8. сумана̄вел̣ийаттхераапада̄нам̣

64. ‘‘вессабхусса бхагавато, локаджет̣т̣хасса та̄дино;

саббе джана̄ сама̄гамма, маха̄пӯджам̣ каронти те.

65. ‘‘судха̄йа пин̣д̣ам̣ катва̄на, а̄вел̣ам̣ сумана̄йахам̣;

сӣха̄санасса пурато, абхиропесахам̣ тада̄.

66. ‘‘саббе джана̄ сама̄гамма, пеккханти пуппхамуттамам̣;

кенидам̣ пӯджитам̣ пуппхам̣, буддхасет̣т̣хасса та̄дино.

67. ‘‘тена читтаппаса̄дена, нимма̄нам̣ упападжджахам̣;

анубхоми [анубхосим̣ (сӣ.)] сакам̣ каммам̣, пуббе сукатаматтано.

68. ‘‘йам̣ йам̣ йонупападжджа̄ми, деваттам̣ атха ма̄нусам̣;

саббеса̄нам̣ пийо хоми, пуппхапӯджа̄йидам̣ пхалам̣.

69. ‘‘на̄бхиджа̄на̄ми ка̄йена, ва̄ча̄йа уда четаса̄;

сам̣йата̄нам̣ тапассӣнам̣, катам̣ аккоситам̣ майа̄.

70. ‘‘тена сучаритена̄хам̣, читтасса пан̣идхӣхи ча;

саббесам̣ пӯджито хоми, анаккосассидам̣ пхалам̣.

71. ‘‘ито ека̄дасе каппе, сахасса̄роси кхаттийо;

саттаратанасампанно, чаккаваттӣ махаббало.

72. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ сумана̄вел̣ийо тхеро има̄ га̄тха̄йо абха̄ситтха̄ти.

сумана̄вел̣ийаттхерасса̄пада̄нам̣ ат̣т̣хамам̣.