣н̣о девакан̃н̃а̄хи, а̄модим̣ ка̄мака̄махам̣.

56. ‘‘девалока̄ чавитва̄на, суккамӯлена чодито;

а̄гантва̄на мануссаттам̣, паттомхи а̄саваккхайам̣.

57. ‘‘чатуннавутито каппе, нисӣданамада̄сахам̣;

дуггатим̣ на̄бхиджа̄на̄ми, тин̣амут̣т̣хийидам̣ пхалам̣.

58. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ тин̣амут̣т̣хида̄йако тхеро има̄ га̄тха̄йо абха̄ситтха̄ти.

тин̣амут̣т̣хида̄йакаттхерасса̄пада̄нам̣ ат̣т̣хамам̣.

9. тиндукапхалада̄йакаттхераапада̄нам̣

59. ‘‘кан̣ика̄рам̣ва джотантам̣, нисиннам̣ паббатантаре;

аддасам̣ вираджам̣ буддхам̣, огхатин̣н̣амана̄савам̣.

60. ‘‘тиндукам̣ сапхалам̣ дисва̄, бхиндитва̄на сакосакам̣ [сакот̣акам̣ (сӣ.), сакот̣икам̣ (сйа̄.)];

пасанначитто сумано, сайамбхусса мада̄сахам̣ [вессабхусса ада̄сахам̣ (сӣ.)].

61. ‘‘еканавутито каппе, йам̣ пхаламададим̣ тада̄;

дуггатим̣ на̄бхиджа̄на̄ми, пхалада̄нассидам̣ пхалам̣.

62. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ тиндукапхалада̄йако тхеро има̄ га̄тха̄йо абха̄ситтха̄ти.

тиндукапхалада̄йакаттхерасса̄пада̄нам̣ навамам̣.

10. екан̃джалийаттхераапада̄нам̣

63. ‘‘ромасо [ревато (сӣ.)] на̄ма самбуддхо, надӣкӯле васӣ тада̄;

аддасам̣ вираджам̣ буддхам̣, пӣтарам̣сим̣ва бха̄н̣умам̣.

64. ‘‘укка̄мукхапахат̣т̣хам̣ва, кхадиран̇га̄расаннибхам̣;

осадхим̣ва вирочантам̣, екан̃джалимака̄сахам̣.