3. сӣласуттаван̣н̣ана̄

184. татийе сӣласампанна̄ти еттха кхӣн̣а̄савасса локийалокуттарасӣлам̣ катхитам̣, тена сампанна̄ти аттхо. сама̄дхипан̃н̃а̄супи есева найо. вимутти пана пхалавимуттийева. вимуттин̃а̄н̣адассанам̣ паччавеккхан̣ан̃а̄н̣ам̣. еваметтха сӣла̄дайо тайо локийалокуттара̄, вимутти локуттара̄ва, вимуттин̃а̄н̣адассанам̣ локийамева.

дассанампа̄ханти дассанампи ахам̣. там̣ панетам̣ дассанам̣ – чаккхудассанам̣, н̃а̄н̣адассананти дувидхам̣. таттха пасаннехи чаккхӯхи арийа̄нам̣ дассанам̣ олоканам̣ чаккхудассанам̣ на̄ма. арийехи пана дит̣т̣хасса лаккхан̣асса дассанам̣, пат̣ивиддхасса ча пат̣ивиджджханам̣ джха̄нена ва̄ випассана̄йа ва̄ маггапхалехи ва̄ н̃а̄н̣адассанам̣ на̄ма. имасмим̣ панеттха чаккхудассанам̣ адхиппетам̣. арийа̄нан̃хи пасаннехи чаккхӯхи олоканампи бахука̄рамева. савананти ‘‘асуко на̄ма кхӣн̣а̄саво асукасмим̣ на̄ма рат̣т̣хе ва̄ джанападе ва̄ га̄ме ва̄ нигаме ва̄ виха̄ре ва̄ лен̣е ва̄ васатӣ’’ти катхента̄нам̣ сотена саванам̣, етампи бахука̄рамева. упасан̇камананти ‘‘да̄нам̣ ва̄ дасса̄ми, пан̃хам̣ ва̄ пуччхисса̄ми, дхаммам̣ ва̄ сосса̄ми, сакка̄рам̣ ва̄ карисса̄мӣ’’ти еварӯпена читтена арийа̄нам̣ упасан̇каманам̣. пайирупа̄сананти пан̃ха̄пайирупа̄санам̣. арийа̄нам̣ гун̣е сутва̄ те упасан̇камитва̄ нимантетва̄ да̄нам̣ датва̄ ‘‘ким̣, бханте, кусала’’нтиа̄дина̄ найена пан̃хапуччхананти аттхо.

ануссатинти раттит̣т̣ха̄надива̄т̣т̣ха̄несу нисиннасса ‘‘ида̄ни арийа̄ лен̣агухаман̣д̣апа̄дӣсу джха̄навипассана̄маггапхаласукхехи вӣтина̄ментӣ’’ти ануссаран̣ам̣. йо ва̄ тесам̣ сантике ова̄до ладдхо хоти, там̣ а̄ваджджитва̄ ‘‘имасмим̣ т̣ха̄не сӣлам̣ катхитам̣, имасмим̣ сама̄дхи, имасмим̣ випассана̄, имасмим̣ магго, имасмим̣ пхала’’нти евам̣ ануссаран̣ам̣. анупаббаджджанти арийесу читтам̣ паса̄детва̄ гхара̄ никкхамма тесам̣ сантике паббаджджам̣. арийа̄нан̃хи сантике читтам̣ паса̄детва̄ тесам̣йева сантике паббаджитва̄ тесам̣йева ова̄да̄нуса̄саним̣ пачча̄сӣсама̄насса чаратопи паббаджджа̄ анупаббаджджа̄ на̄ма. арийесу паса̄дена ан̃н̃аттха паббаджитва̄ арийа̄нам̣ сантике ова̄да̄нуса̄саним̣ пачча̄сӣсама̄насса чарато паббаджджа̄пи анупаббаджджа̄ на̄ма. ан̃н̃есу пана паса̄дена ан̃н̃есам̣йева сантике паббаджитва̄ ан̃н̃есам̣йева ова̄да̄нуса̄саним̣ пачча̄сӣсама̄насса чарато паббаджджа̄ анупаббаджджа̄ на̄ма на хоти.

евам̣ паббаджитесу пана маха̄кассапаттхерасса та̄ва анупаббаджджам̣ паббаджита̄ сатасахассаматта̄ ахесум̣, татха̄ тхерассева саддхивиха̄рикасса ча чандагуттаттхерасса, тасса̄пи саддхивиха̄рикасса сӯрийагуттаттхерасса, тасса̄пи саддхивиха̄рикасса ассагуттаттхерасса, тасса̄пи саддхивиха̄рикасса йонакадхаммараккхитаттхерасса, тасса пана саддхивиха̄рико асокаран̃н̃о канит̣т̣хабха̄та̄ тиссаттхеро на̄ма ахоси, тасса анупаббаджджам̣ паббаджита̄ ад̣д̣хатеййакот̣исан̇кха̄ ахесум̣. махиндаттхерасса анупаббаджита̄нам̣ ган̣анапариччхедо наттхи. йа̄ваджджадиваса̄ лан̇ка̄дӣпе саттхари паса̄дена паббаджанта̄ махиндаттхерассева паббаджджам̣ анупаббаджанти на̄ма.

там̣ дхамманти там̣ тесам̣ ова̄да̄нуса̄санӣдхаммам̣. ануссаратӣти сарати. анувитаккетӣти витакка̄хатам̣ кароти. а̄раддхо хотӣти парипун̣н̣о хоти. павичинатӣтиа̄ди саббам̣ таттха н̃а̄н̣ача̄равасенева вуттам̣. атха ва̄ павичинатӣти тесам̣ тесам̣ дхамма̄нам̣ лаккхан̣ам̣ вичинати. павичаратӣти таттха н̃а̄н̣ам̣ чара̄пети. паривӣмам̣сама̄паджджатӣти вӣмам̣санам̣ олоканам̣ гавесанам̣ а̄паджджати.

сатта пхала̄ сатта̄нисам̣са̄ти убхайампетам̣ аттхато екам̣. дит̣т̣хева дхамме пат̣икачча ан̃н̃ам̣ а̄ра̄дхетӣти арахаттам̣ а̄ра̄дхенто имасмим̣йева аттабха̄ве а̄ра̄дхети, тан̃ча кхо пат̣икачча, асампаттейева маран̣ака̄лети аттхо. атха маран̣ака̄лети атха маран̣асса а̄саннака̄ле.

антара̄паринибба̄йӣти йо а̄йувемаджджхам̣ анатиккамитва̄ паринибба̄йати, со тивидхо хоти. каппасахасса̄йукесу та̄ва авихесу ниббаттитва̄ еко ниббаттадивасейева арахаттам̣ па̄пун̣а̄ти. но че ниббаттадивасе па̄пун̣а̄ти, пат̣хамасса пана каппасатасса маттхаке па̄пун̣а̄ти. айамеко антара̄паринибба̄йӣ. апаро евам̣ асакконто двиннам̣ каппасата̄нам̣ маттхаке па̄пун̣а̄ти, айам̣ дутийо. апаро евампи асакконто чатуннам̣ каппасата̄нам̣ маттхаке па̄пун̣а̄ти, айам̣ татийо антара̄паринибба̄йӣ.

пан̃чамам̣ пана каппасатам̣ атиккамитва̄ арахаттам̣ патто упахаччапаринибба̄йӣ на̄ма хоти. атаппа̄дӣсупи есева найо. йаттха каттхачи уппанно пана сасан̇кха̄рена саппайогена арахаттам̣ патто сасан̇кха̄рапаринибба̄йӣ на̄ма, асан̇кха̄рена аппайогена патто асан̇кха̄рапаринибба̄йӣ на̄ма. авиха̄дӣсупи ниббатто таттха йа̄вата̄йукам̣ т̣хатва̄ упарӯпари ниббаттитва̄ аканит̣т̣хам̣ патто уддхам̣сото аканит̣т̣хага̄мӣ на̄ма.

имасмим̣ пана т̣ха̄не ат̣т̣хачатта̄рӣса ана̄га̄мино катхетабба̄. авихесу хи тайо антара̄паринибба̄йӣ, еко упахаччапаринибба̄йӣ, еко уддхам̣сото аканит̣т̣хага̄мӣти пан̃ча хонти. те асан̇кха̄рапаринибба̄йино пан̃ча, сасан̇кха̄рапаринибба̄йино пан̃ча̄ти даса хонти, татха̄ атаппа̄дӣсу. аканит̣т̣хесу пана уддхам̣сото наттхи, тасма̄ таттха чатта̄ро сасан̇кха̄рапаринибба̄йӣ, чатта̄ро асан̇кха̄рапаринибба̄йӣти ат̣т̣ха̄ти евам̣ ат̣т̣хачатта̄лӣса хонти. тесам̣ уддхам̣сото аканит̣т̣хага̄мӣ саббаджет̣т̣хо чева хоти саббаканит̣т̣хо ча. катхам̣? со хи сол̣асакаппасахасса̄йукатта̄ а̄йуна̄ саббесам̣ джет̣т̣хо, саббапаччха̄ арахаттам̣ па̄пун̣ӣти саббесам̣ канит̣т̣хо. имасмим̣ сутте апуббам̣ ачаримам̣ екачиттаккхан̣ика̄ на̄на̄лаккхан̣а̄ арахаттамаггасса пуббабха̄гавипассана̄ боджджхан̇га̄ катхита̄.