7. маха̄песака̄расиккха̄падаван̣н̣ана̄

641. тена самайена̄ти маха̄песака̄расиккха̄падам̣. таттха суттам̣ дха̄райитва̄ти суттам̣ тулетва̄ палапариччхедам̣ катва̄. аппитанти гханам̣. сувӣтанти сут̣т̣ху вӣтам̣, саббат̣т̣ха̄несу самам̣ катва̄ вӣтам̣. суппава̄йитанти сут̣т̣ху пава̄йитам̣ саббат̣т̣ха̄несу самам̣ катва̄ танте паса̄ритам̣. сувилекхитанти лекханийа̄ сут̣т̣ху виликхитам̣. сувитаччхитанти коччхена сут̣т̣ху витаччхитам̣, суниддхотанти аттхо. пат̣ибаддханти векаллам̣. тантети танте дӣгхато паса̄ран̣ейева упанетва̄ти аттхо.

642. татра че со бхиккхӯти йатра га̄ме ва̄ нигаме ва̄ те тантава̄йа̄ татра. викаппам̣ а̄паджджеййа̄ти висит̣т̣хам̣ каппам̣ адхикавидха̄нам̣ а̄паджджеййа. па̄л̣ийам̣ пана йена̄ка̄рена викаппам̣ а̄панно хоти, там̣ дассетум̣ ‘‘идам̣ кхо, а̄вусо’’тиа̄ди вуттам̣.

дхаммампи бхан̣атӣти дхаммакатхампи катхети, ‘‘тасса вачанена а̄йатам̣ ва̄ виттхатам̣ ва̄ аппитам̣ ва̄’’ти суттавад̣д̣ханаа̄ка̄рамева дассети.

пуббе аппава̄ритоти чӣвараса̄микехи пуббе аппава̄рито хутва̄. сесам̣ утта̄наттхамева̄ти.

чхасамут̣т̣ха̄нам̣, кирийам̣, носан̃н̃а̄вимоккхам̣, ачиттакам̣, пан̣н̣аттиваджджам̣, ка̄йакаммавачӣкаммам̣,

тичиттам̣, тиведананти.

маха̄песака̄расиккха̄падаван̣н̣ана̄ нит̣т̣хита̄.