6. сампаса̄дакаттхераапада̄нам̣

24. ‘‘‘намо те буддха вӣраттху, виппамуттоси саббадхи;

бйасанамхи [бйасанам̣ хи (сӣ.)] ануппатто, тасса ме саран̣ам̣ бхава’.

25. ‘‘сиддхаттхо тасса бйа̄ка̄си, локе аппат̣ипуггало;

‘маходадхисамо сан̇гхо, аппамеййо ануттаро.

26. ‘‘‘таттха твам̣ вирадже кхетте, анантапхалада̄йаке;

сан̇гхе читтам̣ паса̄детва̄, субӣджам̣ ва̄па [ча̄пи (сӣ.), ва̄пи (сйа̄.)] ропайа.

27. ‘‘идам̣ ватва̄на саббан̃н̃ӯ, локаджет̣т̣хо нара̄сабхо;

мамева ануса̄ситва̄, веха̄сам̣ набхамуггами.

28. ‘‘ачирам̣ гатаматтамхи, саббан̃н̃умхи нара̄сабхе;

маран̣ам̣ самануппатто, туситам̣ упападжджахам̣.

29. ‘‘тада̄хам̣ вирадже кхетте, анантапхалада̄йаке;

сан̇гхе читтам̣ паса̄детва̄, каппам̣ саггамхи модахам̣.

30. ‘‘чатуннавутито каппе, паса̄дамалабхим̣ тада̄;

дуггатим̣ на̄бхиджа̄на̄ми, паса̄дасса идам̣ пхалам̣.

31. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ сампаса̄дако тхеро има̄ га̄тха̄йо абха̄ситтха̄ти.

сампаса̄дакаттхерасса̄пада̄нам̣ чхат̣т̣хам̣.