9. пуппхаччхаттийаттхераапада̄нам̣

73. ‘‘сиддхаттхасса бхагавато, локаджет̣т̣хасса та̄дино;

саччам̣ пака̄сайантасса, нибба̄пентасса па̄н̣ино.

74. ‘‘джаладжам̣ а̄харитва̄на, сатапаттам̣ манорамам̣;

пуппхасса чхаттам̣ катва̄на, буддхасса абхиропайим̣.

75. ‘‘сиддхаттхо ча локавидӯ, а̄хутӣнам̣ пат̣иггахо;

бхиккхусан̇гхе т̣хито саттха̄, имам̣ га̄тхам̣ абха̄сатха.

76. ‘‘‘йо ме читтам̣ паса̄детва̄, пуппхаччхаттам̣ адха̄райим̣;

тена читтаппаса̄дена, дуггатим̣ со на гаччхати’.

77. ‘‘идам̣ ватва̄на самбуддхо, сиддхаттхо локана̄йако;

уййоджетва̄на парисам̣, веха̄сам̣ набхамуггами.

78. ‘‘вут̣т̣хите нарадевамхи, сетаччхаттампи вут̣т̣хахи;

пурато буддхасет̣т̣хасса, гаччхати чхаттамуттамам̣.

79. ‘‘чатуннавутито каппе, йам̣ чхаттам̣ абхиропайим̣;

дуггатим̣ на̄бхиджа̄на̄ми, пуппхаччхаттассидам̣ пхалам̣.

80. ‘‘чатусаттатикаппамхи, ат̣т̣ха джаласикха̄ ахӯ;

саттаратанасампанна̄, чаккаваттӣ махаббала̄.

81. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ пуппхаччхаттийо тхеро има̄ га̄тха̄йо абха̄ситтха̄ти.

пуппхаччхаттийаттхерасса̄пада̄нам̣ навамам̣.