3. уджджха̄панакасиккха̄падаван̣н̣ана̄

103. татийасиккха̄паде – даббам̣ маллапуттам̣ бхиккхӯ уджджха̄пентӣти ‘‘чханда̄йа даббо маллапутто’’тиа̄дӣни ваданта̄ там̣ а̄йасмантам̣ техи бхиккхӯхи аваджа̄на̄пенти, аван̃н̃а̄йа олока̄пенти, ла̄макато ва̄ чинта̄пентӣ’’ти аттхо. лаккхан̣ам̣ панеттха саддасаттха̄нуса̄рена ведитаббам̣. оджджха̄пентӣтипи па̄т̣хо. айамеваттхо. чханда̄йа̄ти чхандена паккхапа̄тена; аттано аттано сандит̣т̣хасамбхатта̄нам̣ пан̣ӣта̄ни пан̃н̃апетӣти адхиппа̄йо. кхиййантӣти ‘‘чханда̄йа даббо маллапутто’’тиа̄дӣни ваданта̄ пака̄сенти.

105. уджджха̄панаке кхиййанаке па̄читтийанти еттха йена вачанена уджджха̄пенти, там̣ уджджха̄панакам̣. йена ча кхиййанти там̣ кхиййанакам̣. тасмим̣ уджджха̄панаке кхиййанаке. па̄читтийанти ваттхудвайе па̄читтийадвайам̣ вуттам̣.

106. уджджха̄панакам̣ на̄ма упасампаннам̣ сан̇гхена самматам̣ сена̄санапан̃н̃а̄пакам̣ ва̄…пе… аппаматтакависсаджджанакам̣ ва̄ти етесам̣ пада̄нам̣ ‘‘ман̇кукаттука̄мо’’ти имина̄ самбандхо. аван̣н̣ам̣ каттука̄мо айасам̣ каттука̄моти имесам̣ пана васена упасампаннантиа̄дӣсу ‘‘упасампаннасса̄’’ти евам̣ вибхаттивипарин̣а̄мо ка̄таббо. уджджха̄пети ва̄ кхиййати ва̄ а̄патти па̄читтийасса̄ти еттха пана йасма̄ ‘‘кхиййанакам̣ на̄ма̄’’ти евам̣ ма̄тика̄падам̣ уддхаритва̄пи ‘‘уджджха̄панакам̣ на̄ма̄’’ти имасса падасса вуттавибхан̇гойева ваттаббо хоти, ан̃н̃ава̄дакасиккха̄паде вийа ан̃н̃о висесо наттхи, тасма̄ там̣ висум̣ ануддхаритва̄ авибхаджитва̄ нигаманамева екато катанти ведитаббам̣. дхаммакамме дхаммакаммасан̃н̃ӣтиа̄дӣсу йам̣ тасса упасампаннасса саммутикаммам̣ катам̣ тан̃че дхаммакаммам̣ хоти, со ча бхиккху тасмим̣ дхаммакаммасан̃н̃ӣ уджджха̄панакан̃ча кхиййанакан̃ча кароти, атхасса тасмим̣ уджджха̄панаке ча кхиййанаке ча а̄патти па̄читтийасса̄ти имина̄ найена аттхо ведитаббо.

анупасампаннам̣ уджджха̄пети ва̄ кхиййати ва̄ти еттха упасампаннам̣ сан̇гхена самматам̣ ан̃н̃ам̣ анупасампаннам̣ уджджха̄пети аваджа̄на̄пети, тасса ва̄ там̣ сантике кхиййатӣти аттхо. упасампаннам̣ сан̇гхена асамматанти каммава̄ча̄йа асамматам̣ кевалам̣ ‘‘тавесо бха̄ро’’ти сан̇гхена а̄ропитабха̄рам̣ бхиккхӯнам̣ ва̄ пха̄сувиха̄раттха̄йа сайамева там̣ бха̄рам̣ вахантам̣, йатра ва̄ две тайо бхиккхӯ вихаранти, татра ва̄ та̄дисам̣ каммам̣ каронтанти адхиппа̄йо. анупасампаннам̣ сан̇гхена самматам̣ ва̄ асамматам̣ ва̄ти еттха пана кин̃ча̄пи анупасампаннасса тераса саммутийо да̄тум̣ на ват̣т̣анти. атха кхо упасампаннака̄ле ладдхасаммутико паччха̄ анупасампаннабха̄ве т̣хито, там̣ сандха̄йа ‘‘сан̇гхена самматам̣ ва̄’’ти вуттам̣. йасса пана бйаттасса са̄ман̣ерасса кевалам̣ сан̇гхена ва̄ самматена ва̄ бхиккхуна̄ ‘‘твам̣ идам̣ каммам̣ карохӣ’’ти бха̄ро като, та̄дисам̣ сандха̄йа ‘‘асамматам̣ ва̄’’ти вуттам̣. сесаметтха утта̄намева̄ти.

тисамут̣т̣ха̄нам̣ – ка̄йачиттато ва̄ча̄читтато ка̄йава̄ча̄читтато ча самут̣т̣ха̄ти, кирийам̣, сан̃н̃а̄вимоккхам̣, сачиттакам̣, локаваджджам̣, ка̄йакаммам̣, вачӣкаммам̣, акусалачиттам̣, дуккхаведананти.

уджджха̄панакасиккха̄падам̣ татийам̣.