10. саппа̄н̣акасиккха̄падаван̣н̣ана̄

140. дасамасиккха̄паде – джа̄нам̣ саппа̄н̣аканти саппа̄н̣акам̣ етанти йатха̄ татха̄ ва̄ джа̄нанто. син̃чеййа ва̄ син̃ча̄пеййа ва̄ти тена удакена сайам̣ ва̄ син̃чеййа, ан̃н̃ам̣ ва̄ а̄н̣а̄петва̄ син̃ча̄пеййа. па̄л̣ийам̣ пана ‘‘син̃чеййа̄ти сайам̣ син̃чатӣ’’ти ӣдиса̄нам̣ вачана̄нам̣ аттхо пуббе вуттанайенева ведитаббо.

таттха дха̄рам̣ авиччхиндитва̄ син̃чантасса екасмим̣ удакагхат̣е ека̄ва а̄патти. еса найо саббабха̄джанесу. дха̄рам̣ виччхиндантасса пана пайоге пайоге а̄патти. ма̄тикам̣ саммукхам̣ кароти, дивасампи сандату, ека̄ва а̄патти. саче таттха таттха бандхитва̄ ан̃н̃ато ан̃н̃ато нети, пайоге пайоге а̄патти. сакат̣абха̄раматтан̃чепи тин̣ам̣ екапайогена удаке паккхипати, ека̄ва а̄патти. екекам̣ тин̣ам̣ ва̄ пан̣н̣ам̣ ва̄ паккхипантасса пайоге пайоге а̄патти. маттика̄йапи ан̃н̃есупи кат̣т̣хагомайа̄дӣсу есева найо. идам̣ пана маха̄удакам̣ сандха̄йа на вуттам̣, йам̣ тин̣е ва̄ маттика̄йа ва̄ паккхитта̄йа парийа̄да̄нам̣ гаччхати, а̄вилам̣ ва̄ хоти, йаттха па̄н̣ака̄ маранти, та̄дисам̣ удакам̣ сандха̄йа вуттанти ведитаббам̣. сесаметтха утта̄намева̄ти.

тисамут̣т̣ха̄нам̣ – ка̄йачиттато ва̄ча̄читтато ка̄йава̄ча̄читтато ча самут̣т̣ха̄ти, кирийам̣, сан̃н̃а̄вимоккхам̣, сачиттакам̣, пан̣н̣аттиваджджам̣, ка̄йакаммам̣, вачӣкаммам̣, тичиттам̣ тиведананти.

саппа̄н̣акасиккха̄падам̣ дасамам̣.

саматто ван̣н̣ана̄ккамена сена̄санавагго дутийо.