1. антепурасиккха̄падаван̣н̣ана̄

494. ра̄джаваггасса пат̣хамасиккха̄паде – оракоти париттако. упарипа̄са̄даварагатоти па̄са̄даварасса упаригато. аййа̄нам̣ ва̄хаса̄ти аййа̄нам̣ ка̄ран̣а̄; техи джа̄на̄питатта̄ джа̄на̄мӣти вуттам̣ хоти.

497. питарам̣ паттхетӣти антарам̣ пасситва̄ гха̄тетум̣ иччхати. ра̄джантепурам̣ хаттхисаммаддантиа̄дӣсу хаттхӣхи саммаддо еттха̄ти хаттхисаммаддам̣; хаттхисамба̄дханти аттхо. ассаратхасаммаддападепи есева найо. ‘‘самматта’’нти кечи пат̣ханти, там̣ на гахетаббам̣. ‘‘ран̃н̃о антепуре хаттхисаммадда’’нтипи па̄т̣хо, таттха хаттхӣнам̣ саммаддам̣ хаттхисаммадданти аттхо, ран̃н̃о антепуре хаттхисаммаддо аттхӣти вуттам̣ хоти. еса найо сесападесупи. раджанӣйа̄нӣти тасмим̣ антепуре едиса̄ни рӯпа̄дӣни.

498. муддха̄васиттасса̄ти муддхани аваситтасса. аниккханто ра̄джа̄ итоти аниккхантара̄джакам̣, тасмим̣ аниккхантара̄джаке; сайанигхарети аттхо. ратанам̣ вуччати махесӣ, ниггатанти никкхантам̣, аниггатам̣ ратанам̣ итоти аниггатаратанакам̣, тасмим̣ аниггатаратанаке; сайанигхарети аттхо. сесаметтха утта̄намева.

катхинасамут̣т̣ха̄нам̣ – ка̄йава̄чато ка̄йава̄ча̄читтато ча самут̣т̣ха̄ти, кирийа̄кирийам̣, носан̃н̃а̄вимоккхам̣, ачиттакам̣, пан̣н̣аттиваджджам̣, ка̄йакаммам̣, вачӣкаммам̣, тичиттам̣, тиведананти.

антепурасиккха̄падам̣ пат̣хамам̣.