8. пат̣хамаупаккхат̣асиккха̄падаван̣н̣ана̄

527. тена самайена̄ти упаккхат̣асиккха̄падам̣. таттха аттха̄вусо мам̣ со упат̣т̣ха̄коти а̄вусо, йам̣ твам̣ бхан̣аси, аттхи еварӯпо со мама упат̣т̣ха̄коти айаметтха аттхо. апи меййа евам̣ хотӣти апи ме аййа евам̣ хоти, апи маййа̄ евантипи па̄т̣хо.

528-9. бхиккхум̣ панева уддисса̄ти еттха уддисса̄ти ападисса а̄раббха. йасма̄ пана йам̣ уддисса упаккхат̣ам̣ хоти, там̣ тассаттха̄йа упаккхат̣ам̣ на̄ма хоти. тасма̄сса падабха̄джане ‘‘бхиккхуссаттха̄йа̄’’ти вуттам̣.

бхиккхум̣ а̄рамман̣ам̣ каритва̄ти бхиккхум̣ паччайам̣ катва̄, йан̃хи бхиккхум̣ уддисса упаккхат̣ам̣, там̣ нийаменева бхиккхум̣ паччайам̣ катва̄ упаккхат̣ам̣ хоти, тена вуттам̣ – ‘‘бхиккхум̣ а̄рамман̣ам̣ каритва̄’’ти. паччайопи хи ‘‘лабхати ма̄ро а̄рамман̣а’’нтиа̄дӣсу (сам̣. ни. 4.243) а̄рамман̣анти а̄гато. ида̄ни ‘‘уддисса̄’’ти еттха йо катта̄, тасса а̄ка̄радассанаттхам̣ ‘‘бхиккхум̣ аччха̄детука̄мо’’ти вуттам̣. бхиккхум̣ аччха̄детука̄мена хи тена там̣ уддисса упаккхат̣ам̣, на ан̃н̃ена ка̄ран̣ена. ити со аччха̄детука̄мо хоти. тена вуттам̣ – ‘‘бхиккхум̣ аччха̄детука̄мо’’ти.

ан̃н̃а̄такасса гахапатисса ва̄ти ан̃н̃а̄такена гахапатина̄ ва̄ти аттхо. каран̣аттхе хи идам̣ са̄мивачанам̣. падабха̄джане пана бйан̃джанам̣ авича̄ретва̄ аттхаматтамева дассетум̣ ‘‘ан̃н̃а̄тако на̄ма…пе… гахапати на̄ма̄’’тиа̄ди вуттам̣.

чӣварачета̄паннанти чӣварамӯлам̣, там̣ пана йасма̄ хиран̃н̃а̄дӣсу ан̃н̃атарам̣ хоти, тасма̄ падабха̄джане ‘‘хиран̃н̃ам̣ ва̄’’тиа̄ди вуттам̣. упаккхат̣ам̣ хотӣти саджджитам̣ хоти, сам̣харитва̄ т̣хапитам̣, йасма̄ пана ‘‘хиран̃н̃ам̣ ва̄’’тиа̄дина̄ вачаненасса упаккхат̣абха̄во дассито хоти, тасма̄ ‘‘упаккхат̣ам̣ на̄ма̄’’ти падам̣ уддхаритва̄ висум̣ падабха̄джанам̣ на вуттам̣. имина̄ти упаккхат̣ам̣ сандха̄йа̄ха, теневасса падабха̄джане ‘‘паччупат̣т̣хитена̄’’ти вуттам̣. йан̃хи упаккхат̣ам̣ сам̣харитва̄ т̣хапитам̣, там̣ паччупат̣т̣хитам̣ хотӣти. аччха̄десса̄мӣти воха̄равачанаметам̣ ‘‘иттханна̄масса бхиккхуно дасса̄мӣ’’ти айам̣ панеттха аттхо. теневасса падабха̄джанепи ‘‘дасса̄мӣ’’ти вуттам̣.

татра че со бхиккхӯти йатра со гахапати ва̄ гахапата̄нӣ ва̄ татра со бхиккху пуббе аппава̄рито упасан̇камитва̄ чӣваре викаппам̣ а̄паджджеййа чети айаметтха падасамбандхо. таттха упасан̇камитва̄ти имасса гантва̄ти имина̄ва аттхе сиддхе пачуравоха̄равасена ‘‘гхара’’нти вуттам̣. йатра пана со да̄йако татра гантва̄ти айамеветтха аттхо, тасма̄ пунапи вуттам̣ ‘‘йаттха каттхачи упасан̇камитва̄’’ти. викаппам̣ а̄паджджеййа̄ти висит̣т̣хакаппам̣ адхикавидха̄нам̣ а̄паджджеййа, падабха̄джане пана йена̄ка̄рена викаппам̣ а̄панно хоти тамева дассетум̣ ‘‘а̄йатам̣ ва̄’’тиа̄ди вуттам̣. са̄дхӯти а̄йа̄чане нипа̄то. вата̄ти паривитакке. манти атта̄нам̣ ниддисати. а̄йасма̄ти парам̣ а̄лапати а̄мантети. йасма̄ панидам̣ саббам̣ бйан̃джанаматтамева, утта̄наттхамева, тасма̄сса падабха̄джане аттхо на вутто. калйа̄н̣акамйатам̣ упа̄да̄йа̄ти сундарака̄матам̣ висит̣т̣хака̄матам̣ читтена гахетва̄, тасса ‘‘а̄паджджеййа че’’ти имина̄ самбандхо. йасма̄ пана йо калйа̄н̣акамйатам̣ упа̄да̄йа а̄паджджати, со са̄дхаттхико махаггхаттхико хоти, тасма̄сса падабха̄джане бйан̃джанам̣ паха̄йа адхиппетаттхамева дассетум̣ тадева вачанам̣ вуттам̣. йасма̄ пана на имасса а̄паджджанаматтенева а̄патти сӣсам̣ ети, тасма̄ ‘‘тасса вачанена̄’’тиа̄ди вуттам̣.

531. ана̄патти н̃а̄така̄нантиа̄дӣсу н̃а̄така̄нам̣ чӣваре викаппам̣ а̄паджджантасса ана̄паттӣти еваматтхо дат̣т̣хаббо. махаггхам̣ чета̄петука̄масса аппаггхам̣ чета̄петӣти гахапатисса вӣсатиаггханакам̣ чӣварам̣ чета̄петука̄масса ‘‘алам̣ майхам̣ етена, дасаггханакам̣ ва̄ ат̣т̣хаггханакам̣ ва̄ дехӣ’’ти вадати ана̄патти. аппаггханти идан̃ча атиреканива̄ран̣аттхамева вуттам̣, самакепи пана ана̄патти, тан̃ча кхо аггхавасенева на пама̄н̣авасена, аггхавад̣д̣ханакан̃хи идам̣ сиккха̄падам̣. тасма̄ йо вӣсатиаггханакам̣ антарава̄сакам̣ чета̄петука̄мо, ‘‘там̣ еттакамева ме аггханакам̣ чӣварам̣ дехӣ’’ти ваттумпи ват̣т̣ати. сесам̣ утта̄наттхамева.

самут̣т̣ха̄на̄дӣнипи татуттарисиккха̄падасадиса̄нева̄ти.

пат̣хамаупаккхат̣асиккха̄падаван̣н̣ана̄ нит̣т̣хита̄.