10. дасамасиккха̄падаван̣н̣ана̄

835. дасаме – йам̣кин̃чи наччанти нат̣а̄дайо ва̄ наччанту сон̣д̣а̄ ва̄, антамасо морасувамаккат̣а̄дайопи, саббампетам̣ наччамева. йам̣кин̃чи гӣтанти йам̣кин̃чи нат̣а̄дӣнам̣ ва̄ гӣтам̣ хоту, арийа̄нам̣ паринибба̄нака̄ле ратанаттайагун̣ӯпасам̣хитам̣ са̄дхукӣл̣итагӣтам̣ ва̄ асам̣йатабхиккхӯнам̣ дхаммабха̄н̣акагӣтам̣ ва̄, саббампетам̣ гӣтамева. йам̣кин̃чи ва̄дитанти тантибаддха̄дива̄данӣйабхан̣д̣ава̄дитам̣ ва̄ хоту, кут̣абхерива̄дитам̣ ва̄, антамасо удакабхерива̄дитампи, саббампетам̣ ва̄дитамева.

836. дассана̄йа гаччхати а̄патти дуккат̣асса̄ти падава̄раган̣ана̄йа а̄патти дуккат̣асса. йаттха т̣хита̄ пассати ва̄ сун̣а̄ти ва̄ти екапайогена олокентӣ пассати, тесам̣йева гӣтава̄дитам̣ сун̣а̄ти, екамева па̄читтийам̣. саче пана екам̣ дисам̣ олокетва̄ наччам̣ пассати, пуна ан̃н̃ато олокетва̄ га̄йанте пассати ан̃н̃ато ва̄денте, па̄т̣екка̄ а̄паттийо. бхиккхунӣ сайампи наччитум̣ ва̄ га̄йитум̣ ва̄ ва̄дитум̣ ва̄ на лабхати, ан̃н̃е ‘‘начча, га̄йа, ва̄дехӣ’’ти ваттумпи на лабхати. ‘‘четийасса упаха̄рам̣ детха, упа̄сака̄’’ти ваттумпи ‘‘тумха̄кам̣ четийасса упат̣т̣ха̄нам̣ карома̄’’ти вутте ‘‘са̄дхӯ’’ти сампат̣иччхитумпи на лабхати. саббаттха па̄читтийанти саббаат̣т̣хакатха̄су вуттам̣. бхиккхуно дуккат̣ам̣. ‘‘тумха̄кам̣ четийасса упат̣т̣ха̄нам̣ карома̄’’ти вутте пана ‘‘упат̣т̣ха̄накаран̣ам̣ на̄ма сундара’’нти ваттум̣ ват̣т̣ати.

837. а̄ра̄ме т̣хита̄ти а̄ра̄ме т̣хатва̄ антара̄ра̄ме ва̄ бахиа̄ра̄ме ва̄ начча̄дӣни пассати ва̄ сун̣а̄ти ва̄, ана̄патти. сати каран̣ӣйети сала̄кабхатта̄дӣнам̣ ва̄ аттха̄йа ан̃н̃ена ва̄ кеначи каран̣ӣйена гантва̄ гатат̣т̣ха̄не пассати ва̄ сун̣а̄ти ва̄, ана̄патти. а̄пада̄сӯти та̄дисена упаддавена упаддута̄ самаджджат̣т̣ха̄нам̣ пависати, евам̣ пависитва̄ пассантийа̄ ва̄ сун̣антийа̄ ва̄ ана̄патти. сесам̣ утта̄намева.

ел̣акаломасамут̣т̣ха̄нам̣ – кирийам̣, носан̃н̃а̄вимоккхам̣, ачиттакам̣, локаваджджам̣, ка̄йакаммам̣, акусалачиттам̣, тиведананти.

дасамасиккха̄падам̣.

ласун̣авагго пат̣хамо.