8. аггикасуттаван̣н̣ана̄

194. ат̣т̣хаме аггикабха̄радва̄джоти айампи бха̄радва̄джова, агги паричаран̣авасена панасса сан̇гӣтика̄рехи етам̣ на̄мам̣ гахитам̣. саннихито хотӣти сам̣йоджито хоти. ат̣т̣ха̄сӣти касма̄ таттха ат̣т̣ха̄си? бхагава̄ кира паччӯсасамайе локам̣ олокенто имам̣ бра̄хман̣ам̣ дисва̄ чинтеси – ‘‘айам̣ бра̄хман̣о еварӯпам̣ аггапа̄йа̄сам̣ гахетва̄ ‘маха̄брахма̄нам̣ бходжемӣ’ти аггимхи джха̄пенто апхалам̣ кароти апа̄йамаггам̣ оккамати, имам̣ ладдхим̣ ависсаджджанто апа̄йапӯракова бхависсати, гаччха̄мисса дхаммадесана̄йа, миччха̄дит̣т̣хим̣ бхиндитва̄ пабба̄джетва̄ чатта̄ро магге чева чатта̄ри ча пхала̄ни демӣ’’ти, тасма̄ пуббан̣хасамайе ра̄джагахам̣ пависитва̄ таттха ат̣т̣ха̄си.

тӣхи виджджа̄хӣти тӣхи ведехи. джа̄тима̄ти йа̄ва саттама̄ пита̄махайуга̄ парисуддха̄йа джа̄тийа̄ саманна̄гато. сутава̄ бахӯти баху на̄наппака̄ре гантхе сутава̄. сомам̣ бхун̃джеййа̄ти со тевиджджо бра̄хман̣о имам̣ па̄йа̄сам̣ бхун̃джитум̣ йутто, тумха̄кам̣ панеса па̄йа̄со айуттоти вадати.

ведӣти пуббенива̄сан̃а̄н̣ена джа̄ни пат̣ивиджджхи. сагга̄па̄йанти диббена чаккхуна̄ саггампи апа̄йампи пассати. джа̄тиккхайанти арахаттам̣. абхин̃н̃а̄воситоти джа̄нитва̄ воситавоса̄но. бра̄хман̣о бхаванти авӣчито йа̄ва бхавагга̄ бхота̄ готамена садисо джа̄тисампанно кхӣн̣а̄савабра̄хман̣о наттхи, бхавам̣йева бра̄хман̣оти.

еван̃ча пана ватва̄ суван̣н̣апа̄тим̣ пӯретва̄ дасабаласса па̄йа̄сам̣ упана̄меси. саттха̄ уппаттим̣ дӣпетва̄ бходжанам̣ пат̣иккхипанто га̄тха̄бхигӣтам̣ метиа̄дима̄ха. таттха га̄тха̄бхигӣтанти га̄тха̄хи абхигӣтам̣. абходжанеййанти абхун̃джитаббам̣. идам̣ вуттам̣ хоти – твам̣, бра̄хман̣а, майхам̣ еттакам̣ ка̄лам̣ бхиккха̄ча̄раваттена т̣хитасса кат̣аччхуматтампи да̄тум̣ на̄саккхи, ида̄ни пана майа̄ туйхам̣ килан̃джамхи тиле виттха̄рентена вийа саббе буддхагун̣а̄ пака̄сита̄, ити га̄йанена га̄йитва̄ ладдхам̣ вийа идам̣ бходжанам̣ хоти, тасма̄ идам̣ га̄тха̄бхигӣтам̣ ме абходжанеййанти. сампассатам̣, бра̄хман̣а, неса дхаммоти, бра̄хман̣а, аттхан̃ча дхамман̃ча сампассанта̄нам̣ ‘‘еварӯпам̣ бходжанам̣ бхун̃джитабба’’нти еса дхаммо на хоти. судха̄бходжанампи га̄тха̄бхигӣтам̣ пануданти буддха̄, га̄тха̄хи га̄йитва̄ ладдхам̣ буддха̄ нӣхарантийева. дхамме сати, бра̄хман̣а, вуттиреса̄ти, бра̄хман̣а, дхамме сати дхаммам̣ апеккхитва̄ дхамме патит̣т̣ха̄йа джӣвитам̣ каппента̄нам̣ еса̄ вутти айам̣ а̄джӣво – еварӯпам̣ нӣхаритва̄ дхаммаладдхамева бхун̃джитаббанти.

атха бра̄хман̣о чинтеси – ахам̣ пуббе саман̣асса готамасса гун̣е ва̄ агун̣е ва̄ на джа̄на̄ми. ида̄ни панасса̄хам̣ гун̣е н̃атва̄ мама гехе асӣтикот̣иматтам̣ дханам̣ са̄сане виппакиритука̄мо джа̄то, айан̃ча ‘‘майа̄ диннапаччайа̄ акаппийа̄’’ти вадати. аппат̣иггайхо ахам̣ саман̣ена готамена̄ти. атха бхагава̄ саббан̃н̃утан̃н̃а̄н̣ам̣ песетва̄ тасса читта̄ча̄рам̣ вӣмам̣санто, ‘‘айам̣ саббепи аттана̄ диннапаччайе ‘акаппийа̄’ти саллаккхети. йам̣ хи бходжанам̣ а̄раббха катха̄ уппанна̄, етадева на ват̣т̣ати, сеса̄ ниддоса̄’’ти бра̄хман̣асса чатуннам̣ паччайа̄нам̣ да̄надва̄рам̣ дассенто ан̃н̃ена ча̄тиа̄дима̄ха. таттха куккуччавӯпасантанти хаттхакуккучча̄дӣнам̣ васена вӯпасантакуккуччам̣. аннена па̄нена̄ти десана̄маттаметам̣. айам̣ панаттхо – ан̃н̃ехи тайа̄ ‘‘париччаджисса̄мӣ’’ти саллаккхитехи чӣвара̄дӣхи паччайехи упат̣т̣хахассу. кхеттам̣ хи там̣ пун̃н̃апеккхасса хотӣти етам̣ татха̄гатаса̄санам̣ на̄ма пун̃н̃апеккхасса пун̃н̃аттхикасса туйхам̣ аппепи бӣдже бахусассапхалада̄йакам̣ сукхеттам̣ вийа пат̣ийаттам̣ хоти. ат̣т̣хамам̣.