2. ган̣абходжанасиккха̄падаван̣н̣ана̄

209. дутийасиккха̄паде – парихӣнала̄бхасакка̄роти со кира аджа̄тасаттуна̄ ра̄джа̄нам̣ ма̄ра̄петва̄пи абхима̄ре йоджетва̄пи рухируппа̄дам̣ катва̄пи гул̣хапат̣иччханно ахоси. йада̄ пана дива̄йева дханапа̄лакам̣ пайоджеси, тада̄ па̄кат̣о джа̄то. ‘‘катхам̣ девадатто хаттхим̣ пайоджесӣ’’ти парикатха̄йа уппанна̄йа ‘‘на кевалам̣ хаттхим̣ пайоджеси, ра̄джа̄нампи ма̄ра̄песи, абхима̄репи песеси, силампи павиджджхи, па̄по девадатто’’ти па̄кат̣о ахоси. ‘‘кена саддхим̣ идам̣ каммамака̄сӣ’’ти ча вутте ‘‘ран̃н̃а̄ аджа̄тасаттуна̄’’ти а̄хам̣су. тато на̄гара̄ ‘‘катхан̃хи на̄ма ра̄джа̄ еварӯпам̣ чорам̣ са̄санакан̣т̣акам̣ гахетва̄ вичариссатӣ’’ти ут̣т̣хахим̣су. ра̄джа̄ нагарасан̇кхобхам̣ н̃атва̄ девадаттам̣ нӣхари. тато пат̣т̣ха̄йа часса пан̃чатха̄липа̄касата̄ни упаччхинди, упат̣т̣ха̄намписса на агама̄си, ан̃н̃еписса манусса̄ на кин̃чи да̄таббам̣ ва̄ ка̄таббам̣ ва̄ ман̃н̃им̣су. тена вуттам̣ – ‘‘парихӣнала̄бхасакка̄ро’’ти. кулесу вин̃н̃а̄петва̄ вин̃н̃а̄петва̄ бхун̃джатӣти ‘‘ма̄ ме ган̣о бхиджджӣ’’ти парисам̣ посенто ‘‘твам̣ екасса бхиккхуно бхаттам̣ дехи, твам̣ двинна’’нти евам̣ вин̃н̃а̄петва̄ сапарисо кулесу бхун̃джати.

211. чӣварам̣ париттам̣ уппаджджатӣти бхаттам̣ аган̣ханта̄нам̣ чӣварам̣ на денти, тасма̄ париттам̣ уппаджджати.

212. чӣварака̄раке бхиккхӯ бхаттена нимантентӣти га̄ме пин̣д̣а̄йа чаритва̄ чирена чӣварам̣ нит̣т̣ха̄пенте дисва̄ ‘‘евам̣ лахум̣ нит̣т̣ха̄петва̄ чӣварам̣ парибхун̃джиссантӣ’’ти пун̃н̃ака̄мата̄йа нимантенти.

215. на̄на̄вераджджакети на̄на̄видхехи ан̃н̃араджджехи а̄гате. ‘‘на̄на̄вираджджаке’’типи па̄т̣хо, айамеваттхо.

217-8. ган̣абходжанети ган̣асса бходжане. идха ча ган̣о на̄ма чатта̄ро бхиккхӯ а̄дим̣ катва̄ татуттарим̣ бхиккхӯ адхиппета̄, тенева саббантимам̣ париччхедам̣ дассенто а̄ха ‘‘йаттха чатта̄ро бхиккхӯ…пе… етам̣ ган̣абходжанам̣ на̄ма̄’’ти. там̣ панетам̣ ган̣абходжанам̣ двӣха̄ка̄рехи пасавати нимантанато ва̄ вин̃н̃аттито ва̄. катхам̣ нимантанато пасавати? чатта̄ро бхиккхӯ упасан̇камитва̄ ‘‘тумхе, бханте, оданена нимантеми, оданам̣ ме ган̣хатха а̄кан̇кхатха олокетха адхива̄сетха пат̣има̄нетха̄’’ти евам̣ йена кеначи вевачанена ва̄ бха̄сантарена ва̄ пан̃чаннам̣ бходжана̄нам̣ на̄мам̣ гахетва̄ нимантети. евам̣ екато нимантита̄ париччхиннака̄лавасена аджджатана̄йа ва̄ сва̄тана̄йа ва̄ екато гаччханти, екато ган̣ханти, екато бхун̃джанти, ган̣абходжанам̣ хоти, саббесам̣ а̄патти. екато нимантита̄ екато ва̄ на̄нато ва̄ гаччханти, екато ган̣ханти, на̄нато бхун̃джанти, а̄паттийева. пат̣иггахан̣амева хи еттха пама̄н̣ам̣. екато нимантита̄ екато ва̄ на̄нато ва̄ гаччханти, на̄нато ган̣ханти, екато ва̄ на̄нато ва̄ бхун̃джанти, ана̄патти. чатта̄ри паривен̣а̄ни ва̄ виха̄ре ва̄ гантва̄ на̄нато нимантита̄ екат̣т̣ха̄не т̣хитесуйева ва̄ еко путтена еко питара̄ти евампи на̄нато нимантита̄ екато ва̄ на̄нато ва̄ гаччханту, екато ва̄ на̄нато ва̄ бхун̃джанту, саче екато ган̣ханти, ган̣абходжанам̣ хоти, саббесам̣ а̄патти. евам̣ та̄ва нимантанато пасавати.

катхам̣ вин̃н̃аттито? чатта̄ро бхиккхӯ екато т̣хита̄ ва̄ нисинна̄ ва̄ упа̄сакам̣ дисва̄ ‘‘амха̄кам̣ чатуннампи бхаттам̣ дехӣ’’ти ва̄ вин̃н̃а̄пеййум̣, па̄т̣еккам̣ ва̄ пасситва̄ ‘‘майхам̣ дехи, майхам̣ дехӣ’’ти евам̣ екато ва̄ на̄нато ва̄ вин̃н̃а̄петва̄ екато ва̄ гаччханту на̄нато ва̄, бхаттам̣ гахетва̄пи екато ва̄ бхун̃джанту на̄нато ва̄, саче екато ган̣ханти, ган̣абходжанам̣ хоти, саббесам̣ а̄патти. евам̣ вин̃н̃аттито пасавати.

па̄да̄пи пхалита̄ти йатха̄ маха̄чаммасса парато мам̣сам̣ диссати; евам̣ пха̄лита̄, ва̄лика̄йа ва̄ саккхара̄йа ва̄ пахат̣аматте дуккхам̣ уппа̄денти, на сакка̄ хоти антога̄ме пин̣д̣а̄йа чаритум̣. ӣдисе гелан̃н̃е гила̄насамайоти бхун̃джитаббам̣, на лесакаппийам̣ ка̄таббам̣.

чӣваре кайирама̄нети йада̄ са̄т̣акан̃ча суттан̃ча лабхитва̄ чӣварам̣ каронти тада̄; висун̃хи чӣварака̄расамайо на̄ма наттхи. тасма̄ йо таттха чӣваре каттаббам̣ йам̣кин̃чи каммам̣ кароти, маха̄паччарийан̃хи ‘‘антамасо сӯчиведханако’’типи вуттам̣, тена чӣварака̄расамайоти бхун̃джитаббам̣. курундийам̣ пана виттха̄ренева вуттам̣. йо чӣварам̣ вича̄рети, чхиндати, могхасуттам̣ т̣хапети, а̄гантукапат̣т̣ам̣ т̣хапети, пачча̄гатам̣ сиббати, а̄гантукапат̣т̣ам̣ бандхати, анува̄там̣ чхиндати гхат̣т̣ети а̄ропети, таттха пачча̄гатам̣ сиббати, суттам̣ кароти валети, пиппхаликам̣ нисети, париваттанам̣ кароти, саббопи чӣварам̣ каротийева̄ти вуччати. йо пана самӣпе нисинно джа̄такам̣ ва̄ дхаммападам̣ ва̄ катхети, айам̣ на чӣварака̄рако. етам̣ т̣хапетва̄ сеса̄нам̣ ган̣абходжане ана̄паттӣти.

аддхайоджананти еттакампи аддха̄нам̣ гантука̄мена. йо пана дӯрам̣ гантука̄мо, таттха ваттаббамева наттхи. гаччхантена̄ти аддха̄нам̣ гаччхантена, аддхайоджанаббхантаре га̄вутепи бхун̃джитум̣ ват̣т̣ати. гатена бхун̃джитаббанти гатена екадивасам̣ бхун̃джитаббам̣. на̄ва̄бхируханепи есева найо. айам̣ пана висесо – абхирул̣хена иччхитат̣т̣ха̄нам̣ гантва̄пи йа̄ва на орохати та̄ва бхун̃джитаббанти маха̄паччарийам̣ вуттам̣. чатуттхе а̄гатети айам̣ антимапариччхедо, чатуттхепи а̄гате йаттха на йа̄пенти; со маха̄самайо. йаттха пана сатам̣ ва̄ сахассам̣ ва̄ саннипатанти, таттха ваттаббамева наттхи. тасма̄ та̄дисе ка̄ле ‘‘маха̄самайо’’ти адхит̣т̣хахитва̄ бхун̃джитаббам̣. йо кочи парибба̄джакасама̄панноти сахадхаммикесу ва̄ титтхийесу ва̄ ан̃н̃атаро, етесан̃хи йена кеначи кате бхатте ‘‘саман̣абхаттасамайо’’ти бхун̃джитаббам̣.

220. ана̄патти самайети саттасу самайесу ан̃н̃атарасмим̣ ана̄патти. две тайо екатоти йепи акаппийанимантанам̣ са̄дийитва̄ две ва̄ тайо ва̄ екато гахетва̄ бхун̃джанти, тесампи ана̄патти.

таттха анимантитачатуттхам̣, пин̣д̣апа̄тикачатуттхам̣, анупасампанначатуттхам̣, паттачатуттхам̣, гила̄начатуттханти пан̃чаннам̣ чатукка̄нам̣ васена виниччхайо ведитаббо. катхам̣? идхекаччо чатта̄ро бхиккхӯ ‘‘бхаттам̣ ган̣хатха̄’’ти нимантети. тесу тайо гата̄, еко на гато. упа̄сако ‘‘еко бханте тхеро кухи’’нти пуччхати. на̄гато упа̄сака̄ти. со ан̃н̃ам̣ тан̇кхан̣аппаттам̣ кан̃чи ‘‘ехи бханте’’ти павесетва̄ чатуннампи бхаттам̣ дети, саббесам̣ ана̄патти. касма̄? ган̣апӯракасса анимантитатта̄. тайо ева хи таттха нимантита̄ ган̣хим̣су, техи ган̣о на пӯрати, ган̣апӯрако ча анимантито, тена ган̣о бхиджджатӣти идам̣ анимантитачатуттхам̣.

пин̣д̣апа̄тикачатуттхе – нимантанака̄ле еко пин̣д̣апа̄тико хоти, со на̄дхива̄сети. гаманавела̄йа пана ‘‘ехи бханте’’ти вутте анадхива̄ситатта̄ ана̄гаччхантампи ‘‘етха бхиккхам̣ лаччхатха̄’’ти гахетва̄ гаччханти, со там̣ ган̣ам̣ бхиндати. тасма̄ саббесам̣ ана̄патти.

анупасампанначатуттхе – са̄ман̣ерена саддхим̣ нимантита̄ хонти, сопи ган̣ам̣ бхиндати.

паттачатуттхе – еко сайам̣ агантва̄ паттам̣ песети; евампи ган̣о бхиджджати. тасма̄ саббесам̣ ана̄патти.

гила̄начатуттхе – гила̄нена саддхим̣ нимантита̄ хонти, таттха гила̄нассева ана̄патти, итаресам̣ пана ган̣апӯрако хоти. на хи гила̄нена ган̣о бхиджджати. тасма̄ тесам̣ а̄паттийева. маха̄паччарийам̣ пана ависесена вуттам̣.

самайаладдхако сайамева муччати, сеса̄нам̣ ган̣апӯракатта̄ а̄паттикаро хоти. тасма̄ чӣварада̄насамайаладдхака̄дӣнампи васена чатукка̄ни ведитабба̄ни. саче пана адхива̄сетва̄ гатесупи чатӯсу джанесу еко пан̣д̣ито бхиккху ‘‘ахам̣ тумха̄кам̣ ган̣ам̣ бхиндисса̄ми, нимантанам̣ са̄дийатха̄’’ти ватва̄ йа̄гукхаджджака̄васа̄не бхаттаттха̄йа паттам̣ ган̣ханта̄нам̣ адатва̄ ‘‘име та̄ва бхиккхӯ бходжетва̄ виссаджджетха, ахам̣ паччха̄ анумоданам̣ катва̄ гамисса̄мӣ’’ти нисинно. тесу бхутва̄ гатесу ‘‘детха бханте патта’’нти упа̄сакена паттам̣ гахетва̄ бхатте динне бхун̃джитва̄ анумоданам̣ катва̄ гаччхати, саббесам̣ ана̄патти. пан̃чаннан̃хи бходжана̄нам̣йева васена ган̣абходжане висан̇кетам̣ наттхи. оданена нимантита̄ кумма̄сам̣ ган̣ханта̄пи а̄паттим̣ а̄паджджанти. та̄ни ча техи екато на гахита̄ни. йа̄гуа̄дӣсу пана висан̇кетам̣ хоти, та̄ни техи екато гахита̄нӣти. евам̣ еко пан̣д̣ито ан̃н̃есампи ана̄паттим̣ кароти.

тасма̄ саче кочи сан̇гхабхаттам̣ каттука̄мена нимантанаттха̄йа песито виха̄рам̣ а̄гамма ‘‘бханте, све амха̄кам̣ гхаре бхиккхам̣ ган̣хатха̄’’ти аватва̄ ‘‘бхаттам̣ ган̣хатха̄’’ти ва̄ ‘‘сан̇гхабхаттам̣ ган̣хатха̄’’ти ва̄ ‘‘сан̇гхо бхаттам̣ ган̣ха̄тӯ’’ти ва̄ вадати, бхаттуддесакена пан̣д̣итена бхавитаббам̣, немантаника̄ ган̣абходжанато пин̣д̣апа̄тика̄ ча дхутан̇габхедато мочетабба̄. катхам̣? евам̣ та̄ва ваттаббам̣ – ‘‘све на сакка̄ упа̄сака̄’’ти. ‘‘пунадивасе, бханте’’ти. ‘‘пунадивасепи на сакка̄’’ти. евам̣ йа̄ва аддхама̄сампи харитва̄ пуна ваттаббо – ‘‘твам̣ ким̣ авача̄’’ти? саче пунапи ‘‘сан̇гхабхаттам̣ ган̣хатха̄’’ти вадати, тато ‘‘имам̣ та̄ва упа̄сака пуппхам̣ каппийам̣ карохи, имам̣ тин̣а’’нти евам̣ виккхепам̣ катва̄ пуна ‘‘ким̣ катхайиттха̄’’ти пуччхитаббо. саче пунапи татхева вадати, ‘‘а̄вусо, твам̣ пин̣д̣апа̄тике ва̄ маха̄тхере ва̄ на лаччхаси, са̄ман̣ере лаччхасӣ’’ти ваттаббо. ‘‘нану, бханте асукасмин̃ча асукасмин̃ча га̄ме бхаданте бходжесум̣, ахам̣ касма̄ на лабха̄мӣ’’ти ча вутте ‘‘те нимантетум̣ джа̄нанти, твам̣ на джа̄на̄сӣ’’ти. те катхам̣ нимантесум̣ бхантети? те евама̄хам̣су – ‘‘амха̄кам̣, бханте, бхиккхам̣ ган̣хатха̄’’ти. саче сопи татхева вадати, ват̣т̣ати. атха пунапи ‘‘бхаттам̣ ган̣хатха̄’’ти вадати, ‘‘на да̄ни твам̣, а̄вусо, бахӯ бхиккхӯ лаччхаси, тайо ева лаччхасӣ’’ти ваттаббо. ‘‘нану, бханте, асукасмин̃ча асукасмин̃ча га̄ме сакалам̣ бхиккхусан̇гхам̣ бходжесум̣, ахам̣ касма̄ на лабха̄мӣ’’ти? ‘‘твам̣ нимантетум̣ на джа̄на̄сӣ’’ти. ‘‘те катхам̣ нимантесу’’нти? те ‘‘бхиккхам̣ ган̣хатха̄’’ти а̄хам̣сӯти. саче сопи ‘‘бхиккхам̣ ган̣хатха̄’’ти вадати, ват̣т̣ати. атха пунапи ‘‘бхаттамева̄’’ти вадати, тато ваттаббо – ‘‘гаччха твам̣, наттхамха̄кам̣ тава бхаттенаттхо, нибаддхагочаро еса амха̄кам̣, майаметтха пин̣д̣а̄йа чарисса̄ма̄’’ти. там̣ ‘‘чаратха, бханте’’ти ватва̄ а̄гатам̣ пуччханти – ‘‘ким̣ бхо ладдха̄ бхиккхӯ’’ти. ‘‘ким̣ етена баху еттха ваттаббам̣, ‘тхера̄ све пин̣д̣а̄йа чарисса̄ма̄’ти а̄хам̣су. ма̄ да̄ни тумхе памаджджиттха̄’’ти. дутийадивасе четийаваттам̣ катва̄ т̣хита̄ бхиккхӯ сан̇гхаттхерена ваттабба̄ – ‘‘а̄вусо, дхурага̄ме сан̇гхабхаттам̣ апан̣д̣итамануссо пана агама̄си, гаччха̄ма дхурага̄ме пин̣д̣а̄йа чарисса̄ма̄’’ти. бхиккхӯхи тхерасса вачанам̣ ка̄таббам̣, на дуббачехи бхавитаббам̣, га̄мадва̄ре ат̣т̣хатва̄ва пин̣д̣а̄йа чаритаббам̣. тесу патта̄ни гахетва̄ нисӣда̄петва̄ бходжентесу бхун̃джитаббам̣. саче а̄санаса̄ла̄йа бхаттам̣ т̣хапетва̄ ратхика̄су а̄хин̣д̣анта̄ а̄роченти – ‘‘а̄санаса̄ла̄йа, бханте, бхаттам̣ ган̣хатха̄’’ти на ват̣т̣ати.

атха пана бхаттам̣ а̄да̄йа таттха таттха гантва̄ ‘‘бхаттам̣ ган̣хатха̄’’ти ваданти, пат̣икаччева ва̄ виха̄рам̣ абхихаритва̄ патирӯпе т̣ха̄не т̣хапетва̄ а̄гата̄гата̄нам̣ денти, айам̣ абхихат̣абхиккха̄ на̄ма ват̣т̣ати. саче пана бхаттаса̄ла̄йа да̄нам̣ саджджетва̄ там̣ там̣ паривен̣ам̣ пахин̣анти ‘‘бхаттаса̄ла̄йа бхаттам̣ ган̣хатха̄’’ти, на ват̣т̣ати. йе пана манусса̄ пин̣д̣ача̄рике бхиккхӯ дисва̄ а̄санаса̄лам̣ саммаджджитва̄ таттха нисӣда̄петва̄ бходженти, на те пат̣иккхипитабба̄. йе пана га̄ме бхиккхам̣ алабхитва̄ га̄мато никкхаманте бхиккхӯ дисва̄ ‘‘бханте бхаттам̣ ган̣хатха̄’’ти ваданти, те пат̣иккхипитабба̄, на ва̄ ниваттитаббам̣. саче ‘‘ниваттатха, бханте, бхаттам̣ ган̣хатха̄’’ти ваданти, ‘‘ниваттатха̄’’ти вуттападе ниваттитум̣ ват̣т̣ати. ‘‘ниваттатха бханте, гхаре бхаттам̣ катам̣, га̄ме бхаттам̣ ката’’нти ваданти, гехе ча га̄ме ча бхаттам̣ на̄ма йасса кассачи хотӣти ниваттитум̣ ват̣т̣ати. ‘‘ниваттатха, бхаттам̣ ган̣хатха̄’’ти самбандхам̣ катва̄ ваданти, ниваттитум̣ на ват̣т̣ати. а̄санаса̄лато пин̣д̣а̄йа чаритум̣ никкхаманте дисва̄ ‘‘нисӣдатха бханте бхаттам̣ ган̣хатха̄’’ти вуттепи есева найо. ниччабхаттанти дхувабхаттам̣ вуччати. ‘‘ниччабхаттам̣ ган̣хатха̄’’ти ваданти, бахӯнампи екато гахетум̣ ват̣т̣ати. сала̄кабхатта̄дӣсупи есева найо. сесаметтха утта̄намева.

ел̣акаломасамут̣т̣ха̄нам̣ – кирийам̣, носан̃н̃а̄вимоккхам̣, ачиттакам̣, пан̣н̣аттиваджджам̣, ка̄йакаммам̣, тичиттам̣, тиведананти.

ган̣абходжанасиккха̄падам̣ дутийам̣.