7. ачелакассапасуттаван̣н̣ана̄

17. саттаме ачело кассапоти лин̇гена ачело ниччело, на̄мена кассапо. дӯратова̄ти махата̄ бхиккхусан̇гхена паривутам̣ а̄гаччхантам̣ дӯрато ева аддаса. кин̃чидева десанти кин̃чидева ка̄ран̣ам̣. ока̄санти пан̃хабйа̄каран̣асса кхан̣ам̣ ка̄лам̣. антарагхаранти ‘‘на паллаттхика̄йа антарагхаре нисӣдисса̄мӣ’’ти еттха антонивесанам̣ антарагхарам̣. ‘‘оккхиттачаккху антарагхаре гамисса̄мӣ’’ти еттха индакхӣлато пат̣т̣ха̄йа антога̄мо. идха̄пи айамева адхиппето. йада̄кан̇кхасӣти йам̣ иччхаси.

касма̄ пана бхагава̄ катхетука̄мо йа̄вататийам̣ пат̣иккхипӣти? га̄раваджананаттхам̣. дит̣т̣хигатика̄ хи кхиппам̣ катхийама̄не га̄равам̣ на каронти, ‘‘саман̣ам̣ готамам̣ упасан̇камитумпи пуччхитумпи сукарам̣, пуччхитаматтейева катхетӣ’’ти вачанампи на саддаханти. две тайо ва̄ре пат̣иккхитте пана га̄равам̣ каронти, ‘‘саман̣ам̣ готамам̣ упасан̇камитумпи пан̃хам̣ пуччхитумпи дуккара’’нти йа̄вататийам̣ йа̄чите катхийама̄нам̣ суссӯсанти саддаханти. ити бхагава̄ ‘‘айам̣ суссӯсиссати саддахиссатӣ’’ти йа̄вататийам̣ йа̄ча̄петва̄ катхеси. апича йатха̄ бхисакко телам̣ ва̄ пха̄н̣итам̣ ва̄ пачанто мудупа̄какхарапа̄ка̄нам̣ па̄кака̄лам̣ а̄гамайама̄но па̄кака̄лам̣ анатиккамитва̄ва ота̄рети. евам̣ бхагава̄ сатта̄нам̣ н̃а̄н̣апарипа̄кам̣ а̄гамайама̄но ‘‘еттакена ка̄лена имасса н̃а̄н̣ам̣ парипа̄кам̣ гамиссатӣ’’ти н̃атва̄ва йа̄вататийам̣ йа̄ча̄песи.

ма̄ хевам̣, кассапа̄ти, кассапа, ма̄ евам̣ бхан̣и. сайам̣катам̣ дуккханти хи ваттум̣ на ват̣т̣ати, атта̄ на̄ма кочи дуккхасса ка̄рако наттхӣти дӣпети. паратопи есева найо. адхиччасамуппаннанти ака̄ран̣ена йадиччха̄йа уппаннам̣. ити пут̣т̣хо сама̄ноти касма̄ евама̄ха? евам̣ кирасса ахоси – ‘‘айам̣ ‘сайам̣катам̣ дуккха’нтиа̄дина̄ пут̣т̣хо ‘ма̄ хева’нти вадати, ‘наттхӣ’ти пут̣т̣хо ‘аттхӣ’ти вадати. ‘бхавам̣ готамо дуккхам̣ на джа̄на̄ти на пассатӣ’ти пут̣т̣хо ‘джа̄на̄ми кхва̄ха’нти вадати. кин̃чи ну кхо майа̄ вираджджхитва̄ пуччхито’’ти мӯлато пат̣т̣ха̄йа аттано пуччхамева содхенто евама̄ха. а̄чиккхату ча ме, бханте, бхагава̄ти идха саттхари сан̃джа̄тага̄раво ‘‘бхава’’нти аватва̄ ‘‘бхагава̄’’ти вадати.

со каротӣтиа̄ди, ‘‘сайам̣катам̣ дуккха’’нти ладдхийа̄ пат̣иседханаттхам̣ вуттам̣. еттха ча сатоти идам̣ бхумматтхе са̄мивачанам̣, тасма̄ еваматтхо дат̣т̣хаббо – со кароти со пат̣исам̣ведайатӣти кхо, кассапа, а̄димхийева евам̣ сати паччха̄ сайам̣катам̣ дуккханти айам̣ ладдхи хоти. еттха ча дуккханти ват̣т̣адуккхам̣ адхиппетам̣. ити ваданти етасса пуримена а̄дисаддена анантарена ча сассатасаддена самбандхо хоти. ‘‘дӣпети ган̣ха̄тӣ’’ти айам̣ панеттха па̄т̣хасесо. идан̃хи вуттам̣ хоти – ити евам̣ ваданто а̄дитова сассатам̣ дӣпети, сассатам̣ ган̣ха̄ти. касма̄? тасса хи там̣ дассанам̣ етам̣ парети, ка̄ракан̃ча ведакан̃ча екамева ган̣хантам̣ етам̣ сассатам̣ упагаччхатӣти аттхо.

ан̃н̃о каротӣтиа̄ди пана ‘‘парам̣катам̣ дуккха’’нти ладдхийа̄ пат̣иседханаттхам̣ вуттам̣. ‘‘а̄дито сато’’ти идам̣ пана идха̄пи а̄харитаббам̣. айан̃хеттха аттхо – ан̃н̃о кароти ан̃н̃о пат̣исам̣ведийатӣти кхо пана, кассапа, а̄димхийева евам̣ сати, паччха̄ ‘‘ка̄рако идхева уччхиджджати, тена катам̣ ан̃н̃о пат̣исам̣ведийатӣ’’ти евам̣ уппанна̄йа уччхедадит̣т̣хийа̄ саддхим̣ сампайутта̄йа ведана̄йа абхитуннасса виддхасса сато ‘‘парам̣катам̣ дуккха’’нти айам̣ ладдхи хотӣти. ити вадантиа̄ди вуттанайенева йоджетаббам̣. татра̄йам̣ йоджана̄ – еван̃ча ваданто а̄дитова уччхедам̣ дӣпети, уччхедам̣ ган̣ха̄ти. касма̄? тасса хи там̣ дассанам̣ етам̣ парети, етам̣ уччхедам̣ упагаччхатӣти аттхо.

ете тети йе сассатуччхедасан̇кха̄те убхо анте (анупагамма татха̄гато дхаммам̣ десети, ете те, кассапа, убхо анте) анупагамма паха̄йа аналлӣйитва̄ маджджхена татха̄гато дхаммам̣ десети, маджджхима̄йа пат̣ипада̄йа т̣хито десетӣти аттхо. катарам̣ дхамманти че? йадидам̣ авиджджа̄паччайа̄ сан̇кха̄ра̄ти. еттха хи ка̄ран̣ато пхалам̣, ка̄ран̣аниродхена часса ниродхо дӣпито, на кочи ка̄рако ва̄ ведако ва̄ ниддит̣т̣хо. етта̄вата̄ сесапан̃ха̄ пат̣иседхита̄ хонти. убхо анте анупагамма̄ти имина̄ хи татийапан̃хо пат̣иккхитто. авиджджа̄паччайа̄ сан̇кха̄ра̄ти имина̄ адхиччасамуппанната̄ чева аджа̄нанан̃ча пат̣иккхиттанти ведитаббам̣.

лабхеййанти идам̣ со бхагавато сантике бхиккхубха̄вам̣ паттхайама̄но а̄ха. атха бхагава̄ йонена кхандхаке титтхийапарива̄со (маха̄ва. 86) пан̃н̃атто, йам̣ ан̃н̃атиттхийапуббо са̄ман̣ерабхӯмийам̣ т̣хито ‘‘ахам̣, бханте, иттханна̄мо ан̃н̃атиттхийапуббо имасмим̣ дхаммавинайе а̄кан̇кха̄ми упасампадам̣. сва̄хам̣, бханте, сан̇гхам̣ чатта̄ро ма̄се парива̄сам̣ йа̄ча̄мӣ’’тиа̄дина̄ найена сама̄дийитва̄ паривасати, там̣ сандха̄йа йо кхо, кассапа, ан̃н̃атиттхийапубботиа̄дима̄ха. таттха паббаджджанти вачанасилит̣т̣хата̄васена вуттам̣. апариваситва̄йева хи паббаджджам̣ лабхати. упасампадаттхикена пана на̄тика̄лена га̄маппавесана̄дӣни ат̣т̣ха ватта̄ни пӯрентена париваситаббам̣. а̄раддхачитта̄ти ат̣т̣хаваттапӯран̣ена тут̣т̣хачитта̄. айаметтха сан̇кхепо, виттха̄рато панеса титтхийапарива̄со самантапа̄са̄дика̄йа винайат̣т̣хакатха̄йа паббаджджаккхандхакаван̣н̣ана̄йам̣ (маха̄ва. ат̣т̣ха. 86) вуттанайенева ведитаббо.

апича майа̄ти айаметтха па̄т̣хо, ан̃н̃аттха пана ‘‘апича меттха̄’’ти. пуггалавематтата̄ видита̄ти пуггалана̄наттам̣ видитам̣. ‘‘айам̣ пуггало парива̄са̄рахо, айам̣ на парива̄са̄рахо’’ти идам̣ майхам̣ па̄кат̣анти дассети. тато кассапо чинтеси – ‘‘ахо аччхарийам̣ буддхаса̄санам̣, йаттха евам̣ гхам̣ситва̄ кот̣т̣етва̄ йуттамева ган̣ханти, айуттам̣ чхад̣д̣ентӣ’’ти. тато сут̣т̣хутарам̣ паббаджджа̄йа сан̃джа̄тусса̄хо саче, бхантетиа̄дима̄ха. атха бхагава̄ тасса тиббаччхандатам̣ видитва̄ ‘‘на кассапо парива̄сам̣ арахатӣ’’ти ан̃н̃атарам̣ бхиккхум̣ а̄мантеси – ‘‘гаччха, бхиккху, кассапам̣ наха̄петва̄ пабба̄джетва̄ а̄нехӣ’’ти. со татха̄ катва̄ там̣ пабба̄джетва̄ бхагавато сантикам̣ агама̄си. бхагава̄ ган̣е нисӣдитва̄ упасампа̄деси. тена вуттам̣ алаттха кхо ачело кассапо бхагавато сантике паббаджджам̣, алаттха упасампаданти. ачирӯпасампаннотиа̄ди сесам̣ бра̄хман̣асам̣йутте (сам̣. ни. 1.187) вуттамева̄ти. саттамам̣.