6. суттавин̃н̃аттисиккха̄падаван̣н̣ана̄

636. тена самайена̄ти суттавин̃н̃аттисиккха̄падам̣. таттха кхоманти кхомава̄кехи катасуттам̣. каппа̄сиканти каппа̄сато ниббаттам̣. косеййанти косийам̣сӯхи кантитва̄ катасуттам̣. камбаланти ел̣акаломасуттам̣. са̄н̣анти са̄н̣ава̄касуттам̣. бхан̇ганти па̄т̣еккам̣ ва̄касуттамева̄ти еке. етехи пан̃чахи миссетва̄ катасуттам̣ пана ‘‘бхан̇га’’нти ведитаббам̣.

ва̄йа̄пети пайоге пайоге дуккат̣анти саче тантава̄йасса туривема̄дӣни наттхи, та̄ни ‘‘аран̃н̃ато а̄харисса̄мӣ’’ти ва̄сим̣ ва̄ пхарасум̣ ва̄ нисети, тато пат̣т̣ха̄йа йам̣ йам̣ упакаран̣аттха̄йа ва̄ чӣварава̄йанаттха̄йа ва̄ кароти, саббаттха тантава̄йасса пайоге пайоге бхиккхусса дуккат̣ам̣. дӣгхато видаттхиматте тирийан̃ча хаттхаматте вӣте ниссаггийам̣ па̄читтийам̣. маха̄паччарийам̣ пана ‘‘йа̄ва парийоса̄нам̣ ва̄йа̄пентасса пхалаке пхалаке ниссаггийам̣ па̄читтийа’’нти вуттам̣. тампи идамева пама̄н̣ам̣ сандха̄йа вуттанти ведитаббам̣. викаппанупагапаччхиман̃хи чӣварасан̇кхйам̣ гаччхатӣти.

апичеттха евам̣ виниччхайо ведитаббо – суттам̣ та̄ва са̄мам̣ вин̃н̃а̄питам̣ акаппийам̣, сесам̣ н̃а̄така̄дивасена уппаннам̣ каппийам̣. тантава̄йопи ан̃н̃а̄такааппава̄рито вин̃н̃аттийа̄ ладдхо акаппийо, сесо каппийо. таттха акаппийасуттам̣ акаппийатантава̄йена ва̄йа̄пентасса пуббе вуттанайена ниссаггийам̣. тенева пана каппийасуттам̣ ва̄йа̄пентасса йатха̄ пуббе ниссаггийам̣, евам̣ дуккат̣ам̣. тенева каппийам̣ акаппийан̃ча суттам̣ ва̄йа̄пентасса йади паччхимачӣвараппама̄н̣ена еко париччхедо суддхакаппийасуттамайо, еко акаппийасуттамайоти евам̣ кеда̄рабаддхам̣ вийа чӣварам̣ хоти, акаппийасуттамайе париччхеде па̄читтийам̣, итарасмим̣ татхева дуккат̣ам̣. йади тато ӯнапариччхеда̄ хонти, антамасо аччхиман̣д̣алаппама̄н̣а̄пи, саббапариччхедесу париччхедаган̣ана̄йа дуккат̣ам̣. атха екантарикена ва̄ суттена дӣгхато ва̄ каппийам̣ тирийам̣ акаппийам̣ катва̄ вӣтам̣ хоти, пхалаке пхалаке дуккат̣ам̣. каппийатантава̄йенапи акаппийасуттам̣ ва̄йа̄пентасса йатха̄ пуббе ниссаггийам̣, евам̣ дуккат̣ам̣. тенева каппийан̃ча акаппийан̃ча суттам̣ ва̄йа̄пентасса саче паччхимачӣвараппама̄н̣а̄ ӯнака̄ ва̄ акаппийасуттапариччхеда̄ хонти, тесу париччхедаган̣ана̄йа дуккат̣ам̣. каппийасуттапариччхедесу ана̄патти. атха екантарикена ва̄ суттена дӣгхато ва̄ каппийам̣ тирийам̣ акаппийам̣ катва̄ вӣтам̣ хоти, пхалаке пхалаке дуккат̣ам̣.

йади пана две тантава̄йа̄ хонти, еко каппийо еко акаппийо, суттан̃ча акаппийам̣, те че ва̄рена винанти, акаппийатантава̄йена вӣте пхалаке пхалаке па̄читтийам̣, ӯнатаре дуккат̣ам̣. итарена вӣте убхайаттха дуккат̣ам̣. саче двепи вемам̣ гахетва̄ екато винанти, пхалаке пхалаке па̄читтийам̣. атха суттам̣ каппийам̣, чӣваран̃ча кеда̄рабаддха̄дӣхи сапариччхедам̣, акаппийатантава̄йена вӣте париччхеде париччхеде дуккат̣ам̣, итарена вӣте ана̄патти. саче двепи вемам̣ гахетва̄ екато винанти, пхалаке пхалаке дуккат̣ам̣. атха суттампи каппийан̃ча акаппийан̃ча, те че ва̄рена винанти, акаппийатантава̄йена акаппийасуттамайесу паччхимачӣвараппама̄н̣есу париччхедесу вӣтесу париччхедаган̣ана̄йа па̄читтийам̣. ӯнакатаресу каппийасуттамайесу ча дуккат̣ам̣. каппийатантава̄йена акаппийасуттамайесу пама̄н̣айуттесу ва̄ ӯнакесу ва̄ дуккат̣амева. каппийасуттамайесу ана̄патти.

атха екантарикена ва̄ суттена дӣгхато ва̄ акаппийам̣ тирийам̣ каппийам̣ катва̄ винанти, убхопи ва̄ те вемам̣ гахетва̄ екато винанти, апариччхеде чӣваре пхалаке пхалаке дуккат̣ам̣, сапариччхеде париччхедавасена дуккат̣а̄нӣти. айам̣ пана аттхо маха̄ат̣т̣хакатха̄йам̣ апа̄кат̣о, маха̄паччарийа̄дӣсу па̄кат̣о. идха сабба̄ка̄ренева па̄кат̣о.

саче суттампи каппийам̣, тантава̄йопи каппийо н̃а̄такаппава̄рито ва̄ мӯлена ва̄ пайоджито, ва̄йа̄панапаччайа̄ ана̄патти. даса̄ха̄тиккаманапаччайа̄ пана а̄паттим̣ раккхантена викаппанупагаппама̄н̣аматте вӣте танте т̣хитам̣йева адхит̣т̣ха̄таббам̣. даса̄ха̄тиккамена нит̣т̣ха̄пийама̄нан̃хи ниссаггийам̣ бхавеййа̄ти. н̃а̄така̄дӣхи тантам̣ а̄ропетва̄ ‘‘тумха̄кам̣, бханте, идам̣ чӣварам̣ ган̣хеййа̄тха̄’’ти ниййа̄титепи есева найо.

саче тантава̄йо евам̣ пайоджито ва̄ сайам̣ да̄тука̄мо ва̄ хутва̄ ‘‘ахам̣, бханте, тумха̄кам̣ чӣварам̣ асукадивасе на̄ма ва̄йитва̄ т̣хапесса̄мӣ’’ти вадати, бхиккху ча тена париччхиннадивасато даса̄хам̣ атикка̄мети, ниссаггийам̣ па̄читтийам̣.

саче пана тантава̄йо ‘‘ахам̣ тумха̄кам̣ чӣварам̣ ва̄йитва̄ са̄санам̣ песесса̄мӣ’’ти ватва̄ татхева кароти, тена песитабхиккху пана тасса бхиккхуно на а̄рочети, ан̃н̃о дисва̄ ва̄ сутва̄ ва̄ ‘‘тумха̄кам̣, бханте, чӣварам̣ нит̣т̣хита’’нти а̄рочети, етасса а̄рочанам̣ на пама̄н̣ам̣. йада̄ пана тена песитойева а̄рочети, тасса вачанам̣ сутадивасато пат̣т̣ха̄йа даса̄хам̣ атикка̄майато ниссаггийам̣ па̄читтийам̣.

саче тантава̄йо ‘‘ахам̣ тумха̄кам̣ чӣварам̣ ва̄йитва̄ кассачи хаттхе пахин̣исса̄мӣ’’ти ватва̄ татхева кароти, чӣварам̣ гахетва̄ гатабхиккху пана аттано паривен̣е т̣хапетва̄ тасса на а̄рочети, ан̃н̃о кочи бхан̣ати ‘‘апи, бханте, адхуна̄ а̄бхатам̣ чӣварам̣ сундара’’нти? ‘‘кухим̣, а̄вусо, чӣвара’’нти? ‘‘иттханна̄масса хаттхе песита’’нти. етассапи вачанам̣ на пама̄н̣ам̣. йада̄ пана со бхиккху чӣварам̣ дети, ладдхадивасато пат̣т̣ха̄йа даса̄хам̣ атикка̄майато ниссаггийам̣ па̄читтийам̣. саче пана ва̄йа̄панамӯлам̣ адиннам̣ хоти, йа̄ва ка̄кан̣икаматтампи авасит̣т̣хам̣, та̄ва раккхати.

640. ана̄патти чӣварам̣ сиббетунти чӣварасиббанаттха̄йа суттам̣ вин̃н̃а̄пентасса ана̄паттӣти аттхо. а̄йогетиа̄дӣсупи нимиттаттхе бхуммавачанам̣, а̄йога̄динимиттам̣ вин̃н̃а̄пентасса ана̄паттӣти вуттам̣ хоти. сесаметтха утта̄наттхамева̄ти.

чхасамут̣т̣ха̄нам̣, кирийам̣, носан̃н̃а̄вимоккхам̣, ачиттакам̣, пан̣н̣аттиваджджам̣, ка̄йакаммавачӣкаммам̣, тичиттам̣, тиведананти.

суттавин̃н̃аттисиккха̄падаван̣н̣ана̄ нит̣т̣хита̄.