1. а̄васатхапин̣д̣асиккха̄падаван̣н̣ана̄

203. бходжанаваггасса пат̣хамасиккха̄паде – а̄васатхапин̣д̣оти а̄васатхе пин̣д̣о. саманта̄ париккхиттам̣ аддхикагила̄нагаббхинипаббаджита̄нам̣ йатха̄нурӯпам̣ пан̃н̃аттаман̃чапӣт̣хам̣ анекагаббхапамукхапариччхедам̣ а̄васатхам̣ катва̄ таттха пун̃н̃ака̄мата̄йа пин̣д̣о пан̃н̃атто хоти, йа̄губхаттабхесаджджа̄ди саббам̣ тесам̣ тесам̣ да̄наттха̄йа т̣хапитам̣ хотӣти аттхо. хиййопӣти свепи. апасаккантӣти апагаччханти. манусса̄ уджджха̄йантӣти титтхийе апассанта̄ ‘‘титтхийа̄ кухим̣ гата̄’’‘‘име пасситва̄ пакканта̄’’ти сутва̄ уджджха̄йанти. куккучча̄йантоти куккуччам̣ каронто, акаппийасан̃н̃ам̣ уппа̄дентоти аттхо.

206. саккоти тамха̄ а̄васатха̄ паккамитунти аддхайоджанам̣ ва̄ йоджанам̣ ва̄ гантум̣ саккоти. на саккотӣти еттакамева на саккоти. анодисса̄ти имесам̣йева ва̄ еттака̄нам̣йева ва̄ти екам̣ па̄сан̣д̣ам̣ ануддиситва̄ саббесам̣ пан̃н̃атто хоти. йа̄вадаттхоти бходжанампи еттаканти апариччхиндитва̄ йа̄вадаттхо пан̃н̃атто хоти. саким̣ бхун̃джитаббанти екадивасам̣ бхун̃джитаббам̣, дутийадивасато пат̣т̣ха̄йа пат̣иггахан̣е дуккат̣ам̣, аджджхоха̄ре аджджхоха̄ре па̄читтийам̣.

айам̣ панеттха виниччхайо – екакулена ва̄ на̄на̄кулехи ва̄ екато хутва̄ екасмим̣ т̣ха̄не ва̄ на̄на̄т̣ха̄несу ва̄ ‘‘аджджа екасмим̣; све екасми’’нти евам̣ анийамитат̣т̣ха̄не ва̄ пан̃н̃аттам̣ екасмим̣ т̣ха̄не екадивасам̣ бхун̃джитва̄ дутийадивасе тасмим̣ т̣ха̄не ан̃н̃асмим̣ ва̄ бхун̃джитум̣ на ват̣т̣ати. на̄на̄кулехи пана на̄на̄т̣ха̄несу пан̃н̃аттам̣ екасмим̣ т̣ха̄не екадивасам̣ бхун̃джитва̄ дутийадивасе ан̃н̃аттха бхун̃джитум̣ ват̣т̣ати. пат̣ипа̄т̣им̣ пана кхепетва̄ пуна а̄дито пат̣т̣ха̄йа бхун̃джитум̣ на ват̣т̣атӣти маха̄паччарийам̣ вуттам̣. екапӯгана̄на̄пӯгаекага̄мана̄на̄га̄месупи есева найо. йопи екакуласса ва̄ на̄на̄кула̄нам̣ ва̄ екато пан̃н̃атто тан̣д̣ула̄дӣнам̣ абха̄вена антарантара̄ чхиджджати, сопи на бхун̃джитаббо. саче пана ‘‘на саккома да̄ту’’нти упаччхиндитва̄ пуна калйа̄н̣ачитте уппанне да̄тум̣ а̄рабханти, етам̣ пуна екадивасам̣ бхун̃джитум̣ ват̣т̣атӣти маха̄паччарийам̣ вуттам̣.

208. ана̄патти гила̄насса̄ти гила̄насса ануваситва̄ бхун̃джантасса ана̄патти. гаччханто ва̄ти йо гаччханто антара̄магге екадивасам̣ гатат̣т̣ха̄не ча екадивасам̣ бхун̃джати, тасса̄пи ана̄патти. а̄гаччхантепи есева найо. гантва̄ пачча̄гаччхантопи антара̄магге екадивасам̣ а̄гатат̣т̣ха̄не ча екадивасам̣ бхун̃джитум̣ лабхати. гаччхисса̄мӣти бхун̃джитва̄ никкхантасса надӣ ва̄ пӯрати чора̄дибхайам̣ ва̄ хоти, со ниваттитва̄ кхемабха̄вам̣ н̃атва̄ гаччханто пуна екадивасам̣ бхун̃джитум̣ лабхатӣти саббамидам̣ маха̄паччарийа̄дӣсу вуттам̣. одисса пан̃н̃атто хотӣти бхиккхӯнам̣йева аттха̄йа уддиситва̄ пан̃н̃атто хоти. на йа̄вадаттхоти йа̄вадаттхам̣ пан̃н̃атто на хоти, тхокам̣ тхокам̣ лаббхати, та̄дисам̣ ниччампи бхун̃джитум̣ ват̣т̣ати. пан̃ча бходжана̄ни т̣хапетва̄ саббаттха̄ти йа̄гукхаджджакапхала̄пхала̄дибхеде саббаттха ана̄патти. йа̄гуа̄дӣни хи ниччампи бхун̃джитум̣ ват̣т̣ати. сесам̣ утта̄намева. ел̣акаломасамут̣т̣ха̄нам̣ – ка̄йато ча ка̄йачиттато ча самут̣т̣ха̄ти, кирийам̣, носан̃н̃а̄вимоккхам̣, ачиттакам̣, пан̣н̣аттиваджджам̣, ка̄йакаммам̣ тичиттам̣, тиведананти.

а̄васатхапин̣д̣асиккха̄падам̣ пат̣хамам̣.