3. н̃а̄н̣аваттхусуттаван̣н̣ана̄

33. татийе там̣ сун̣а̄тха̄ти там̣ н̃а̄н̣аваттхудесанам̣ сун̣а̄тха. н̃а̄н̣аваттхӯнӣти четтха н̃а̄н̣амева н̃а̄н̣аваттхӯти ведитаббам̣. джара̄маран̣е н̃а̄н̣антиа̄дӣсу чатӯсу пат̣хамам̣ саванамайан̃а̄н̣ам̣ саммасанан̃а̄н̣ам̣ пат̣иведхан̃а̄н̣ам̣ паччавеккхан̣ан̃а̄н̣анти чатуббидхам̣ ват̣т̣ати, татха̄ дутийам̣. татийам̣ пана т̣хапетва̄ саммасанан̃а̄н̣ам̣ тивидхамева хоти, татха̄ чатуттхам̣. локуттарадхаммесу хи саммасанам̣ на̄ма наттхи. джа̄тийа̄ н̃а̄н̣антиа̄дӣсупи есева найо. имина̄ дхаммена̄ти имина̄ чатусаччадхаммена ва̄ магган̃а̄н̣адхаммена ва̄.

дит̣т̣хена̄тиа̄дӣсу дит̣т̣хена̄ти н̃а̄н̣ачаккхуна̄ дит̣т̣хена. видитена̄ти пан̃н̃а̄йа видитена. ака̄ликена̄ти кин̃чи ка̄лам̣ анатиккамитва̄ пат̣иведха̄нантарам̣йева пхалада̄йакена. паттена̄ти адхигатена. парийога̄л̣хена̄ти парийога̄хитена пан̃н̃а̄йа анупавит̣т̣хена. атӣта̄на̄гате найам̣ нетӣти ‘‘йе кхо кечӣ’’тиа̄дина̄ найена атӣте ча ана̄гате ча найам̣ нети. еттха ча на чатусаччадхаммена ва̄ магган̃а̄н̣адхаммена ва̄ сакка̄ атӣта̄на̄гате найам̣ нетум̣, чатусачче пана магган̃а̄н̣ена пат̣ивиддхе парато паччавеккхан̣ан̃а̄н̣ам̣ на̄ма хоти. тена найам̣ нетӣти ведитабба̄. аббхан̃н̃ам̣сӯти абхиан̃н̃ам̣су джа̄ним̣су. сеййатха̄па̄хам̣, етарахӣти йатха̄ ахам̣ етарахи чатусаччавасена джа̄на̄ми. анвайе н̃а̄н̣анти ануайе н̃а̄н̣ам̣, дхамман̃а̄н̣асса анугамане н̃а̄н̣ам̣, паччавеккхан̣ан̃а̄н̣ассетам̣ на̄мам̣. дхамме н̃а̄н̣анти магган̃а̄н̣ам̣. имасмим̣ сутте кхӣн̣а̄савасса секкхабхӯми катхита̄ хоти. татийам̣.