9. рӯпийасам̣воха̄расиккха̄падаван̣н̣ана̄

587. тена самайена̄ти рӯпийасам̣воха̄расиккха̄падам̣. таттха на̄наппака̄раканти ката̄ката̄дивасена анекавидхам̣. рӯпийасам̣воха̄ранти джа̄тарӯпараджатапариваттанам̣. сама̄паджджантӣти пат̣иггахан̣ассева пат̣иккхитатта̄ пат̣иггахитапариваттане досам̣ апассанта̄ каронти.

589. сӣсӯпагантиа̄дӣсу сӣсам̣ упагаччхатӣти сӣсӯпагам̣, поттхакесу пана ‘‘сӣсӯпака’’нти ликхитам̣, йасса кассачи сӣса̄лан̇ка̄рассетам̣ адхивачанам̣. еса найо саббаттха. катена катантиа̄дӣсу суддхо рӯпийасам̣воха̄ройева.

рӯпийе рӯпийасан̃н̃ӣтиа̄димхи пуримасиккха̄паде вуттаваттхӯсу ниссаггийаваттхуна̄ ниссаггийаваттхум̣ чета̄пентасса мӯлаггахан̣е пуримасиккха̄падена ниссаггийам̣ па̄читтийам̣, апара̄парапариваттане имина̄ ниссаггийапа̄читтийамева. ниссаггийаваттхуна̄ дуккат̣аваттхум̣ ва̄ каппийаваттхум̣ ва̄ чета̄пентассапи есева найо. йо хи айам̣ арӯпийе рӯпийасан̃н̃ӣ рӯпийам̣ чета̄петӣтиа̄ди дутийо тико вутто, тасса̄нуломатта̄ авуттопи айамапаропи рӯпийе рӯпийасан̃н̃ӣ арӯпийам̣ чета̄петӣтиа̄ди тико ведитаббо. аттано ва̄ хи арӯпийена парасса рӯпийам̣ чета̄пеййа аттано ва̄ рӯпийена парасса арӯпийам̣, убхайатха̄пи рӯпийасам̣воха̄ро катойева хоти, тасма̄ па̄л̣ийам̣ екантена рӯпийапаккхе екойева тико вуттоти.

дуккат̣аваттхуна̄ пана ниссаггийаваттхум̣ чета̄пентасса мӯлаггахан̣е пуримасиккха̄падена дуккат̣ам̣, паччха̄ париваттане имина̄ ниссаггийам̣ па̄читтийам̣, гарукасса чета̄питатта̄. дуккат̣аваттхуна̄ дуккат̣аваттхумева, каппийаваттхум̣ ва̄ чета̄пентасса мӯлаггахан̣е пуримасиккха̄падена дуккат̣ам̣, паччха̄ париваттанепи имина̄ дуккат̣амева. касма̄? акаппийаваттхуна̄ чета̄питатта̄. андхакат̣т̣хакатха̄йам̣ пана ‘‘саче кайавиккайам̣ сама̄паджджеййа, ниссаггийам̣ па̄читтийа’’нти бха̄ситам̣, там̣ дуббха̄ситам̣. касма̄? на хи да̄наггахан̣ато ан̃н̃о кайавиккайо на̄ма аттхи, кайавиккайасиккха̄падан̃ча каппийаваттхуна̄ каппийаваттхупариваттанамева сандха̄йа вуттам̣, тан̃ча кхо ан̃н̃атра сахадхаммикехи. идам̣ сиккха̄падам̣ рӯпийена ча рӯпийа̄рӯпийачета̄панам̣ арӯпийена ча рӯпийачета̄панам̣. дуккат̣аваттхуна̄ пана дуккат̣аваттхуно чета̄панам̣ нева идха на таттха па̄л̣ийам̣ вуттам̣, на четтха ана̄патти бхавитум̣ арахати. тасма̄ йатхева дуккат̣аваттхуно пат̣иггахан̣е дуккат̣ам̣, татхева тасса ва̄ тена ва̄ чета̄панепи дуккат̣ам̣ йуттанти бхагавато адхиппа̄йан̃н̃ӯхи вуттам̣.

каппийаваттхуна̄ пана ниссаггийаваттхум̣ чета̄пентасса мӯлаггахан̣е пуримасиккха̄падена ана̄патти, паччха̄ париваттане имина̄ ниссаггийам̣ па̄читтийам̣. вуттан̃хетам̣ – ‘‘арӯпийе арӯпийасан̃н̃ӣ рӯпийам̣ чета̄пети ниссаггийам̣ па̄читтийа’’нти. тенева каппийаваттхуна̄ дуккат̣аваттхум̣ чета̄пентасса мӯлапат̣иггахан̣е татхева ана̄патти, паччха̄ париваттане имина̄ дуккат̣ам̣. касма̄? акаппийасса чета̄питатта̄. каппийаваттхуна̄ пана каппийаваттхум̣ ан̃н̃атра сахадхаммикехи чета̄пентасса мӯлаггахан̣е пуримасиккха̄падена ана̄патти, паччха̄ париваттане упари кайавиккайасиккха̄падена ниссаггийам̣ па̄читтийам̣. кайавиккайам̣ мочетва̄ ган̣хантасса упарисиккха̄паденапи ана̄патти, вад̣д̣хим̣ пайоджентасса дуккат̣ам̣.

имасса ча рӯпийасам̣воха̄расса гарукабха̄вадӣпакам̣ идам̣ паттачатуккам̣ ведитаббам̣. йо хи рӯпийам̣ угган̣хитва̄ тена айабӣджам̣ самут̣т̣ха̄пети, там̣ кот̣т̣а̄петва̄ тена лохена паттам̣ ка̄рети, айам̣ патто маха̄акаппийо на̄ма, на сакка̄ кеначи упа̄йена каппийо ка̄тум̣. саче хи там̣ вина̄сетва̄ тха̄лакам̣ ка̄рети, тампи акаппийам̣. ва̄сим̣ ка̄рети, та̄йа чхиннам̣ дантакат̣т̣хампи акаппийам̣. бал̣исам̣ ка̄роти, тена ма̄рита̄ маччха̄пи акаппийа̄. ва̄сипхалам̣ та̄петва̄ удакам̣ ва̄ кхӣрам̣ ва̄ ун̣ха̄пети, тампи акаппийамева.

йо пана рӯпийам̣ угган̣хитва̄ тена паттам̣ кин̣а̄ти, айампи патто акаппийо. ‘‘пан̃чаннампи сахадхаммика̄нам̣ на каппатӣ’’ти маха̄паччарийам̣ вуттам̣. сакка̄ пана каппийо ка̄тум̣, со хи мӯле мӯласа̄мика̄нам̣ патте ча паттаса̄мика̄нам̣ динне каппийо хоти. каппийабхан̣д̣ам̣ датва̄ гахетва̄ парибхун̃джитум̣ ват̣т̣ати.

йопи рӯпийам̣ угган̣ха̄петва̄ каппийака̄ракена саддхим̣ камма̄ракулам̣ гантва̄ паттам̣ дисва̄ ‘‘айам̣ майхам̣ руччатӣ’’ти вадати. каппийака̄рако ча там̣ рӯпийам̣ датва̄ камма̄рам̣ сан̃н̃а̄пети, айампи патто каппийавоха̄рена гахитопи дутийапаттасадисойева, мӯласса сампат̣иччхитатта̄ акаппийо. касма̄ сеса̄нам̣ на каппатӣти? мӯласса аниссат̣т̣хатта̄.

йо пана рӯпийам̣ асампат̣иччхитва̄ ‘‘тхерасса паттам̣ кин̣итва̄ дехӣ’’ти пахитакаппийака̄ракена саддхим̣ камма̄ракулам̣ гантва̄ паттам̣ дисва̄ ‘‘име каха̄пан̣е гахетва̄ имам̣ дехӣ’’ти каха̄пан̣е да̄петва̄ гахито, айам̣ патто етассева бхиккхуно на ват̣т̣ати дуббича̄ритатта̄, ан̃н̃есам̣ пана ват̣т̣ати, мӯласса асампат̣иччхитатта̄.

маха̄суматтхерасса кира упаджджха̄йо ануруддхаттхеро на̄ма ахоси. со аттано еварӯпам̣ паттам̣ сапписса пӯретва̄ сан̇гхасса ниссаджджи. типит̣акачӯл̣ана̄гаттхерассапи саддхивиха̄рика̄нам̣ еварӯпо патто ахоси. там̣ тхеропи сапписса пӯра̄петва̄ сан̇гхасса ниссаджджа̄песӣти. идам̣ акаппийапаттачатуккам̣.

саче пана рӯпийам̣ асампат̣иччхитва̄ ‘‘тхерасса паттам̣ кин̣итва̄ дехӣ’’ти пахитакаппийака̄ракена саддхим̣ камма̄ракулам̣ гантва̄ паттам̣ дисва̄ ‘‘айам̣ майхам̣ руччатӣ’’ти ва̄ ‘‘има̄хам̣ гахесса̄мӣ’’ти ва̄ вадати, каппийака̄рако ча там̣ рӯпийам̣ датва̄ камма̄рам̣ сан̃н̃а̄пети, айам̣ патто саббакаппийо буддха̄нампи парибхога̄рахоти.

591. арӯпийе рӯпийасан̃н̃ӣти кхарапатта̄дӣсу суван̣н̣а̄дисан̃н̃ӣ. а̄патти дуккат̣асса̄ти саче тена арӯпийам̣ чета̄пети дуккат̣а̄патти хоти. еса найо вематике. арӯпийасан̃н̃исса пана пан̃чахи сахадхаммикехи саддхи ‘‘идам̣ гахетва̄ идам̣ детха̄’’ти кайавиккайам̣ каронтасса̄пи ана̄патти. сесам̣ утта̄намева.

чхасамут̣т̣ха̄нам̣, кирийам̣, носан̃н̃а̄вимоккхам̣, ачиттакам̣, пан̣н̣аттиваджджам̣, ка̄йакаммавачӣкаммам̣, тичиттам̣, тиведананти.

рӯпийасам̣воха̄расиккха̄падаван̣н̣ана̄ нит̣т̣хита̄.