3. сабходжанасиккха̄падаван̣н̣ана̄

279. татийасиккха̄паде – сайанигхарети сайанийагхаре. йато аййасса бхиккха̄ динна̄ти йасма̄ бхиккха̄ динна̄, йам̣ а̄гатена ладдхаббам̣ там̣ во ладдхам̣; гаччхатха̄ти адхиппа̄йо. парийут̣т̣хитоти ра̄гапарийут̣т̣хито; метхуна̄дхиппа̄йоти аттхо.

280. саха убхохи джанехӣти сабходжанам̣; тасмим̣ сабходжане. атха ва̄ сабходжанети сабхоге. ра̄гапарийут̣т̣хитасса хи пурисасса иттхӣ бхого иттхийа̄ ча пурисо. теневасса падабха̄джане – ‘‘иттхӣ чева хоти пурисо ча̄’’тиа̄ди вуттам̣. махаллаке гхарети махаллаке сайанигхаре. пит̣т̣хасан̇гха̄т̣асса хаттхапа̄сам̣ виджахитва̄ти тасса сайанигхаре габбхасса йо пит̣т̣хасан̇гха̄т̣о, тасса хаттхапа̄сам̣ виджахитва̄; антосайанасса а̄санне т̣ха̄не нисӣдатӣти аттхо. ӣдисан̃ча сайанигхарам̣ маха̄чатусса̄ла̄дӣсу хоти. пит̣т̣хивам̣сам̣ атиккамитва̄ти имина̄ маджджха̄тиккамам̣ дассети. тасма̄ йатха̄ ва̄ татха̄ ва̄ катасса кхуддакасса сайанигхарасса маджджха̄тиккаме а̄патти ведитабба̄. сесаметтха утта̄намева.

пат̣хамапа̄ра̄джикасамут̣т̣ха̄нам̣ – кирийам̣, сан̃н̃а̄вимоккхам̣, сачиттакам̣, локаваджджам̣, ка̄йакаммам̣, акусалачиттам̣, двиведананти.

сабходжанасиккха̄падам̣ татийам̣.

284. чатуттхапан̃чамасиккха̄падесу йам̣ ваттаббам̣ сийа̄, там̣ саббам̣ анийатадвайе вуттанайамева. йатха̄ ча сабходжанасиккха̄падам̣, евамета̄нипи пат̣хамапа̄ра̄джикасамут̣т̣ха̄на̄нева̄ти.

рахопат̣иччханнасиккха̄падам̣ чатуттхам̣, рахонисаджджасиккха̄падам̣ пан̃чамам̣.