1. сура̄па̄насиккха̄падаван̣н̣ана̄
326. сура̄па̄наваггасса пат̣хамасиккха̄паде – бхаддаватика̄ти еко га̄мо, со бхаддика̄йа ватийа̄ саманна̄гататта̄ етам̣ на̄ма лабхи. патха̄виноти аддхика̄. теджаса̄ теджанти аттано теджаса̄ а̄нубха̄вена на̄гасса теджам̣. ка̄потика̄ти капотапа̄дасамаван̣н̣араттобха̄са̄. пасанна̄ти сура̄ман̣д̣ассетам̣ адхивачанам̣. анануччхавийам̣ бхиккхаве са̄гатасса̄ти пан̃ча̄бхин̃н̃асса сато маджджапа̄нам̣ на̄ма на ануччхавийанти вуттам̣ хоти.
328. пуппха̄саво на̄ма мадхукапуппха̄дӣнам̣ расена като. пхала̄саво на̄ма муддикапхала̄дӣни маддитва̄ тесам̣ расена като. мадхва̄саво на̄ма муддика̄нам̣ джа̄тирасена като; маккхикамадхуна̄пи карийатӣти ваданти. гул̣а̄саво на̄ма уччхураса̄дӣхи карийати. сура̄ на̄ма пит̣т̣хакин̣н̣апаккхитта̄; на̄л̣икера̄дӣнампи расена ката̄ сура̄твева сан̇кхйам̣ гаччхати, тасса̄йева кин̣н̣апаккхитта̄йа ман̣д̣е гахите мерайотвева сан̇кхйам̣ гаччхатӣти ваданти. антамасо кусаггенапи пиватӣти етам̣ сурам̣ ва̄ мерайам̣ ва̄ бӣджато пат̣т̣ха̄йа кусаггена пиватопи па̄читтийанти аттхо. екена пана пайогена бахумпи пивантасса ека̄ а̄патти. виччхиндитва̄ виччхиндитва̄ пивато пайогаган̣ана̄йа а̄паттийо.
329. амаджджан̃ча хоти маджджаван̣н̣ам̣ маджджагандхам̣ маджджарасанти лон̣асовӣракам̣ ва̄ суттам̣ ва̄ хоти. сӯпасампа̄кети ва̄сага̄ха̄панаттхам̣ ӣсакам̣ маджджам̣ паккхипитва̄ сӯпам̣ пачанти, тасмим̣ ана̄патти. мам̣сасампа̄кепи есева найо. телам̣ пана ва̄табхесаджджаттхам̣ маджджена саддхим̣ пачанти, тасмимпи анатиккхиттамаджджейева ана̄патти, йам̣ пана атиккхиттамаджджам̣ хоти, еттха маджджасса ван̣н̣агандхараса̄ пан̃н̃а̄йанти, тасмим̣ а̄паттийева. амаджджам̣ арит̣т̣ханти йо арит̣т̣хо маджджам̣ на хоти, тасмим̣ ана̄патти. а̄малака̄дӣнам̣йева кира расена арит̣т̣хам̣ каронти, со маджджаван̣н̣агандхарасойева хоти, на ча маджджам̣; там̣ сандха̄йетам̣ вуттам̣. йо пана самбха̄рапаккхитто, со маджджам̣ хоти, бӣджато пат̣т̣ха̄йа на ват̣т̣ати. сесаметтха утта̄намева. ел̣акаломасамут̣т̣ха̄нам̣ – кирийам̣, носан̃н̃а̄вимоккхам̣, ачиттакам̣, локаваджджам̣, ка̄йакаммам̣ акусалачиттам̣, тиведананти. ваттхуаджа̄наната̄йа четтха ачиттаката̄ ведитабба̄, акусаленева па̄таббата̄йа локаваджджата̄ти.
сура̄па̄насиккха̄падам̣ пат̣хамам̣.