10. паббха̄рада̄йакаттхераапада̄нам̣

47. ‘‘пийадассино бхагавато, паббха̄ро содхито майа̄;

гхат̣акан̃ча упат̣т̣ха̄сим̣, парибхога̄йа та̄дино.

48. ‘‘там̣ ме буддхо вийа̄ка̄си, пийадассӣ маха̄муни;

сахассакан̣д̣о сатабхен̣д̣у [сатаген̣д̣у (сйа̄. ка.)], дхаджа̄лу харита̄майо.

49. ‘‘ниббаттиссати со йӯпо, ратанан̃ча анаппакам̣;

паббха̄рада̄нам̣ датва̄на, каппам̣ саггамхи модахам̣.

50. ‘‘ито ба̄ттим̣сакаппамхи, сусуддхо на̄ма кхаттийо;

саттаратанасампанно, чаккаваттӣ махаббало.

51. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ паббха̄рада̄йако тхеро има̄ га̄тха̄йо абха̄ситтха̄ти.

паббха̄рада̄йакаттхерасса̄пада̄нам̣ дасамам̣.

падумакесаравагго екатим̣сатимо.