7. кхеттӯпамасуттаван̣н̣ана̄

359. саттаме джан̇галанти тхаддхам̣ на муду. ӯсаранти сан̃джа̄талон̣ам̣. па̄пабхӯмӣти ла̄макабхӯмибха̄гам̣. мам̣дӣпа̄тиа̄дӣсу ахам̣ дӣпо патит̣т̣ха̄ етесанти мам̣дӣпа̄. ахам̣ лен̣о аллӣйанат̣т̣ха̄нам̣ етесанти мам̣лен̣а̄. ахам̣ та̄н̣ам̣ раккха̄ етесанти мам̣та̄н̣а̄. ахам̣ саран̣ам̣ бхайана̄санам̣ етесанти мам̣саран̣а̄. вихарантӣти мам̣ евам̣ катва̄ вихаранти.

гобхаттампӣти дхан̃н̃апхаласса абха̄вена ла̄йитва̄ кала̄пакала̄пам̣ бандхитва̄ т̣хапитам̣ гимхака̄ле гуннампи кха̄данам̣ бхависсатӣти аттхо. удакаман̣икоти куччхийам̣ ман̣икамекхала̄йа евам̣ ладдхана̄мо бха̄джанависесо. аха̄рӣ апариха̄рӣти удакам̣ на харати на парихарати, на парийа̄дийатӣти аттхо. ити имасмим̣ сутте саккаччадхаммадесана̄ва катхита̄. буддха̄нан̃хи асаккаччадхаммадесана̄ на̄ма наттхи. сӣхасама̄навуттино хи буддха̄, йатха̄ сӣхо пабхиннаварава̄ран̣ассапи сасабил̣а̄ра̄дӣнампи гахан̣аттха̄йа екасадисамева вегам̣ кароти, евам̣ буддха̄пи екасса десента̄пи двиннам̣ бахӯнам̣ бхиккхупариса̄йа бхиккхуниупа̄сакаупа̄сика̄париса̄йапи титтхийа̄нампи десента̄ саккаччамева десенти. чатассо пана париса̄ саддахитва̄ окаппетва̄ сун̣антӣти та̄сам̣ десана̄ саккаччадесана̄ на̄ма джа̄та̄.