6. сурусуруваггаван̣н̣ана̄

627. сурусурука̄раканти сурусурӯти евам̣ саддам̣ катва̄ катва̄. давоти париха̄савачанам̣; там̣ йена кеначи парийа̄йена ‘‘ким̣ буддхо, силакабуддхо, пат̣ибуддхо; ким̣ дхаммо, годхаммо, аджадхаммо; ким̣ сан̇гхо, мигасан̇гхо, пасусан̇гхо’’тиа̄дина̄ найена тӣн̣и ратана̄ни а̄раббха на ка̄таббанти аттхо.

628. хаттханиллехаканти хаттхам̣ ниллехитва̄ ниллехитва̄. бхун̃джантена хи ан̇гулиматтампи ниллехитум̣ на ват̣т̣ати. гханайа̄гупха̄н̣итапа̄йа̄са̄дике пана ан̇гулӣхи гахетва̄ ан̇гулийо мукхе павесетва̄ бхун̃джитум̣ ват̣т̣ати. паттаниллехакаот̣т̣ханиллехакесупи есева найо. тасма̄ екан̇гулийа̄пи патто на ниллехитаббо, екаот̣т̣хопи дживха̄йа на ниллехитаббо, от̣т̣хамам̣сехи ева пана гахетва̄ анто павесетум̣ ват̣т̣ати.

631. коканадети евам̣на̄маке. коканаданти падумам̣ вуччати, со ча па̄са̄до падумасан̣т̣ха̄но, тенасса коканадотвева на̄мам̣ акам̣су. на са̄мисена хаттхена па̄нӣйатха̄лаканти етам̣ пат̣иккӯлавасена пат̣иккхиттам̣, тасма̄ сан̇гхикампи пуггаликампи гихисантакампи аттано сантакампи сан̇кхампи сара̄вампи тха̄лакампи на гахетаббамева, ган̣хантасса дуккат̣ам̣. саче пана хаттхасса екадесо а̄мисамаккхито на хоти, тена падесена гахетум̣ ват̣т̣ати.

632. уддхаритва̄ ва̄ти ситтха̄ни удакато уддхаритва̄ екасмим̣ т̣ха̄не ра̄сим̣ катва̄ удакам̣ чхад̣д̣ети. бхиндитва̄ ва̄ти ситтха̄ни бхиндитва̄ удакагатика̄ни катва̄ чхад̣д̣ети. пат̣иггахе ва̄ти пат̣иггахена пат̣иччханто нам̣ пат̣иггахе чхад̣д̣ети. нӣхаритва̄ти бахи нӣхаритва̄ чхад̣д̣ети; евам̣ чхад̣д̣ентасса ана̄патти.

634. сетаччхаттанти ваттхапалигун̣т̣хитам̣ пан̣д̣араччхаттам̣. килан̃джаччхаттанти вилӣваччхаттам̣. пан̣н̣аччхаттанти та̄лапан̣н̣а̄дӣхи йехи кехичи катам̣. ман̣д̣алабаддхам̣ сала̄кабаддханти идам̣ пана тин̣н̣ампи чхатта̄нам̣ пан̃джарадассанаттхам̣ вуттам̣. та̄ни хи ман̣д̣алабаддха̄ни чева хонти сала̄кабаддха̄ни ча. йампи таттхаджа̄такадан̣д̣акена катам̣ екапан̣н̣аччхаттам̣ хоти, тампи чхаттамева. етесу йам̣кин̃чи чхаттам̣ па̄н̣имхи асса̄ти чхаттапа̄н̣и. со там̣ чхаттам̣ дха̄райама̄но ва̄ ам̣се ва̄ катва̄ ӯрумхи ва̄ т̣хапетва̄ йа̄ва хаттхена на муччати, та̄васса дхаммам̣ десетум̣ на ват̣т̣ати, десентасса вуттанайена дуккат̣ам̣. саче панасса ан̃н̃о чхаттам̣ дха̄рети, чхаттапа̄дука̄йа ва̄ т̣хитам̣ хоти, хаттхато апагатаматте чхаттапа̄н̣и на̄ма на хоти. тасса дхаммам̣ десетум̣ ват̣т̣ати. дхаммапариччхедо панеттха падасодхамме вуттанайенева ведитаббо.

635. дан̣д̣апа̄н̣исса̄ти еттха дан̣д̣о на̄ма маджджхимасса пурисасса чатухаттхаппама̄н̣о дан̣д̣апа̄н̣ибха̄во панасса чхаттапа̄н̣имхи вуттанайенева ведитаббо.

636. саттхапа̄н̣имхипи есева найо. асим̣ саннахитва̄ т̣хитопи хи саттхапа̄н̣исан̇кхйам̣ на гаччхати.

637. а̄вудхапа̄н̣исса̄ти еттха кин̃ча̄пи вуттам̣ – ‘‘а̄вудхам̣ на̄ма ча̄по кодан̣д̣о’’ти, атха кхо сабба̄пи дханувикати саддхим̣ саравикатийа̄ а̄вудханти ведитаббам̣. тасма̄ саддхим̣ ва̄ сарена дханум̣ гахетва̄ суддхадханум̣ ва̄ суддхасарам̣ ва̄ саджийадханум̣ ва̄ ниджджийадханум̣ ва̄ гахетва̄ т̣хитасса ва̄ нисиннасса ва̄ дхаммо десетум̣ на ват̣т̣ати. саче панасса дханум̣ кан̣т̣хепи пат̣имуккам̣ хоти, йа̄ва хаттхена на ган̣ха̄ти, та̄ва дхаммам̣ десетум̣ ват̣т̣атийева̄ти.

чхат̣т̣хо вагго.