6. дутийапава̄ран̣асиккха̄падаван̣н̣ана̄

242. чхат̣т̣хасиккха̄паде – ана̄ча̄рам̣ а̄чаратӣти пан̣н̣аттивӣтиккамам̣ кароти. упанандхӣти упана̄хам̣ джаненто тасмим̣ пуггале аттано кодхам̣ бандхи; пунаппунам̣ а̄гха̄там̣ джанесӣти аттхо. упанаддхо бхиккхӯти со джанитаупана̄хо бхиккху.

243. абхихат̣т̣хум̣ пава̄реййа̄ти абхихаритва̄ ‘‘ханда бхиккху кха̄да ва̄ бхун̃джа ва̄’’ти евам̣ пава̄реййа. падабха̄джане пана ‘‘ханда бхиккхӯ’’тиа̄дим̣ ануддхаритва̄ са̄дха̄ран̣амева абхихат̣т̣хум̣ пава̄ран̣а̄йа аттхам̣ дассетум̣ ‘‘йа̄ватакам̣ иччхаси та̄ватакам̣ ган̣ха̄хӣ’’ти вуттам̣. джа̄нанти пава̄ритабха̄вам̣ джа̄нанто. там̣ панасса джа̄нанам̣ йасма̄ тӣха̄ка̄рехи хоти, тасма̄ ‘‘джа̄на̄ти на̄ма са̄мам̣ ва̄ джа̄на̄тӣ’’тиа̄дина̄ найена падабха̄джанам̣ вуттам̣. а̄са̄дана̄пеккхоти а̄са̄данам̣ чоданам̣ ман̇кукаран̣абха̄вам̣ апеккхама̄но.

пат̣игган̣ха̄ти а̄патти дуккат̣асса̄ти йасса абхихат̣ам̣ тасмим̣ пат̣игган̣ханте абхиха̄ракасса бхиккхуно дуккат̣ам̣. итарасса пана саббо а̄паттибхедо пат̣хамасиккха̄паде вутто, имасмим̣ пана сиккха̄паде сабба̄ а̄паттийо абхиха̄ракассева ведитабба̄. сесам̣ пат̣хамасиккха̄паде вуттанайатта̄ па̄кат̣амева.

тисамут̣т̣ха̄нам̣ – ка̄йачиттато ва̄ча̄читтато ка̄йава̄ча̄читтато ча самут̣т̣ха̄ти, кирийам̣, сан̃н̃а̄вимоккхам̣, сачиттакам̣, локаваджджам̣, ка̄йакаммам̣, вачӣкаммам̣, акусалачиттам̣, дуккхаведананти.

дутийапава̄ран̣асиккха̄падам̣ чхат̣т̣хам̣.