3. парампарабходжанасиккха̄падаван̣н̣ана̄
221. татийасиккха̄паде – на кхо идам̣ оракам̣ бхависсати, йатхайиме манусса̄ саккаччам̣ бхаттам̣ каронтӣти, йена нийа̄мена име манусса̄ саккаччам̣ бхаттам̣ каронти, тена н̃а̄йати – ‘‘идам̣ са̄санам̣ идам̣ ва̄ буддхаппамукхе сан̇гхе да̄нам̣ на кхо оракам̣ бхависсати, париттам̣ ла̄макам̣ нева бхависсатӣ’’ти. кирапатикоти еттха ‘‘киро’’ти тасса кулапуттасса на̄мам̣; адхипаччат̣т̣хена пана ‘‘кирапатико’’ти вуччати. со кира иссаро адхипати ма̄саутусам̣ваччхаранийа̄мена ветанам̣ датва̄ каммака̄раке каммам̣ ка̄рети. бадара̄ пат̣ийатта̄ти упача̄равасена вадати. бадарамиссена̄ти бадараса̄л̣авена.
222. уссӯре а̄харийиттха̄ти атидива̄ а̄харийиттха.
226. майхам̣ бхаттапачча̄сам̣ иттханна̄масса даммӣти айам̣ бхаттавикаппана̄ на̄ма саммукха̄пи параммукха̄пи ват̣т̣ати. саммукха̄ дисва̄ ‘‘туйхам̣ викаппемӣ’’ти ватва̄ бхун̃джитаббам̣, адисва̄ пан̃часу сахадхаммикесу ‘‘иттханна̄масса викаппемӣ’’ти ватва̄ бхун̃джитаббам̣. маха̄паччарийа̄дӣсу пана параммукха̄викаппана̄ва вутта̄. са̄ ча̄йам̣ йасма̄ винайакаммена сан̇гахита̄, тасма̄ бхагавато викаппетум̣ на ват̣т̣ати. бхагавати хи гандхакут̣ийам̣ нисиннепи сан̇гхамаджджхе нисиннепи сан̇гхена ган̣аппахонаке бхиккхӯ гахетва̄ там̣ там̣ каммам̣ катам̣ сукатамева хоти, бхагава̄ нева каммам̣ копети; на сампа̄дети. на копети дхаммиссаратта̄, на сампа̄дети аган̣апӯракатта̄.
229. две тайо нимантане екато бхун̃джатӣти две тӣн̣и нимантана̄ни екапатте паккхипитва̄ миссетва̄ екам̣ катва̄ бхун̃джатӣти аттхо. две тӣн̣и кула̄ни нимантетва̄ екасмим̣ т̣ха̄не нисӣда̄петва̄ ито чито ча а̄харитва̄ бхаттам̣ а̄киранти, сӯпабйан̃джанам̣ а̄киранти, екамиссакам̣ хоти, еттха ана̄паттӣти маха̄паччарийам̣ вуттам̣. саче пана мӯланимантанам̣ хет̣т̣ха̄ хоти, паччхимам̣ паччхимам̣ упари, там̣ упарито пат̣т̣ха̄йа бхун̃джантасса а̄патти. хаттхам̣ пана анто павесетва̄ пат̣хаманимантанато екампи кабал̣ам̣ уддхаритва̄ бхуттака̄лато пат̣т̣ха̄йа йатха̄ татха̄ ва̄ бхун̃джантасса ана̄патти. сачепи таттха кхӣрам̣ ва̄ расам̣ ва̄ а̄киранти, йена аджджхоттхатам̣ бхаттам̣ екарасам̣ хоти, кот̣ито пат̣т̣ха̄йа бхун̃джантасса ана̄паттӣти маха̄паччарийам̣ вуттам̣. маха̄ат̣т̣хакатха̄йам̣ пана вуттам̣ – ‘‘кхӣрабхаттам̣ ва̄ расабхаттам̣ ва̄ лабхитва̄ нисиннасса таттхева ан̃н̃епи кхӣрабхаттам̣ ва̄ расабхаттам̣ ва̄ а̄киранти, кхӣрам̣ ва̄ расам̣ ва̄ пивато ана̄патти. бхун̃джантена пана пат̣хамам̣ ладдхамам̣сакхан̣д̣ам̣ ва̄ бхаттапин̣д̣ам̣ ва̄ мукхе паккхипитва̄ кот̣ито пат̣т̣ха̄йа бхун̃джитум̣ ват̣т̣ати. саппипа̄йа̄сепи есева найо’’ти.
маха̄упа̄сако бхиккхум̣ нимантети, тасса кулам̣ упагатасса упа̄сакопи тасса путтада̄рабха̄тикабхагиниа̄дайопи аттано аттано кот̣т̣ха̄сам̣ а̄харитва̄ патте паккхипанти, упа̄сакена пат̣хамам̣ диннам̣ абхун̃джитва̄ паччха̄ ладдхам̣ бхун̃джантасса ‘‘ана̄паттӣ’’ти маха̄ат̣т̣хакатха̄йам̣ вуттам̣. курундат̣т̣хакатха̄йам̣ пана ват̣т̣атӣти вуттам̣. маха̄паччарийам̣ ‘‘саче па̄т̣еккам̣ пачанти, аттано аттано паккабхаттато а̄харитва̄ денти, таттха паччха̄ а̄хат̣ам̣ пат̣хамам̣ бхун̃джантасса па̄читтийам̣. йади пана саббесам̣ екова па̄ко хоти, парампарабходжанам̣ на хотӣ’’ти вуттам̣. маха̄упа̄сако нимантетва̄ нисӣда̄пети, ан̃н̃о мануссо паттам̣ ган̣ха̄ти, на да̄таббам̣. ким̣ бханте на детха̄ти? нану упа̄сака тайа̄ нимантитамха̄ти! хоту бханте, ладдхам̣ ладдхам̣ бхун̃джатха̄ти вадати, бхун̃джитум̣ ват̣т̣ати. ан̃н̃ена а̄харитва̄ бхатте динне а̄пуччхитва̄пи бхун̃джитум̣ ват̣т̣атӣти курундийам̣ вуттам̣.
анумоданам̣ катва̄ гаччхантам̣ дхаммам̣ сотука̄ма̄ ‘‘свепи бханте а̄гаччхеййа̄тха̄’’ти саббе нимантенти, пунадивасе а̄гантва̄ ладдхам̣ ладдхам̣ бхун̃джитум̣ ват̣т̣ати. касма̄? саббехи нимантитатта̄. еко бхиккху пин̣д̣а̄йа чаранто бхаттам̣ лабхати, таман̃н̃о упа̄сако нимантетва̄ гхаре нисӣда̄пети, на ча та̄ва бхаттам̣ сампаджджати. саче со бхиккху пин̣д̣а̄йа чаритва̄ ладдхабхаттам̣ бхун̃джати, а̄патти. абхутва̄ нисинне ‘‘ким̣ бханте на бхун̃джасӣ’’ти вутте ‘‘тайа̄ нимантитатта̄’’ти ватва̄ ладдхам̣ ладдхам̣ бхун̃джатха бханте’’ти вутто бхун̃джати, ват̣т̣ати.
сакалена га̄мена̄ти сакалена га̄мена екато хутва̄ нимантитассева йаттха каттхачи бхун̃джато ана̄патти. пӯгепи есева найо. нимантийама̄но бхиккхам̣ гахесса̄мӣти бхан̣атӣти ‘‘бхаттам̣ ган̣ха̄’’ти нимантийама̄но ‘‘на майхам̣ тава бхаттенаттхо, бхиккхам̣ ган̣хисса̄мӣ’’ти вадати. еттха пана маха̄падуматтхеро а̄ха – ‘‘евам̣ ваданто имасмим̣ сиккха̄паде анимантанам̣ ка̄тум̣ саккоти, бхун̃джанаттха̄йа пана ока̄со като хотӣти нева ган̣абходжанато на ча̄риттато муччатӣ’’ти. маха̄суматтхеро а̄ха – ‘‘йадаггена анимантанам̣ ка̄тум̣ саккоти, тадаггена нева ган̣абходжанам̣ на ча̄риттам̣ хотӣ’’ти. сесам̣ утта̄намева.
катхинасамут̣т̣ха̄нам̣ – ка̄йава̄чато ка̄йава̄ча̄читтато ча самут̣т̣ха̄ти, кирийа̄кирийам̣ еттха хи бходжанам̣ кирийа̄, авикаппанам̣ акирийа̄, носан̃н̃а̄вимоккхам̣, ачиттакам̣, пан̣н̣аттиваджджам̣, ка̄йакаммам̣, вачӣкаммам̣, тичиттам̣, тиведананти.
парампарабходжанасиккха̄падам̣ татийам̣.