5. чӣварааччхинданасиккха̄падаван̣н̣ана̄

631. тена самайена̄ти чӣварааччхинданасиккха̄падам̣. таттха йампи тйа̄ханти йампи те ахам̣. со кира ‘‘мама паттачӣвараупа̄ханапаччаттхаран̣а̄ни ваханто майа̄ саддхим̣ ча̄рикам̣ паккамиссатӣ’’ти ада̄си. теневама̄ха. аччхиндӣти балакка̄рена аггахеси, сакасан̃н̃а̄йа гахитатта̄ панасса па̄ра̄джикам̣ наттхи, киламетва̄ гахитатта̄ а̄патти пан̃н̃атта̄.

633. сайам̣ аччхиндати ниссаггийам̣ па̄читтийанти екам̣ чӣварам̣ ека̄баддха̄ни ча бахӯни аччхиндато ека̄ а̄патти. екато абаддха̄ни висум̣ висум̣ т̣хита̄ни ча бахӯни аччхиндато ‘‘сан̇гха̄т̣им̣ а̄хара, уттара̄сан̇гам̣ а̄хара̄’’ти евам̣ а̄хара̄пайато ча ваттхуган̣ана̄йа а̄паттийо. ‘‘майа̄ динна̄ни сабба̄ни а̄хара̄’’ти вадатопи екавачаненева самбахула̄ а̄паттийо.

ан̃н̃ам̣ а̄н̣а̄пети а̄патти дуккат̣асса̄ти ‘‘чӣварам̣ ган̣ха̄’’ти а̄н̣а̄пети, екам̣ дуккат̣ам̣. а̄н̣атто бахӯни ган̣ха̄ти, екам̣ па̄читтийам̣ ‘‘сан̇гха̄т̣им̣ ган̣ха, уттара̄сан̇гам̣ ган̣ха̄’’ти вадато ва̄ча̄йа ва̄ча̄йа дуккат̣ам̣. ‘‘майа̄ динна̄ни сабба̄ни ган̣ха̄’’ти вадато екава̄ча̄йа самбахула̄ а̄паттийо.

634. ан̃н̃ам̣ париккха̄ранти викаппанупагапаччхимачӣварам̣ т̣хапетва̄ йам̣ кин̃чи антамасо сӯчимпи. вет̣хетва̄ т̣хапитасӯчӣсупи ваттхуган̣ана̄йа дуккат̣а̄ни. ситхилавет̣хита̄су евам̣. га̄л̣хам̣ катва̄ баддха̄су пана екамева дуккат̣анти маха̄паччарийам̣ вуттам̣. сӯчигхаре паккхитта̄супи есева найо. тхавика̄йа паккхипитва̄ ситхилабаддха га̄л̣хабаддхесу тикат̣ука̄дӣсу бхесаджджесупи есева найо.

635. со ва̄ детӣти ‘‘бханте, тумха̄кам̣йева идам̣ са̄руппа’’нти евам̣ ва̄ дети, атха ва̄ пана ‘‘а̄вусо, майам̣ туйхам̣ ‘ваттапат̣ипаттим̣ кариссати, амха̄кам̣ сантике упаджджхам̣ ган̣хиссати, дхаммам̣ парийа̄пун̣иссатӣ’ти чӣварам̣ адамха, со да̄ни твам̣ на ваттам̣ кароси, на упаджджхам̣ ган̣ха̄си, на дхаммам̣ парийа̄пун̣а̄сӣ’’ти евама̄дӣни вутто ‘‘бханте, чӣвараттха̄йа ман̃н̃е бхан̣атха, идам̣ во чӣвара’’нти дети, евампи со ва̄ дети. диса̄паккантам̣ ва̄ пана дахарам̣ ‘‘ниваттетха на’’нти бхан̣ати, со на ниваттати. чӣварам̣ гахетва̄ рундхатха̄ти, евам̣ че ниваттати, са̄дху. саче ‘‘паттачӣвараттха̄йа ман̃н̃е тумхе бхан̣атха, ган̣хатха на’’нти дети. евампи со ва̄ дети, виббхантам̣ ва̄ дисва̄ ‘‘майам̣ туйхам̣ ‘ваттам̣ кариссатӣ’ти паттачӣварам̣ адамха, со да̄ни твам̣ виббхамитва̄ чарасӣ’’ти вадати. итаро ‘‘ган̣хатха тумха̄кам̣ паттачӣвара’’нти дети, евампи со ва̄ дети. ‘‘мама сантике упаджджхам̣ ган̣хантассева деми, ан̃н̃аттха ган̣хантасса на деми. ваттам̣ каронтассева деми, акаронтасса на деми, дхаммам̣ парийа̄пун̣антассева деми, апарийа̄пун̣антасса на деми, авиббхамантассева деми, виббхамантасса на демӣ’’ти евам̣ пана да̄тум̣ на ват̣т̣ати, дадато дуккат̣ам̣. а̄хара̄петум̣ пана ват̣т̣ати. чаджитва̄ диннам̣ аччхиндитва̄ ган̣ханто бхан̣д̣аггхена ка̄ретаббо. сесаметтха утта̄намева̄ти.

тисамут̣т̣ха̄нам̣ – ка̄йачиттато ва̄ча̄читтато ка̄йава̄ча̄читтато ча самут̣т̣ха̄ти, кирийам̣, сан̃н̃а̄вимоккхам̣, сачиттакам̣, локаваджджам̣, ка̄йакаммавачӣкаммам̣, акусалачиттам̣, дуккхаведананти.

чӣварааччхинданасиккха̄падаван̣н̣ана̄ нит̣т̣хита̄.