3. куммопамасуттаван̣н̣ана̄

240. татийе куммоти ат̣т̣хикуммо. каччхапоти тассева вевачанам̣. анунадӣтӣрети надийа̄ анутӣре. гочарапасутоти ‘‘саче кин̃чи пхала̄пхалам̣ лабхисса̄ми, кха̄дисса̄мӣ’’ти гочараттха̄йа пасуто уссукко таннибандхо. самодахитва̄ти самугге вийа паккхипитва̄. сан̇каса̄йатӣти аччхати. самодаханти самодаханто т̣хапенто. идам̣ вуттам̣ хоти – йатха̄ куммо ан̇га̄ни саке капа̄ле самодаханто син̇га̄ласса ота̄рам̣ на дети, на ча нам̣ син̇га̄ло пасахати, евам̣ бхиккху аттано мановитакке саке а̄рамман̣акапа̄ле самодаханто килесама̄расса ота̄рам̣ на дети, на ча нам̣ ма̄ро пасахати.

анисситоти тан̣ха̄дит̣т̣хиниссайехи аниссито. ан̃н̃амахет̣хайа̄ноти ан̃н̃ам̣ кан̃чи пуггалам̣ авихет̣хенто. париниббутоти килесапаринибба̄нена париниббуто. нӯпавадеййа кан̃чӣти ан̃н̃ам̣ кан̃чи пуггалам̣ сӣлавипаттийа̄ ва̄ а̄ча̄равипаттийа̄ ва̄ атта̄нам̣ уккам̣сетука̄мата̄йа ва̄ парам̣ вамбхетука̄мата̄йа ва̄ на упавадеййа, ан̃н̃адаттху пан̃ча дхамме аджджхаттам̣ упат̣т̣хапетва̄, ‘‘ка̄лена ваккха̄ми, но ака̄лена, бхӯтена ваккха̄ми, но абхӯтена, сан̣хена ваккха̄ми, но пхарусена, аттхасам̣хитена ваккха̄ми, но анаттхасам̣хитена, меттачитто ваккха̄ми, но досантаро’’ти евам̣ уллумпанасабха̄васан̣т̣хитенева читтена вихарати.