10. парин̣атасиккха̄падаван̣н̣ана̄

657. тена самайена̄ти парин̣атасиккха̄падам̣. таттха пӯгасса̄ти самӯхасса; дхаммаган̣асса̄ти аттхо. пат̣ийаттанти пат̣ийа̄дитам̣. бахӯ сан̇гхасса бхатта̄ти сан̇гхасса бахӯни бхатта̄ни анека̄ни ла̄бхамукха̄ни; на сан̇гхасса кеначи париха̄нӣти дӣпенти. он̣оджетха̄ти детха. ким̣ паневам̣ ваттум̣ ват̣т̣атӣти касма̄ на ват̣т̣ати? айан̃хи абхихат̣абхиккха̄ абхихаритва̄ екасмим̣ ока̄се сан̇гхассаттха̄йа пат̣ийатта̄ абхихат̣апат̣ийатте ча уддисса т̣хапитабха̄ге ча пайуттава̄ча̄ на̄ма наттхи.

658. сан̇гхиканти сан̇гхасса сантакам̣. со хи сан̇гхасса парин̣ататта̄ хаттхам̣ ана̄рӯл̣хопи екена парийа̄йена сан̇гхасса сантако хоти, падабха̄джане пана ‘‘сан̇гхикам̣ на̄ма сан̇гхасса диннам̣ хоти париччатта’’нти евам̣ аттхуддха̄равасена ниппарийа̄йатова сан̇гхикам̣ дасситам̣. ла̄бханти пат̣илабхитаббаваттхум̣ а̄ха. теневасса ниддесе ‘‘чӣварампӣ’’тиа̄ди вуттам̣. парин̣атанти сан̇гхасса ниннам̣ сан̇гхасса пон̣ам̣ сан̇гхасса паббха̄рам̣ хутва̄ т̣хитам̣. йена пана ка̄ран̣ена со парин̣ато хоти, там̣ дассетум̣ ‘‘дасса̄ма карисса̄ма̄ти ва̄ча̄ бхинна̄ хотӣ’’ти падабха̄джанам̣ вуттам̣.

659. пайоге дуккат̣анти парин̣атала̄бхасса аттано парин̣а̄манапайоге дуккат̣ам̣, пат̣ила̄бхена тасмим̣ хаттхам̣ а̄рӯл̣хе ниссаггийам̣. саче пана сан̇гхасса диннам̣ хоти, там̣ гахетум̣ на ват̣т̣ати, сан̇гхассева да̄таббам̣. йопи а̄ра̄микехи саддхим̣ екато кха̄дати, бхан̣д̣ам̣ аггха̄петва̄ ка̄ретаббо. парин̣атам̣ пана сахадхаммика̄нам̣ ва̄ гихӣнам̣ ва̄ антамасо ма̄тусантакампи ‘‘идам̣ майхам̣ дехӣ’’ти сан̇гхасса парин̣атабха̄вам̣ н̃атва̄ аттано парин̣а̄метва̄ ган̣хантасса ниссаггийам̣ па̄читтийам̣. ‘‘имасса бхиккхуно дехӣ’’ти евам̣ ан̃н̃асса парин̣а̄ментасса суддхикапа̄читтийам̣. екам̣ паттам̣ ва̄ чӣварам̣ ва̄ аттано, екам̣ ан̃н̃асса парин̣а̄мети, ниссаггийам̣ па̄читтийан̃чева суддхикапа̄читтийан̃ча. есева найо бахӯсу. вуттампи четам̣ –

‘‘ниссаггийена а̄паттим̣, суддхикена па̄читтийам̣;

а̄паджджеййа екато;

пан̃ха̄ меса̄ кусалехи чинтита̄’’ти. (пари. 480);

айан̃хи парин̣а̄манам̣ сандха̄йа вутто. йопи вассикаса̄т̣икасамайе ма̄тугхарепи сан̇гхасса парин̣атам̣ вассикаса̄т̣икам̣ н̃атва̄ аттано парин̣а̄мети, ниссаггийам̣ па̄читтийам̣. парасса парин̣а̄мети, суддхикапа̄читтийам̣. манусса̄ ‘‘сан̇гхабхаттам̣ карисса̄ма̄’’ти саппитела̄дӣни а̄харанти, гила̄но чепи бхиккху сан̇гхасса парин̣атабха̄вам̣ н̃атва̄ кин̃чи йа̄чати, ниссаггийам̣ па̄читтийамева. саче пана со ‘‘тумха̄кам̣ саппиа̄дӣни а̄бхат̣а̄ни аттхӣ’’ти пуччхитва̄ ‘‘а̄ма, аттхӣ’’ти вутте ‘‘майхампи детха̄’’ти вадати, ват̣т̣ати. атха̄пи нам̣ куккучча̄йантам̣ упа̄сака̄ ваданти – ‘‘сан̇гхопи амхехи диннамева лабхати; ган̣хатха, бханте’’ти евампи ват̣т̣ати.

660. сан̇гхасса парин̣атам̣ ан̃н̃асан̇гхасса̄ти екасмим̣ виха̄ре сан̇гхасса парин̣атам̣ ан̃н̃ам̣ виха̄рам̣ уддиситва̄ ‘‘асукасмим̣ на̄ма маха̄виха̄ре сан̇гхасса детха̄’’ти парин̣а̄мети.

четийасса ва̄ти ‘‘ким̣ сан̇гхасса диннена, четийассапӯджам̣ каротха̄’’ти евам̣ четийасса ва̄ парин̣а̄мети.

четийасса парин̣атанти еттха нийаметва̄ ан̃н̃ачетийассаттха̄йа ропитама̄ла̄ваччхато ан̃н̃ачетийамхи пуппхампи а̄ропетум̣ на ват̣т̣ати. екасса четийасса пана чхаттам̣ ва̄ пат̣а̄кам̣ ва̄ а̄ропетва̄ т̣хитам̣ дисва̄ сесам̣ ан̃н̃асса четийасса да̄петум̣ ват̣т̣ати.

пуггаласса парин̣атанти антамасо сунакхасса̄пи парин̣атам̣ ‘‘имасса сунакхасса ма̄ дехи, етасса дехӣ’’ти евам̣ ан̃н̃апуггаласса парин̣а̄мети, дуккат̣ам̣. саче пана да̄йака̄ ‘‘майам̣ сан̇гхасса бхаттам̣ да̄тука̄ма̄, четийасса пӯджам̣ ка̄тука̄ма̄, екасса бхиккхуно париккха̄рам̣ да̄тука̄ма̄, тумха̄кам̣ ручийа̄ дасса̄ма; бхан̣атха, каттха дема̄’’ти ваданти. евам̣ вутте тена бхиккхуна̄ ‘‘йаттха иччхатха, таттха детха̄’’ти ваттабба̄. саче пана кевалам̣ ‘‘каттха дема̄’’ти пуччханти, па̄л̣ийам̣ а̄гатанайенева ваттаббам̣. сесаметтха утта̄наттхамева.

тисамут̣т̣ха̄нам̣ – ка̄йачиттато ва̄ча̄читтато ка̄йава̄ча̄читтато ча самут̣т̣ха̄ти, кирийам̣, сан̃н̃а̄вимоккхам̣, сачиттакам̣, локаваджджам̣, ка̄йакаммавачӣкаммам̣, акусалачиттам̣, тиведананти.

самантапа̄са̄дика̄йа винайасам̣ван̣н̣ана̄йа

парин̣атасиккха̄падаван̣н̣ана̄ нит̣т̣хита̄.

нит̣т̣хито паттавагго татийо.

ниссаггийаван̣н̣ана̄ нит̣т̣хита̄.

па̄ра̄джикакан̣д̣а-ат̣т̣хакатха̄ нит̣т̣хита̄.