10. кайавиккайасиккха̄падаван̣н̣ана̄

593. тена самайена̄ти кайавиккайасиккха̄падам̣. таттха кати хипи тйа̄йанти кати те айам̣, хика̄ро панеттха падапӯран̣о, пика̄ро гараха̄йам̣, айам̣ дуббаласан̇гха̄т̣и тава кати диваса̄ни бхависсатӣти аттхо. атха ва̄ катихампи тйа̄йантипи па̄т̣хо. таттха катиханти кати аха̄ни, кати диваса̄нӣти вуттам̣ хоти. сесам̣ вуттанайамева. катихипи мйа̄йанти идампи етенева найена ведитаббам̣. гихӣпи нам̣ гихисса̄ти еттха нанти на̄маттхе нипа̄то, гихӣ на̄ма гихисса̄ти вуттам̣ хоти.

594. на̄наппака̄раканти чӣвара̄дӣнам̣ каппийабхан̣д̣а̄нам̣ васена анекавидхам̣. теневасса падабха̄джане чӣварам̣ а̄дим̣ катва̄ дасикасуттапарийоса̄нам̣ каппийабхан̣д̣амева дасситам̣. акаппийабхан̣д̣апариваттанан̃хи кайавиккайасан̇гахам̣ на гаччхати. кайавиккайанти кайан̃чева виккайан̃ча. ‘‘имина̄ имам̣ дехӣ’’тиа̄дина̄ хи найена парасса каппийабхан̣д̣ам̣ ган̣ханто кайам̣ сама̄паджджати, аттано каппийабхан̣д̣ам̣ денто виккайам̣.

595. аджджха̄чаратӣти абхибхавитва̄ чарати, вӣтиккамава̄чам̣ бха̄сатӣти аттхо. йато кайитан̃ча хоти виккайитан̃ча̄ти йада̄ кайитан̃ча хоти парабхан̣д̣ам̣ аттано хаттхагатам̣ каронтена, виккӣтан̃ча аттано бхан̣д̣ам̣ парахаттхагатам̣ каронтена. ‘‘имина̄ има’’нтиа̄дивачана̄нурӯпато пана па̄т̣хе пат̣хамам̣ аттано бхан̣д̣ам̣ дасситам̣.

ниссаджджитаббанти евам̣ парасса хаттхато кайавасена гахитакаппийабхан̣д̣ам̣ ниссаджджитаббам̣. айан̃хи кайавиккайо т̣хапетва̄ пан̃ча сахадхаммике авасесехи гихипаббаджитехи антамасо ма̄та̄питӯхипи саддхим̣ на ват̣т̣ати.

татра̄йам̣ виниччхайо – ваттхена ва̄ ваттхам̣ хоту бхаттена ва̄ бхаттам̣, йам̣ кин̃чи каппийам̣ ‘‘имина̄ имам̣ дехӣ’’ти вадати, дуккат̣ам̣. евам̣ ватва̄ ма̄туйа̄пи аттано бхан̣д̣ам̣ дети, дуккат̣ам̣. ‘‘имина̄ имам̣ дехӣ’’ти вутто ва̄ ‘‘имам̣ дехи, имам̣ те дасса̄мӣ’’ти ватва̄ ва̄ ма̄туйа̄пи бхан̣д̣ам̣ аттана̄ ган̣ха̄ти, дуккат̣ам̣. аттано бхан̣д̣е парахаттхам̣ парабхан̣д̣е ча аттано хаттхам̣ сампатте ниссаггийам̣. ма̄тарам̣ пана питарам̣ ва̄ ‘‘имам̣ дехӣ’’ти вадато вин̃н̃атти на хоти. ‘‘имам̣ ган̣ха̄хӣ’’ти вадато саддха̄деййавинипа̄танам̣ на хоти. ан̃н̃а̄такам̣ ‘‘имам̣ дехӣ’’ти вадато вин̃н̃атти хоти. ‘‘имам̣ ган̣ха̄хӣ’’ти вадато саддха̄деййавинипа̄танам̣ хоти. ‘‘имина̄ имам̣ дехӣ’’ти кайавиккайам̣ а̄паджджато ниссаггийам̣. тасма̄ каппийабхан̣д̣ам̣ париваттентена ма̄та̄питӯхипи саддхим̣ кайавиккайам̣ ан̃н̃а̄такехи саддхим̣ тиссо а̄паттийо мочентена париваттетаббам̣.

татра̄йам̣ париваттанавидхи – бхиккхусса па̄тхеййатан̣д̣ула̄ хонти, со антара̄магге бхаттахаттхам̣ пурисам̣ дисва̄ ‘‘амха̄кам̣ тан̣д̣ула̄ аттхи, на ча но имехи аттхо, бхаттена пана аттхо’’ти вадати. пурисо тан̣д̣уле гахетва̄ бхаттам̣ дети, ват̣т̣ати. тиссопи а̄паттийо на хонти. антамасо нимиттакаммаматтампи на хоти. касма̄? мӯласса аттхита̄йа. парато ча вуттамева ‘‘идам̣ амха̄кам̣ аттхи, амха̄кан̃ча имина̄ ча имина̄ ча аттхоти бхан̣атӣ’’ти. йо пана евам̣ акатва̄ ‘‘имина̄ имам̣ дехӣ’’ти париваттети; йатха̄ваттхукамева. вигха̄са̄дам̣ дисва̄ ‘‘имам̣ оданам̣ бхун̃джитва̄, раджанам̣ ва̄ да̄рӯни ва̄ а̄хара̄’’ти вадати, раджаначхаллиган̣ана̄йа да̄руган̣ана̄йа ча ниссаггийа̄ни хонти. ‘‘имам̣ оданам̣ бхун̃джитва̄ идам̣ на̄ма каротха̄’’ти дантака̄ра̄дӣхи сиппикехи дхамакаран̣а̄дӣсу там̣ там̣ париккха̄рам̣ ка̄рети, раджакехи ва̄ ваттхам̣ дхова̄пети; йатха̄ваттхукамева. нха̄питена кесе чхинда̄пети, каммака̄рехи навакаммам̣ ка̄рети; йатха̄ваттхукамева. саче пана ‘‘идам̣ бхаттам̣ бхун̃джитва̄ идам̣ каротха̄’’ти на вадати ‘‘идам̣ бхаттам̣ бхун̃джа бхуттоси бхун̃джиссаси, идам̣ на̄ма карохӣ’’ти вадати, ват̣т̣ати. еттха ча кин̃ча̄пи ваттхадховане ва̄ кесаччхедане ва̄ бхӯмисодхана̄динавакамме ва̄ парабхан̣д̣ам̣ аттано хаттхагатам̣ ниссаджджитаббам̣ на̄ма наттхи. маха̄ат̣т̣хакатха̄йам̣ пана дал̣хам̣ катва̄ вуттатта̄ на сакка̄ етам̣ пат̣иккхипитум̣, тасма̄ йатха̄ ниссаггийаваттхумхи парибхутте ва̄ нат̣т̣хе ва̄ па̄читтийам̣ десети, евамидха̄пи десетаббам̣.

596. кайавиккайе кайавиккайасан̃н̃ӣтиа̄димхи йо кайавиккайам̣ сама̄паджджати, со тасмим̣ кайавиккайасан̃н̃ӣ ва̄ бхавату вематико ва̄, на кайавиккайасан̃н̃ӣ ва̄ ниссаггийапа̄читтийамева. чӯл̣аттике двӣсу падесу дуккат̣амева̄ти еваматтхо дат̣т̣хаббо.

597. аггхам̣ пуччхатӣти ‘‘айам̣ тава патто ким̣ аггхатӣ’’ти пуччхати. ‘‘идам̣ на̄ма̄’’ти вутте пана саче тасса каппийабхан̣д̣ам̣ махаггхам̣ хоти, еван̃ча нам̣ пат̣ивадати ‘‘упа̄сака, мама идам̣ ваттху махаггхам̣, тава паттам̣ ан̃н̃асса дехӣ’’ти. там̣ сутва̄ итаро ‘‘ан̃н̃ам̣ тха̄лакампи дасса̄мӣ’’ти вадати ган̣хитум̣ ват̣т̣ати, ‘‘идам̣ амха̄кам̣ аттхӣ’’ти вутталаккхан̣е патати. саче со патто махаггхо, бхиккхуно ваттху аппаггхам̣, паттаса̄мико часса аппаггхабха̄вам̣ на джа̄на̄ти, патто на гахетаббо, ‘‘мама ваттху аппаггха’’нти а̄чиккхитаббам̣. махаггхабха̄вам̣ н̃атва̄ ван̃четва̄ ган̣ханто хи гахитабхан̣д̣ам̣ аггха̄петва̄ ка̄ретаббатам̣ а̄паджджати. саче паттаса̄мико ‘‘хоту, бханте, сесам̣ мама пун̃н̃ам̣ бхависсатӣ’’ти дети, ват̣т̣ати.

каппийака̄ракасса а̄чиккхатӣти йасса хаттхато бхан̣д̣ам̣ ган̣ха̄ти, там̣ т̣хапетва̄ ан̃н̃ам̣ антамасо тасса путтабха̄тикампи каппийака̄ракам̣ катва̄ ‘‘имина̄ имам̣ на̄ма гахетва̄ дехӣ’’ти а̄чиккхати. со че чхеко хоти, пунаппунам̣ апанетва̄ вивадитва̄ ган̣ха̄ти, тун̣хӣбхӯтена т̣ха̄таббам̣. но че чхеко хоти, на джа̄на̄ти гахетум̣, ва̄н̣иджако там̣ ван̃чети, ‘‘ма̄ ган̣ха̄’’ти ваттаббо.

идам̣ амха̄кантиа̄димхи ‘‘идам̣ пат̣иггахитам̣ телам̣ ва̄ саппи ва̄ амха̄кам̣ аттхи, амха̄кан̃ча ан̃н̃ена аппат̣иггахитакена аттхо’’ти бхан̣ати. саче со там̣ гахетва̄ ан̃н̃ам̣ дети, пат̣хамам̣ аттано телам̣ на мина̄петаббам̣. касма̄? на̄л̣ийан̃хи авасит̣т̣хателам̣ хоти, там̣ паччха̄ минантасса аппат̣иггахитакам̣ дӯсеййа̄ти. сесам̣ утта̄намева.

чхасамут̣т̣ха̄нам̣, кирийам̣, носан̃н̃а̄вимоккхам̣, ачиттакам̣, пан̣н̣аттиваджджам̣, ка̄йакаммавачӣкаммам̣, тичиттам̣, тиведананти.

кайавиккайасиккха̄падаван̣н̣ана̄ нит̣т̣хита̄.

нит̣т̣хито косийавагго дутийо.