6. саддха̄суттаван̣н̣ана̄

36. чхат̣т̣хе саддха̄ дутийа̄ пурисасса хотӣти пурисасса девалоке мануссалоке чева нибба̄нан̃ча гаччхантасса саддха̄ дутийа̄ хоти, саха̄йакиччам̣ са̄дхети. но че ассаддхийам̣ аватит̣т̣хатӣти йади ассаддхийам̣ на тит̣т̣хати. йасоти парива̄ро. киттӣти ван̣н̣абхан̣анам̣. татвасса хотӣти тато асса хоти. на̄нупатанти сан̇га̄ти ра̄гасан̇га̄дайо пан̃ча сан̇га̄ на анупатанти. пама̄дамануйун̃джантӣти йе пама̄дам̣ каронти ниббаттенти, те там̣ ануйун̃джанти на̄ма. дханам̣ сет̣т̣хам̣ва раккхатӣти мутта̄ман̣иса̄ра̄диуттамадханам̣ вийа раккхати. джха̄йантоти лаккхан̣ӯпаниджджха̄нена ча а̄рамман̣ӯпаниджджха̄нена ча джха̄йанто. таттха лаккхан̣ӯпаниджджха̄нам̣ на̄ма випассана̄маггапхала̄ни. випассана̄ хи тӣн̣и лаккхан̣а̄ни упаниджджха̄йатӣти лаккхан̣ӯпаниджджха̄нам̣. магго випассана̄йа а̄гатакиччам̣ са̄дхетӣти лаккхан̣ӯпаниджджха̄нам̣. пхалам̣ татхалаккхан̣ам̣ ниродхасаччам̣ упаниджджха̄йатӣти лаккхан̣ӯпаниджджха̄нам̣. ат̣т̣ха сама̄паттийо пана касин̣а̄рамман̣асса упаниджджха̄йанато а̄рамман̣ӯпаниджджха̄нанти ведитабба̄. парамам̣ на̄ма арахаттасукхам̣ адхиппетанти. чхат̣т̣хам̣.