2. ан̃н̃ава̄дакасиккха̄падаван̣н̣ана̄

94. дутийасиккха̄паде – ана̄ча̄рам̣ а̄чаритва̄ти ака̄таббам̣ катва̄; ка̄йавачӣдва̄ресу а̄паттим̣ а̄паджджитва̄ти вуттам̣ хоти. ан̃н̃енан̃н̃ам̣ пат̣ичаратӣти ан̃н̃ена вачанена ан̃н̃ам̣ вачанам̣ пат̣ичарати пат̣иччха̄дети аджджхоттхарати; ида̄ни там̣ пат̣ичаран̣авидхим̣ дассенто ‘‘ко а̄панно’’тиа̄дима̄ха. татра̄йам̣ вачанасамбандхо – со кира кин̃чи вӣтиккамам̣ дисва̄ ‘‘а̄вусо, а̄паттим̣ а̄панносӣ’’ти сан̇гхамаджджхе а̄паттийа̄ ануйун̃джийама̄но ‘‘ко а̄панно’’ти вадати. ‘‘тато тва’’нти вутте ‘‘ахам̣ ким̣ а̄панно’’ти вадати. атха ‘‘па̄читтийам̣ ва̄ дуккат̣ам̣ ва̄’’ти вутте ваттхум̣ пуччханто ‘‘ахам̣ кисмим̣ а̄панно’’ти вадати. тато ‘‘асукасмим̣ на̄ма ваттхусми’’нти вутте ‘‘ахам̣ катхам̣ а̄панно, ким̣ каронто а̄панномхӣ’’ти пуччхати. атха ‘‘идам̣ на̄ма каронто а̄панно’’ти вутте ‘‘кам̣ бхан̣атха̄’’ти вадати. тато ‘‘там̣ бхан̣а̄ма̄’’ти вутте ‘‘ким̣ бхан̣атха̄’’ти вадати.

апичеттха айам̣ па̄л̣имуттакопи ан̃н̃енан̃н̃ам̣ пат̣ичаран̣авидхи – бхиккхӯхи ‘‘тава сипа̄т̣ика̄йа каха̄пан̣о дит̣т̣хо, киссевамаса̄руппам̣ каросӣ’’ти вутто ‘‘судит̣т̣хам̣, бханте, на панесо каха̄пан̣о; типуман̣д̣алам̣ ета’’нти бхан̣анто ва̄ ‘‘твам̣ сурам̣ пиванто дит̣т̣хо, киссевам̣ каросӣ’’ти вутто ‘‘судит̣т̣хо, бханте, на панеса̄ сура̄, бхесаджджаттха̄йа сампа̄дитам̣ арит̣т̣ха’’нти бхан̣анто ва̄ ‘‘твам̣ пат̣иччханне а̄сане ма̄туга̄мена саддхим̣ нисинно дит̣т̣хо, киссевамаса̄руппам̣ каросӣ’’ти вутто ‘‘йена дит̣т̣хам̣ судит̣т̣хам̣, вин̃н̃ӯ панеттха дутийо аттхи, со кисса на дит̣т̣хо’’ти бхан̣анто ва̄, ‘‘ӣдисам̣ тайа̄ кин̃чи дит̣т̣ха’’нти пут̣т̣хо ‘‘на сун̣а̄мӣ’’ти сотамупаненто ва̄, сотадва̄ре пуччханта̄нам̣ чаккхум̣ упаненто ва̄, ан̃н̃енан̃н̃ам̣ пат̣ичаратӣти ведитаббо. ан̃н̃ава̄дакам̣ ропетӯти ан̃н̃ава̄дакам̣ а̄ропету; патит̣т̣ха̄петӯти аттхо. вихесакам̣ ропетӯти етасмимпи есева найо.

98. ан̃н̃ава̄даке вихесаке па̄читтийанти еттха ан̃н̃ам̣ вадатӣти ан̃н̃ава̄дакам̣; ан̃н̃енан̃н̃ам̣ пат̣ичаран̣ассетам̣ на̄мам̣. вихесетӣти вихесакам̣; тун̣хӣбхӯтассетам̣ на̄мам̣, тасмим̣ ан̃н̃ава̄даке вихесаке. па̄читтийанти ваттхудвайе па̄читтийадвайам̣ вуттам̣.

100. аропите ан̃н̃ава̄дакети каммава̄ча̄йа ана̄ропите ан̃н̃ава̄даке. аропите вихесакети етасмимпи есева найо.

101. дхаммакамме дхаммакаммасан̃н̃ӣтиа̄дӣсу йам̣ там̣ ан̃н̃ава̄дакавихесакаропанакаммам̣ катам̣, тан̃че дхаммакаммам̣ хоти, со ча бхиккху тасмим̣ дхаммакаммасан̃н̃ӣ ан̃н̃ава̄дакан̃ча вихесакан̃ча кароти, атхасса тасмим̣ ан̃н̃ава̄даке ча вихесаке ча а̄патти па̄читтийасса̄ти имина̄ найена аттхо ведитаббо.

102. аджа̄нанто пуччхатӣти а̄паттим̣ ва̄ а̄паннабха̄вам̣ аджа̄нантойева ‘‘ким̣ тумхе бхан̣атха, ахам̣ на джа̄на̄мӣ’’ти пуччхати. гила̄но ва̄ на катхетӣти мукхе та̄дисо бйа̄дхи хоти, йена катхетум̣ на саккоти. сан̇гхасса бхан̣д̣анам̣ ва̄тиа̄дӣсу сан̇гхамаджджхе катхите таппаччайа̄ сан̇гхасса бхан̣д̣анам̣ ва̄ калахо ва̄ вива̄до ва̄ бхависсати, со ма̄ ахосӣти ман̃н̃ама̄но на катхетӣти имина̄ найена аттхо ведитаббо. сесам̣ утта̄намева̄ти.

тисамут̣т̣ха̄нам̣ – ка̄йачиттато ва̄ча̄читтато ка̄йава̄ча̄читтато ча самут̣т̣ха̄ти, сийа̄ кирийам̣, сийа̄ акирийам̣, ан̃н̃енан̃н̃ам̣ пат̣ичарантасса хи кирийам̣ хоти, тун̣хӣбха̄вена вихесантасса акирийам̣, сан̃н̃а̄вимоккхам̣, сачиттакам̣, локаваджджам̣, ка̄йакаммам̣, вачӣкаммам̣, акусалачиттам̣, дуккхаведананти.

ан̃н̃ава̄дакасиккха̄падам̣ дутийам̣.