2. уййоджанасиккха̄падаван̣н̣ана̄

274. дутийасиккха̄паде – пат̣иккаманепӣти а̄санаса̄ла̄йампи. бхаттависсагганти бхаттакиччам̣. на самбха̄весӣти на па̄пун̣и.

276. ана̄ча̄ранти вутта̄васесам̣ ка̄йавачӣдва̄равӣтиккамам̣. дассанӯпача̄рам̣ ва̄ саванӯпача̄рам̣ ва̄ виджахантасса̄ти еттха йади т̣хито ва̄ нисинно ва̄ уййоджети; йо уййоджито, со виджахати, тасса ча а̄патти на̄ма наттхи. тасмим̣ пана виджахантепи аттхато итарена виджахитамева хоти. тасма̄ йо уййоджети, тассева̄йам̣ а̄патти. таттха саче упача̄раббхантаре еко па̄до хоти, дуккат̣ам̣. сӣма̄тиккаме па̄читтийам̣. еттха ча дассанӯпача̄расса аббхока̄се два̄дасахаттхаппама̄н̣ам̣, татха̄ саванӯпача̄расса. саче пана антара̄ кут̣т̣адва̄рапа̄ка̄ра̄дайо хонти, техи антаритабха̄во дассанӯпача̄ра̄тиккамо, тасса васена а̄патти ведитабба̄. на ан̃н̃о кочи паччайо хотӣти т̣хапетва̄ вуттаппака̄рамана̄ча̄рам̣ ан̃н̃ам̣ кин̃чи ка̄ран̣ам̣ на хоти.

277. калиса̄санам̣ а̄ропетӣти ‘‘калӣ’’ти кодхо; тасса са̄санам̣ а̄ропети; кодхасса а̄н̣ам̣ а̄ропети; кодхавасена т̣ха̄нанисаджджа̄дӣсу досам̣ дассетва̄ ‘‘пассатха бхо имасса т̣ха̄нам̣, нисаджджам̣ а̄локитам̣ вилокитам̣ кха̄н̣уко вийа тит̣т̣хати, сунакхо вийа нисӣдати, маккат̣о вийа ито чито ча вилокетӣ’’ти евам̣ амана̄павачанам̣ вадати ‘‘аппева на̄ма имина̄пи убба̄л̣хо паккамеййа̄’’ти. сесам̣ утта̄намева.

тисамут̣т̣ха̄нам̣ – ка̄йачиттато ва̄ча̄читтато ка̄йава̄ча̄читтато ча самут̣т̣ха̄ти, кирийам̣, сан̃н̃а̄вимоккхам̣, сачиттакам̣, локаваджджам̣, ка̄йакаммам̣, вачӣкаммам̣, акусалачиттам̣, тиведананти.

уййоджанасиккха̄падам̣ дутийам̣.