7. татуттарисиккха̄падаван̣н̣ана̄

522-4. тена самайена̄ти татуттарисиккха̄падам̣. таттха абхихат̣т̣хунти абхӣти упасагго, харитунти аттхо, ган̣хитунти вуттам̣ хоти. пава̄реййа̄ти иччха̄пеййа, иччхам̣ ручим̣ уппа̄деййа, вадеййа нимантеййа̄ти аттхо. абхихат̣т̣хум̣ пава̄рентена пана йатха̄ ваттаббам̣, там̣ а̄ка̄рам̣ дассетум̣ ‘‘йа̄ватакам̣ иччхаси та̄ватакам̣ ган̣ха̄хӣ’’ти евамасса падабха̄джанам̣ вуттам̣. атха ва̄ йатха̄ ‘‘неккхаммам̣ дат̣т̣ху кхемато’’ти (су. ни. 426, 1104; чӯл̣ани. джатукан̣н̣има̄н̣авапуччха̄ниддеса 67) еттха дисва̄ти аттхо, евамидха̄пи ‘‘абхиат̣т̣хум̣ пава̄реййа̄’’ти абхихаритва̄ пава̄реййа̄ти аттхо. таттха ка̄йа̄бхиха̄ро ва̄ча̄бхиха̄роти дувидхо абхиха̄ро, ка̄йена ва̄ хи ваттха̄ни абхихаритва̄ па̄дамӯле т̣хапетва̄ ‘‘йаттакам̣ иччхаси таттакам̣ ган̣ха̄хӣ’’ти ваданто пава̄реййа, ва̄ча̄йа ва̄ ‘‘амха̄кам̣ дуссакот̣т̣ха̄га̄рам̣ парипун̣н̣ам̣, йаттакам̣ иччхаси таттакам̣ ган̣ха̄хӣ’’ти ваданто пава̄реййа, тадубхайампи екаджджхам̣ катва̄ ‘‘абхихат̣т̣хум̣ пава̄реййа̄’’ти вуттам̣.

сантаруттарапараманти саантарам̣ уттарам̣ парамам̣ асса чӣварасса̄ти сантаруттарапарамам̣, нива̄санена саддхим̣ па̄рупанам̣ уккат̣т̣хапариччхедо асса̄ти вуттам̣ хоти. тато чӣварам̣ са̄дитаббанти тато абхихат̣ачӣварато еттакам̣ чӣварам̣ гахетаббам̣, на ито паранти аттхо. йасма̄ пана аччхиннасаббачӣварена тичӣварикенева бхиккхуна̄ евам̣ пат̣ипаджджитаббам̣, ан̃н̃ена ан̃н̃атха̄пи, тасма̄ там̣ вибха̄гам̣ дассетум̣ ‘‘саче тӣн̣и нат̣т̣ха̄ни хонтӣ’’тиа̄дина̄ найенасса падабха̄джанам̣ вуттам̣.

татра̄йам̣ виниччхайо – йасса тӣн̣и нат̣т̣ха̄ни, тена две са̄дитабба̄ни, екам̣ нива̄сетва̄ екам̣ па̄рупитва̄ ан̃н̃ам̣ сабха̄гат̣т̣ха̄нато парийесиссати. йасса две нат̣т̣ха̄ни, тена екам̣ са̄дитаббам̣. саче пакатийа̄ва сантаруттарена чарати, две са̄дитабба̄ни. евам̣ екам̣ са̄дийантенева само бхависсати. йасса тӣсу екам̣ нат̣т̣хам̣, на са̄дитаббам̣. йасса пана двӣсу екам̣ нат̣т̣хам̣, екам̣ са̄дитаббам̣. йасса екам̣йева хоти, тан̃ча нат̣т̣хам̣, две са̄дитабба̄ни. бхиккхунийа̄ пана пан̃часупи нат̣т̣хесу две са̄дитабба̄ни. чатӯсу нат̣т̣хесу екам̣ са̄дитаббам̣, тӣсу нат̣т̣хесу кин̃чи на са̄дитаббам̣, ко пана ва̄до двӣсу ва̄ екасмим̣ ва̄. йена кеначи хи сантаруттарапарамата̄йа т̣ха̄таббам̣, тато уттари на лаббхатӣти идаметтха лаккхан̣ам̣.

526. сесакам̣ а̄харисса̄мӣти две чӣвара̄ни катва̄ сесам̣ пуна а̄харисса̄мӣти аттхо. на аччхиннака̄ран̣а̄ти ба̄хусачча̄дигун̣авасена денти. н̃а̄така̄нантиа̄дӣсу н̃а̄така̄нам̣ дента̄нам̣ са̄дийантасса пава̄рита̄нам̣ дента̄нам̣ са̄дийантасса аттано дханена са̄дийантасса ана̄паттӣти аттхо. ат̣т̣хакатха̄су пана ‘‘н̃а̄такапава̄ритат̣т̣ха̄не пакатийа̄ бахумпи ват̣т̣ати, аччхиннака̄ран̣а̄ пама̄н̣амева ват̣т̣атӣ’’ти вуттам̣. там̣ па̄л̣ийа̄ на самети. йасма̄ панидам̣ сиккха̄падам̣ ан̃н̃ассаттха̄йа вин̃н̃а̄панаваттхусмим̣йева пан̃н̃аттам̣, тасма̄ идха ‘‘ан̃н̃ассаттха̄йа̄’’ти на вуттам̣. сесам̣ утта̄наттхамева.

самут̣т̣ха̄на̄дӣсу идампи чхасамут̣т̣ха̄нам̣, кирийам̣, носан̃н̃а̄вимоккхам̣, ачиттакам̣, пан̣н̣аттиваджджам̣, ка̄йакаммавачӣкаммам̣, тичиттам̣, тиведананти.

татуттарисиккха̄падаван̣н̣ана̄ нит̣т̣хита̄.