8. аччекачӣварасиккха̄падаван̣н̣ана̄

646-9. тена самайена̄ти аччекачӣварасиккха̄падам̣. таттха даса̄ха̄на̄гатанти даса аха̄ни даса̄хам̣, тена даса̄хена ана̄гата̄ даса̄ха̄на̄гата̄, даса̄хена асампатта̄ти аттхо, там̣ даса̄ха̄на̄гатам̣, аччантасам̣йогавасена бхумматтхе упайогавачанам̣, теневасса падабха̄джане ‘‘даса̄ха̄на̄гата̄йа̄’’ти вуттам̣. пава̄ран̣а̄йа̄ти идам̣ пана йа̄ са̄ даса̄ха̄на̄гата̄ти вутта̄, там̣ сарӯпато дассетум̣ асаммохаттхам̣ анупайогавачанам̣.

каттикатема̄сикапун̣н̣аманти пат̣хамакаттикатема̄сикапун̣н̣амам̣. идха̄пи пат̣хамападасса анупайогатта̄ пуриманайенева бхумматтхе упайогавачанам̣. идам̣ вуттам̣ хоти – ‘‘‘йато пат̣т̣ха̄йа пат̣хамамаха̄пава̄ран̣а̄ даса̄ха̄на̄гата̄’ти вуччати, сачепи та̄ни диваса̄ни аччантамева бхиккхуно аччекачӣварам̣ уппаджджеййа, ‘аччекам̣ ида’нти джа̄нама̄нена бхиккхуна̄ саббампи пат̣иггахетабба’’нти. тена пава̄ран̣а̄ма̄сасса джун̣хапаккхапан̃чамито пат̣ха̄йа уппаннасса чӣварасса нидха̄нака̄ло дассито хоти. ка̄ман̃чеса ‘‘даса̄хапарамам̣ атирекачӣварам̣ дха̄ретабба’’нти имина̄ва сиддхо, аттхуппаттивасена пана апуббам̣ вийа аттхам̣ дассетва̄ сиккха̄падам̣ т̣хапитам̣.

аччекачӣваранти ачча̄йикачӣварам̣ вуччати, тасса пана ачча̄йикабха̄вам̣ дассетум̣ ‘‘сена̄йа ва̄ гантука̄мо хотӣ’’тиа̄ди вуттам̣. таттха саддха̄ти имина̄ саддха̄маттакамева дасситам̣. паса̄доти имина̄ суппасанна̄ балавасаддха̄. етам̣ аччекачӣварам̣ на̄ма̄ти етам̣ имехи ка̄ран̣ехи да̄тука̄мена дӯтам̣ ва̄ песетва̄ сайам̣ ва̄ а̄гантва̄ ‘‘васса̄ва̄сикам̣ дасса̄мӣ’’ти евам̣ а̄рочитам̣ чӣварам̣ аччекачӣварам̣ на̄ма хотӣ. чхат̣т̣хито пат̣т̣ха̄йа пана уппаннам̣ аначчекачӣварампи паччуддхаритва̄ т̣хапитачӣварампи етам̣ париха̄рам̣ лабхатийева.

сан̃н̃а̄н̣ам̣ катва̄ никкхипитаббанти кин̃чи нимиттам̣ катва̄ т̣хапетаббам̣. касма̄ етам̣ вуттам̣? йади хи там̣ пуре пава̄ран̣а̄йа вибхаджанти. йена гахитам̣, тена чхиннавассена на бхавитаббам̣. саче пана хоти, там̣ чӣварам̣ сан̇гхикамева хоти. тато саллаккхетва̄ сукхам̣ да̄тум̣ бхависсатӣти.

650. аччекачӣваре аччекачӣварасан̃н̃ӣти евама̄ди вибхаджитва̄ гахитамева сандха̄йа вуттам̣. саче пана авибхаттам̣ хоти, сан̇гхасса ва̄ бхан̣д̣а̄га̄ре, чӣварасамайа̄тиккамепи ана̄патти. ити атирекачӣварасса даса̄хам̣ париха̄ро. акатасса вассикаса̄т̣икачӣварасса анаттхате катхине пан̃ча ма̄са̄, вассе уккад̣д̣хите чха ма̄са̄, аттхате катхине апаре чатта̄ро ма̄са̄. хемантасса паччхиме дивасе мӯлачӣвара̄дхит̣т̣ха̄навасена апаропи еко ма̄соти ека̄даса ма̄са̄ париха̄ро. сатийа̄ пачча̄са̄йа мӯлачӣварасса еко ма̄со, аччекачӣварасса анаттхате катхине ека̄дасадиваса̄дхико ма̄со, аттхате катхине ека̄дасадиваса̄дхика̄ пан̃ча ма̄са̄, тато парам̣ екадивасампи париха̄ро наттхӣти ведитаббам̣.

аначчекачӣварети аччекачӣварасадисе ан̃н̃асмим̣. сесаметтха утта̄наттхамева̄ти.

катхинасамут̣т̣ха̄нам̣ – акирийам̣, носан̃н̃а̄вимоккхам̣, ачиттакам̣, пан̣н̣аттиваджджам̣, ка̄йакаммавачӣкаммам̣, тичиттам̣, тиведананти.

аччекачӣварасиккха̄падаван̣н̣ана̄ нит̣т̣хита̄.