1. пат̣хамаласун̣асиккха̄падаван̣н̣ана̄

тим̣сака̄нантарам̣ дхамма̄, чхасат̣т̣хисатасан̇гаха̄;

сан̇гӣта̄ йе айам̣ да̄ни, хоти тесампи ван̣н̣ана̄.

793. таттха ласун̣аваггасса та̄ва пат̣хамасиккха̄паде – две тайо бхан̣д̣икети две ва̄ тайо ва̄ пот̣т̣алике; сампун̣н̣амин̃джа̄наметам̣ адхивачанам̣. на маттам̣ джа̄нитва̄ти пама̄н̣ам̣ аджа̄нитва̄ кхеттапа̄ласса ва̄рентасса бахум̣ ласун̣ам̣ хара̄песи.

ан̃н̃атарам̣ хам̣сайонинти суван̣н̣ахам̣сайоним̣. со та̄сам̣ екеканти со хам̣со джа̄тиссаро ахоси, атха пуббасинехена а̄гантва̄ та̄сам̣ екекам̣ паттам̣ дети, там̣ та̄паната̄ланаччхеданаккхамам̣ суван̣н̣амева хоти.

795. ма̄гадхаканти магадхесу джа̄там̣. магадхарат̣т̣хе джа̄таласун̣амева хи идха ласун̣анти адхиппетам̣, тампи бхан̣д̣икаласун̣амева, на екадвитимин̃джакам̣. курундийам̣ пана джа̄тадесам̣ аватва̄ ‘‘ма̄гадхакам̣ на̄ма бхан̣д̣икаласун̣а’’нти вуттам̣. аджджхоха̄ре аджджхоха̄рети еттха саче две тайо бхан̣д̣ике екатойева сан̇кха̄дитва̄ аджджхохарати, екам̣ па̄читтийам̣. бхиндитва̄ екекам̣ мин̃джам̣ кха̄дантийа̄ пана пайогаган̣ана̄йа па̄читтийа̄нӣти.

797. палан̣д̣ука̄дӣнам̣ ван̣н̣ена ва̄ мин̃джа̄йа ва̄ на̄наттам̣ ведитаббам̣ – ван̣н̣ена та̄ва палан̣д̣уко пан̣д̣уван̣н̣о хоти. бхан̃джанако лохитаван̣н̣о. харитако харитапан̣н̣аван̣н̣о. мин̃джа̄йа пана палан̣д̣укасса ека̄ мин̃джа̄ хоти, бхан̃джанакасса две, харитакасса тиссо. ча̄паласун̣о амин̃джако, ан̇кураматтамева хи тасса хоти. маха̄паччарийа̄дӣсу пана ‘‘палан̣д̣укасса тӣн̣и мин̃джа̄ни, бхан̃джанакасса две, харитакасса ека’’нти вуттам̣. ете палан̣д̣ука̄дайо сабха̄венева ват̣т̣анти. сӯпасампа̄ка̄дӣсу пана ма̄гадхакампи ват̣т̣ати. тан̃хи паччама̄несу муггасӯпа̄дӣсу ва̄ маччхамам̣савикатийа̄ ва̄ тела̄дӣсу ва̄ бадараса̄л̣ава̄дӣсу ва̄ амбиласа̄ка̄дӣсу ва̄ уттарибхан̇гесу ва̄ йаттха каттхачи антамасо йа̄губхаттепи паккхипитум̣ ват̣т̣ати. сесаметтха утта̄намева.

ел̣акаломасамут̣т̣ха̄нам̣ – кирийам̣, носан̃н̃а̄вимоккхам̣, ачиттакам̣, пан̣н̣аттиваджджам̣, ка̄йакаммам̣, тичиттам̣, тиведананти.

ласун̣асиккха̄падам̣ пат̣хамам̣.