3. татийакатхинасиккха̄падаван̣н̣ана̄

497. тена самайена̄ти татийакатхинасиккха̄падам̣. таттха усса̄петва̄ пунаппунам̣ вимаджджатӣти ‘‘валӣсу нат̣т̣ха̄су идам̣ махантам̣ бхависсатӣ’’ти ман̃н̃ама̄но удакена син̃читва̄ па̄дехи аккамитва̄ хаттхехи усса̄петва̄ уккхипитва̄ пит̣т̣хийам̣ гхам̣сати, там̣ а̄тапе суккхам̣ пат̣хамаппама̄н̣амева хоти. со пунапи татха̄ кароти, тена вуттам̣ – ‘‘усса̄петва̄ пунаппунам̣ вимаджджатӣ’’ти. там̣ евам̣ киламантам̣ бхагава̄ гандхакут̣ийам̣ нисиннова дисва̄ никкхамитва̄ сена̄санача̄рикам̣ а̄хин̣д̣анто вийа таттха агама̄си. тена вуттам̣ – ‘‘аддаса кхо бхагава̄’’тиа̄ди.

499-500. ека̄дасама̄сети екам̣ паччхимакаттикама̄сам̣ т̣хапетва̄ сесе ека̄дасама̄се. саттама̄сети каттикама̄сам̣ хемантике ча чатта̄роти пан̃чама̄се т̣хапетва̄ сесе саттама̄се. ка̄лепи а̄дисса диннанти сан̇гхасса ва̄ ‘‘идам̣ ака̄лачӣвара’’нти уддиситва̄ диннам̣, екапуггаласса ва̄ ‘‘идам̣ туйхам̣ даммӣ’’ти диннам̣.

сан̇гхато ва̄ти аттано паттабха̄гавасена сан̇гхато ва̄ уппаджджеййа. ган̣ато ва̄ти идам̣ суттантикаган̣асса дема, идам̣ а̄бхидхаммикаган̣асса̄ти евам̣ ган̣асса денти. тато аттано паттабха̄гавасена ган̣ато ва̄ уппаджджеййа.

но часса па̄рипӯрӣти но че па̄рипӯрӣ бхавеййа, йаттакена кайирама̄нам̣ адхит̣т̣ха̄начӣварам̣ пахоти, тан̃че чӣварам̣ таттакам̣ на бхавеййа, ӯнакам̣ бхавеййа̄ти аттхо.

пачча̄са̄ хоти сан̇гхато ва̄тиа̄дӣсу асукадивасам̣ на̄ма сан̇гхо чӣвара̄ни лабхиссати, ган̣о лабхиссати, тато ме чӣварам̣ уппаджджиссатӣти евам̣ сан̇гхато ва̄ ган̣ато ва̄ пачча̄са̄ хоти. н̃а̄такехи ме чӣвараттха̄йа песитам̣, миттехи песитам̣, те а̄гата̄ чӣваре дассантӣти евам̣ н̃а̄тито ва̄ миттато ва̄ пачча̄са̄ хоти. пам̣сукӯлам̣ ва̄ти еттха пана пам̣сукӯлам̣ ва̄ лаччха̄мӣти евам̣ пачча̄са̄ хотӣти йоджетаббам̣. аттано ва̄ дханена̄ти аттано каппа̄сасутта̄дина̄ дханена, асукадивасам̣ на̄ма лаччха̄мӣти евам̣ ва̄ пачча̄са̄ хотӣти аттхо.

тато че уттари никкхипеййа сатийа̄пи пачча̄са̄йа̄ти ма̄сапарамато че уттари никкхипеййа, ниссаггийам̣ па̄читтийанти аттхо. евам̣ пана аватва̄ йасма̄ антара̄ уппаджджама̄не пачча̄са̄чӣваре мӯлачӣварасса уппаннадивасато йа̄ва вӣсатимо дивасо та̄ва уппаннам̣ пачча̄са̄чӣварам̣ мӯлачӣварам̣ аттано гатикам̣ кароти, тато уддхам̣ мӯлачӣварам̣ пачча̄са̄чӣварам̣ аттано гатикам̣ кароти. тасма̄ там̣ висесам̣ дассетум̣ ‘‘тадахуппанне мӯлачӣваре’’тиа̄дина̄ найена падабха̄джанам̣ вуттам̣, там̣ утта̄наттхамева.

висабха̄ге уппанне мӯлачӣварети йади мӯлачӣварам̣ сан̣хам̣, пачча̄са̄чӣварам̣ тхӯлам̣, на сакка̄ йоджетум̣. раттийо ча сеса̄ хонти, на та̄ва ма̄со пӯрати, на ака̄ма̄ ниггахена чӣварам̣ ка̄ретаббам̣. ан̃н̃ам̣ пачча̄са̄чӣварам̣ лабхитва̄йева ка̄лаббхантаре ка̄ретаббам̣. пачча̄са̄чӣварампи париккха̄рачол̣ам̣ адхит̣т̣ха̄таббам̣. атха мӯлачӣварам̣ тхӯлам̣ хоти, пачча̄са̄чӣварам̣ сан̣хам̣, мӯлачӣварам̣ париккха̄рачол̣ам̣ адхит̣т̣хахитва̄ пачча̄са̄чӣварамева мӯлачӣварам̣ катва̄ т̣хапетаббам̣. там̣ пуна ма̄сапариха̄рам̣ лабхати, етенупа̄йена йа̄ва иччхати та̄ва ан̃н̃аман̃н̃ам̣ мӯлачӣварам̣ катва̄ т̣хапетум̣ ват̣т̣атӣти. сесам̣ утта̄намева.

самут̣т̣ха̄на̄дӣни пат̣хамакатхинасадиса̄нева̄ти.

татийакатхинасиккха̄падаван̣н̣ана̄ нит̣т̣хита̄.